“O le Alii o ia o le Atua.”

Tusia Rev. Petaia Setu ,

153 Hits

Rev. Petaia Setu

Rev. Petaia Setu

(Iosua. 22 : 31-34)

O le mau a Iakopo, o sē ua fiafia inā pese ia (Iakopo 5:13). A uma foi se galuega pe tau manuia se faamoemoe, e sami i le siva, e umusa i le pese. E faamatala e le pese, ma le siva, le loto meemee ma le agaga faafetai e faailoa le silisili ese ma le alofa o Lē na faia mea uma. E molimau, o le Alii, o le Atua lava ia.

E ā le Alii? E ā le Atua? Fai mai Tavita, e sili lava le Alii (Sala. 135:5) Ioe, e matautia le Atua! O lē na fasia ulumatua a Aikupito; o lē na faia vavega ma faailoga ofoofogia. Na ia fasia nuu tetele ma fasiotia tupu malolosi. Na ia fafaga le nuu i le manai ma le salu, ma faatafe mai le vai mai le papa ua feinu ai Isaraelu ma ana manu uma. Ua ia faaoo le nuu i le laueleele o le folafolaga, o le tofi lava o lona nuu o Isaraelu. Ua nofoia le laueleele e le nuu o le Atua. Ua uma ona tofi le eleele i ituaiga o Isaraelu. I le, ua toe foi le au malolosi o sa Reupenā ma sa Katō ma se isi vaega o Manase i le isi itū o le Ioritana, o le nuu o Kiliata, ua fai mo latou tofi.

Pe se ā se lagona o i tagata? E faapefea ona faailoa le mitamita? E faapefea ona faaleo le agaga faafetai? Ua fai le fata faitaulaga. A o le masani lea a Isaraelu. A tau manuia se faamoemoe, e fai le fata faitaulaga. O le faailoga o le fiafia ma le loto faafetai i le Atua o Aperaamo, Isaako, ma Iakopo. O le taualuga lea. O le tali faafetai atu i le Atua i mea uma. Auā o le upu moni, ana le seanoa le Atua, po ua le mafai ona faaolatia le nuu i le malaga umi i le vao (Sala. 124:1-5). Fai mai Fineaso le atalii o le faitaulaga i itu aiga ia e tolu o loo ua nofoia eleele o Kiliata, “Ua tatou iloa i le aso nei, o loo ia te i tatou le Alii.”

O le iai o le Atua i mea uma lava, e le o vaaia e mata. E le iloa e le tagata. A o le isi lea natura o le Atua. O le Atua auai [Omnipresence God]. E iā i tatou i taimi uma lava. E faamalumalu i lou olaga. E taitai i la tatou malaga. Na te fausia leleiga ma faamautū sootaga.

Samoa, se ā se mea e te faia mo le Atua i lenei tausaga fou ua e aulia? Na e iloa le tele o mea faigata na e tauasa mai ai i lena tausaga umi? Ua fia ni mea ofoofogia ma le lelei ua faia e le Atua ia te oe ma lou aiga i lenā tausaga ua mavae? E le i taofia pe toe soloia le fata faitaulaga ua uma ona fai e Reupena ma Kato ma le isi vaega o Manase ona o le ita ma le lē malamalama o le isi vaega tele o le tau usoga. E le faamata’uina ini manatu faale tagata le olioli ua faamaoni i le Atua. Ua le o se isi lava faamoemoe na faia ai le fata faitaulaga, a o le Atua o Isaraelu. O le pine lea, o le iai pea o le Atua i lona nuu ma ona tagata. O le faailoga o le loto faafetai i le Atua moni e toatasi.

Samoa e, o le aso lenei, o le aso faafetai. Ia fai le uluai Aso Sa o lenei tausaga fou ma aso faafetai o tatou uma i le Alii. Auā o le Alii, o le Atua ia. O Lē onosai ma faapalepale. O le Atua e tumu i le alofa ma le alofa mutimutivale. Toe taga’i i tua ma le loto faafetai i le tausiga a le Atua ia te oe; i lou to’alua, i lau fanau; i ou matua; i lou aiga atoa. Faapefea le nuu, le ekalesia, ma le atunuu? Ua fia ni matagi malolosi e taufaamata’u ia i tatou? E fia ni afā ua na ona faafua ae le palasi? Pe le o le Atua ea lea na ia faia mea uma, e faalogo ia te ia mea uma? Samoa e, fai se pese faafetai i le Atua. Lea ua a’e i manū le folauga sa fesoua’iina i peau eseese o lenei olaga mai lena tausaga ua tuanai atu. Faamālō folau. Faafetai tatalo. O la Mose i le nuu o Isaraelu, ia oe, ne’i galo ia te oe le Alii na ia aumaia oe nai le nuu o Aikupito, o le mea sa e nofo pologa ai (Teu. 6:12). Manatua le agalelei o le Atua ia te oe i lenā tausaga ua mavae atu (Sala. 103:2).

Faafetai ia Reupena ma Kato ma Manase ua latou faia se faamanatu, a o se faailoga vaaia o aso uma, e faamatalaina ai le Atua o ō latou tamā. Ua latou faaigoa foi le fata faitaulaga ua latou faia, O le Molimau. E le o se molimau ia Mose poo Iosua, i le nuu poo o latou matua, a o le Alii, o lo tatou Atua. Ia tutupu mai fanau o a taeao ma malamalama ai, e le tusiesea le fanauga a Reupena ma Kato mai o latou uso o i le isi itū o le vai. Samoa pele e, poo fea lava o e iai, e tasi lo tatou Faavae. Sa tu i Matagi Olo, o le Atimalala o le faigamalaga. Na ia fasia atua o le ala, ae taitai manuia mai Samoa i lenei tausaga. Se ā se mea e fai ma faailoga o lau faafetai? Fata faitaulaga, poo le faafouga o lou olaga? Se a se isi faailoga e sili nai lo oe? Ia fanaufouina oe i lenei Aso Sa. Ina ia tutupu a’e lau fanau, molimau lou toalua ma lou aiga, ua e ola i se olaga toefuataiina. Aleluia.

Fai oe ma faamau faailoga;  fai oe ma fata faitaulaga. Fai oe ma Molimau ola o aso uma i lou aiga ma tagata uma, o le ALII o ia o le Atua.

 

Ia manuia tele le Tausaga Fou.

Amene!

7737063/7783782

E-mail: petaiasetu@gmail.com

© Samoa Observer 2016

Developed by Samoa Observer in Apia