“E fa’avalevalea ma fa’atiga-loto”

06 January 2016, 12:00AM

Ripotia e Pai Mulitalo Ale

Fa’aliliu e Maiava 

 

Ua toe fa’aopoopo mai fo’i nisi faitioga e fa’asaga i le Komesina o Leoleo, Fuiavailili Egon Keil, a nisi o matai Samoa ona o ana saunoaga na fa’atusa ai faiga fa’amatai, i faiga fa’amiliteri (fa’afitafita).

Na ‘ilitata le tu’ua o Vailoa i Palauli, Mata’afti

 ‘Autagavaia Elia ina ua fa’ailoa mai lona finagalo.

“E fa’avalevalea tele lea lafoga,” o lana fa’aaliga lea. “E le sa’o lena mea.”   

Sa ia faitioina le Ali’i Komesina ona e le tele sona silafia o le fa’aMatai talu ai, “na fa’atoa matai ananafi”, o lana fa’aaliga lea.

“Ma le agaga fa’aaloalo lava, sa le tatau lava ona saunoa i mea e le o’o iai lona malamalama,” o le fa’aaliga lea a Mata’afā. “O le fa’atusatusaga na fai, e matua tiga lava i Samoa uma.”

Na ta’ua, sa tatau ona soifua Fui’ava i tulaga ma le faiga fa’ale-nu’u o lo’o fa’atino ai le fa’amatai ina ia na silafia lelei ai le fa’aSamoa.

Sa ia ta’ua fo’i le ‘upu; ‘O le ala i le pule o le tautua.” 

“’Ou te le talitonu ua saofa’i le Komesina o Leoleo i se fonotaga a se nu’u,” o lana fa’aaliga lea. “E tatau ona malamalama i le tulaga lena a’o le’i saunoa i mea ia.”

Na fa’ailoa mai e Mata’afā, o le fa’amatai, e fau i le tofa ma le moe, o saunoaga ma fetalaiga e faia i le aga-fa’aaloalo. O le aganu’u o lo’o fesoasoani ai i Leoleo i la latou galuega-fai.

“Ana leai le aganu’u, e matua faigata lava le galuega a Leoleo i le fa’amalosia o le tulafono. I tua i afio’aga ma alalafaga, e le popole tele tagata i Leoleo. Fa’atoa popole lava iai ona o le pulega a ali’i ma faipule o nu’u.” 

 “E tofu nu’u uma o Samoa ma tulafono, o faiga fa’avae fa’apea tapu masani ma fa’asalaga,” o lana fa’aaliga lea. “O le fa’amatai e fa’avae i tu ma aganu’u masani aua le soifua lelei o tagata uma, e lauliliu iai le tofa ma le uta, e fausia ai ma fa’amalosia tulafono nei, ina ia aloa’ia e tagata uma o le nu’u.

“E leai ni a tatou fana po’o ‘aupega e pulea ai afio’aga ma alalafaga. O le ‘aupega autu lava, o le tatou to’oto’o ma le fua aua e pei lava o ‘upu a failauga, “o le lauga a le faleupolu, o le pulufana e le ‘alofia.” 

Na fa’aopoopo mai fo’i Mata’afa, e tulaga ‘ese lava le aganu’u a Samoa.  

 “O faiga fa’afitafita e fasiotia ai tagata. E fai a latou fa’atonuga ona fa’atino lea e tagata peita’i i le fa’amatai, e leai. Tatou te le ‘avatua ni fa’atonuga malolosi fa’apea.”

E le’i mafai ona maua o se fa’aaliga mai le Komesina o Leoleo ananafi. Peita’i, o lana saunoga na faia e tali ai i se “tusi-fa’alilolilo” lea na laga ai nisi o tu’ua’iga o lo’o fesiligia ai le ta’ita’iga o le Matagaluega o Leoleo.

O lea tusi na tusia e se vaega o lo’o fa’amatalaina i latou, o “nisi o leoleo e manana’o e fa’aaoga tatau taimi ma tupe o lo’o totogia ai latou”, ma o lo’o fa’atuatusi I le Ali’i Komesina.

E tele tu’ua’iga o lo’o I lea tusi, fa’asaga I nisi o fa’atinoga ma le pulega o le ‘au’aunaga a leoleo. O le tasi o ia tu’ua’iga, o le fa’apea mai lea, o lo’o fa’agaioia e le Komesina o Fuiavailili le matagaluega e “e pei o se nofoaga fa’amiliteli.” 

I lana tali mai i lea tusi, na saunoa ai Fuiava, o le Vaega o Leoleo, o le mea moni, “o se vaega fa’aMiliteli.” 

 “E silasila toto’a lava iai I le fa’amatai, o lo’o fa’atamo’e pei o se militeli,” o lana saunoaga lea. “E iai le sa’o o le aiga e faia fa’ai’uga ma a faia loa se fa’ai’uga, e usita’i tagata uma.” 

Ae mo le Ofisa Lagolago i le Ofisa Sili a le Matagaluega o A’oga, Ta’aloga ma Aganu’u, o Papali’I Peone Fuimaono, na ia ta’ua, e le manuia ia saunoaga a le Ali’i Komesina. 

“Po’o le a lava le ‘auala na faia ai ia saunoaga pe na fuafua iai, ua toe lalaga mai ai le faigata o le talafa’asolopito tatou te le fia manatua,” o le fa’aaliga lea a Papali’i.

O le fa’amatai i lona finagalo, e tulaga-‘ese ai lava o tatou tagata.

 “’Ou te le fa’afinauina saunoaga ua faia pe sa’ilia fo’i se fa’amaoniga peita’i, ‘ou te lagolagoina le talitonuga, o lo’o galulue punoua’i le Matagaluega o Leoleo i le ‘autu, e Mo se Samoa Saogalemu.” 

Na ta’ua fo’i, o le fa’anaunauta’iga lea mo se Samoa saogalemu, ua loa tausaga ma e fa’alagolago tele i le tatou aganu’u ma le fa’amatai nai lo tulafono po’o faiga fa’aLeoleo.

“O le tulaga lava lea o le faiga o pulega ua leva ona sau ai ma ua fa’amalosia e faiga fa’amiliteli i taimi ua tuana’i a’o pulea Samoa e isi atunu’u,” o lana fa’aaliga lea.

“E le o le malosi o fana ma tulaga fa’apena, a’o le tofa ma le moe e tete’e malie atu ai aua se manuia ma le sologa lelei o le atunu’u.” 

Na ta’ua fo’I e Papali’i, ua malamalama lelei Samoa i pulega fa’amiliteli.

“E anoano o tatou tagata na maliliu ma afaina ona sa tete’e iai. O le mafuaga tonu lea na tu’ua ai e tua’a a’o le’i faia le Tuto’atasi, i le Palemene, le Pule atoatoa e faia ai tulafono mo lo tatou malo – i a’ao o matai o le atunu’u.

Na ta’ua fo’i,  ua silia nei i le limasefulu tausaga, ae o lo’o saogalemu pea Samoa ma avea o se tasi o nofoaga aupito to’amalie ma filemu i le Pasefika ma le lalolago i nei aso, ona o le fa’amatai.

 “I le toe tepa la i tua, o se Samoa Saogalemu, o se vala’au fa’ale-galuega ina ia tautua ma puipui o tatou tagata ma i le fa’atinoga o lea mau, o le puipuia lava lea o la tatou aganu’u ma aga masani aua e le maua lava se fa’amatai ma se fa’aSamoa i se isi nofoaga i le lalolagi,” o le fa’amanatu mai lea a Papali’i. 

“Mai lava i le amataga i le tala-fa’asolopito o le atunu’u, ua tatou iloa ai, e le o se faiga fa’a-fitafita ma o le tulaga lava lena tatou te iloa a’o aga’i i luma,  e amana’ia ma fa’aaloalogia o  tatou ali’i ma tama’ita’i leoleo, ma ‘avea iai lo tatou fa’atuatuaina ina ia malamalama.” 

E mulia’i nei fa’ailo finagalo o Mata’afa ma Papali’i, ae sa iai fo’i le fa’agau-le-malie o le Minisita o Tina ma Tama’ita’i, Atina’e o Nu’u ma Agafeso’ota’i, o Tolofuaivalelei Falemoe Leiataua ona o le Ali’i Komesina ma lana saunoaga, ma tapa ai se fa’ato’esega mai ia Fuiavailili. 

06 January 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>