Aloalo faia’oga Samoa mo le latou Fono Tele Fa’aleTausaga
E silia i le afe faia’oga mai tulimanu ‘ese’ese o le atunu’u o lo’o tapenapena atu mo le Fono Tele Fa’aleTausaga a Faia’oga, lea ua fuafua e faia i le Aso 18 ma le 19 o Ianuari 2016.
E amata le fonotaga i se Sauniga-Lotu i le Aso Sa 17 o Ianuari 2016, e talosia ai galuega a le Matagaluega o A’oga, Ta’aloga ma Aganu’u i lenei tausaga ma fa’amautuina ai lo latou fa’atuatuaga i le Mana o Le Atua aua fe’au ma galuega fa’aFaia’oga o le a alo atu iai i le tausaga fou ua savalia.
O le Fono Tele lenei a Faia’oga, o le vaega taua tele lea o le atina’eina o tulaga tau-A’oa’oga i totonu o Samoa, lea o le a ‘auai Pule A’oga ma faia’oga mai a’oga a le malo, a’oga a ekalesia ma a’oga tuma’oti i totonu o le atunu’u aoao.
O se tulaga aoga tele fo’i mo faia’oga e talanoaina ai atina’e fa’aauau i a’oa’oga, o lu’itau ma fa’afitauli ae maise o fa’atinoga ma fuafuaga aupito talafeagai e fo’ia ai ia fa’afitauli aua le aga’i i luma o a’oa’oga i le atunu’u.
O le ‘autu lea o lea fa’amoemoe, ina ia fa’aleleia atili tulaga tauA’oa’oga i Samoa nei e ala i le una’ia ma le faia o ‘auala e maua ai faia’oga aupito lelei ma talafeagai, o polokalame ‘ese’ese e lagolagoina ai a’oa’oga ae maise o le fa’aleleia o mea-fa’atino e fesoasoani ai mo le fa’aleleia o galuega a faia’oga i totonu o falea’oga uma i le atunu’u aoao.