Na fa’ailoa e le tinā matua i a Malama Pesa, 70 le matua o le soifua o Tapatapaō le sologa lelei ai o vaega uma i totonu o le aiga.

“Ia e leai lava ni vaega se tele o lo’o i ai matou i  uta nei, e pei ona silafia ai , ia e le tele ni aiga i uta nei ae o le agaga fa’afetai o lo’o filemu vaega uma.

“O le Kirisimasi latou ma le Tausaga Fou ua ma’ea atu nei ia e leai ma ni pisapisao o onanā e pei ona masani ai i tausaga ta’itasi.

“Aua e pei o lea lava le fa’afitauli i uta nei, o onanā ae o le itu fa’afetai ia e le umi lava ona fai lo latou fiafia ia ona o fo’i lea ua momoe le fale.

“E masalo o lenei tausaga ai o timuga lea na fa’aitiitia ai lea tulaga ia masalo o le aveavea’i lea lelei mo si o matou pitonu’u.

Ua leva tausaga o nofoia e le tinā i a Malama ma le aiga Tapatapao. “Ia ae o le tausiga lava ia a le Atua, ia o lo’o sologa lelei lava mea uma.

“O lo’o fa’aaoga lelei lava le palapala e totō ai fa’i ma so’o se vaega e aoga mo le aiga, ia o lo’o ua fa’aaogaina le taimi lenei.

“O nei aso , ia a leai se mealelei ia e fa’alifu lava uma fo’i le aso latou, aua ua taugata le tele o oloa ma ua le tau gafatia e nai o tatou tagata. “E ui lava e i ai taimi e lelei ai ma leaga ai fo’i,  ia o vaega lava e tutupu i le olaga nei, ma ua masani ai fo’i.

“O le tele lava o aoga o vaega nei e pei o fa’afitauli ma lu’itau ese’ese ia e fesoasoani ai  i le aga’i atu ai le lumana’i aemaise le tausaga ua amatalia.

“Aua a leai fo’i ni mea e tutupu e le mafai ona foia ni fa’afitauli.

Sa ia fa’ailoa le taugata o le soifuaga o lo’o ua i ai nei, ae o le fa’alagolago lava i le Atua.

“Ia ua tatou molimauina uma nei vaega, ia ae leai lava se isi e tatou te maua ai le fa’amoemoe sili mo le tele o suiga e pei ona ua aga’i mai – ua na’o lo tatou Matai Sili. “I a te a’u ia, ia o lea ua tatou i ai lenei vaiaso o tatalo ma anapogi, ia e leai se isi itu e pito sili ona taua nai lo le tutu fa’atasi ma talosia si o tatou atunu’u.

“O lenei fo’i ua alo mai le 2017 , ia e le taumate le mau lu’itau ae o a’u lava ia na’o a’u e taua lava lo tatou fifilemu ma fa’atuatua.

“Aemaise ai nei vaitau ua ta’ua e nisi o vaitau o afā, ia talosia ia mamao ma i tatou nei mala fa’alenatura a ia sao le amataga o lenei tausaga.