Galue pea ia manuia aiga

Tusia Vatapuia Maiava ma Ilia L. Likou ,

94 Hits

Logo Fesola’i, 62 le matua o le soifua o Faleasi’u.

Logo Fesola’i, 62 le matua o le soifua o Faleasi’u. (Photo: Ilia L Likou)

O le togāla’au a le tinā i a Logo Fesola’i, 62 le matua o le soifua o Faleasi’u na ia fa’ailoa i le Fofoga o Samoa ua  savali nei le fa o tausaga o latou fa’atinoina ma le aiga.

“Ia e pei ona outou tagataga’i atu, e tailo fo’i i tupe e maua i isi vaega o le olaga nei pe tutusa ma tupe e maua mai i lo’u fa’atauina o fuāla’au nei e pei ona i ai mata  o le la, foketi, o’o ma isi lava.

“O lo’u ia lava olaga mai lava o lo’u laititi ia ou te fiafia lava i togāla’au, ma na fai lava i la aso aepeita’i na o’o se manatu i a te a’u i le fa tausaga talu ai ua tatau loa ona fa’atelē .

“O lea la e pei ona outou tau mai ai le aso nei, ia o lea toeititi afa eka o lo’o ua fa’aaogaina.

“I lo’u nofo ai i si o matou aiga ma le fanau, e pei e tau le alu tele so’u mafaufau i nisi vaega o le aiga, ae pei o se itu fiafia i a te a’u le usu mai i le togāla’au i taeao uma.

“Ia ma matamata i fugala’au ese’ese, ia a tele fo’i le ita i tamaiti , ia ua ou sau i la’u togāla’au aua e fiafia ai le loto pe a va’ai atu ua togo mai, ia ona uma fo’i lea o lota ita.

O le taimi lenei na fa’ailoa e le tinā e le’o i ai sona mafaufau e fa’atau i le maketi po o se faleoloa fugala’au o lana togāla’au.

“I a te a’u ia e sili lava le omai o tagata avatu ae o lo’o lelei atoatoa, nai lo le so’ona ta ave le maketi ae le mafai ona fa’atau e tagata ona ma’imau lea.

“Ia ua tele lava tagata ua tuli mai a’u nei ma o mai fa’atau atu vaega nei mo le tele o fa’amoemoe, ia  a lelei lava oka e omai e tusa lava ma le $300 le tupe maua i le aso.

“E pei la o taimi lava e tele ai le fa’atau o fono tetele a le E.F.K.S. ma le Metotisi, o vaitau na e le tau fesiligia le tele o a’u tupe e maua mai ai.

“Aua e le gata ina fa’atau fugala’au ae ou te fa’atauina fo’i la’au ta’itasi.

“O le tau o le fugala’au e $1 ae $30 le la’au , ia ma o la’u ia fautuaga lava e fai i le tele o tinā e omai ina ia taumafai e fa’atino vaega nei.

“Aua e tele lava le fesoasoani e maua mai ai.

“I a te a’u e ao lava ona galulue pea ia manuia aiga.

© Samoa Observer 2016

Developed by Samoa Observer in Apia