Aga’i pea i luma

Tusia Ilia L Likou ,

55 Hits

ATINA'E LE AIGA: Lefauaitu Aitogi.

ATINA'E LE AIGA: Lefauaitu Aitogi.

O le taumafai ai e atia’e aiga o se itu taua tele lea.

O le finagalo lea o le tinā i a Lefauaitu Aitogi i le Fofoga o Samoa i le aso ananafi.

“Ia o le maua ai o le fesoasoani mai Malo Aufa’atasi e ala i le atina’eina o tua i nu’u ma afioaga ta’itasi o le a fesoasoani tele mo si o matou komiti aua lava  le atina’eina o aiga."

“Aemaise ai a matou fa’ato’aga togāla’au ‘aina."

“Ua leva ona galulue nai tinā i le tau atina’eina o aiga i vaega nei, ae o le maua mai ai o le fesoasoani o se itu lelei tele lea i a te a’u lava ia."

Na ia ta’ua o le tele o aiga o lo’o ua maitauina le tele o tupe alu mo fuala’au aina.

“Ia o lo’u ia iloa i ai, o le tulaga lava lea o le fa’amoemoe o lo’o ua atina’e e tinā o Samatau i fa’atoaga fuala’au aina."

“E fesoasoani ai le taugata o le soifuaga ua i ai nei aemaise lava le taumafai ai pea lea mo le lelei alu i luma o nai o tatou tagata."

“Ua le masino le mau mea i lenei vaitau, ae o le maua ai o nai fa’amama avega le taimi lenei, ia o le a fesoasoani tele mo nai o tatou aiga."

“O se itu e ao lava ona silafia ia e le mafai lava ona fa’atino se isi galuega e aunoa ma le ave i ai o lo tatou malosi."

“Aua o lenei fesoasoani ua mafai ona maua, ia o le a tele sona sao mo le a’oa’oina ai o nai tinā i lenei vaitau."

“O le itu mautinoa, o le tele lava o a tatou taumafaiga i lenei vaitau, ua faigata mea uma ona o le vaivai lava o le tamaoaiga."

“Ae o nai atina’e o togala’au aina ia o le a tele le tupe sefe mai ai ia aemaise le aoga mo le fofoga taumafa o aiga."

“Ia o tatou taumafai pea aua le lelei alu i luma o le olaga o lo’o ua i ai le taimi lenei."

© Samoa Observer 2016

Developed by Samoa Observer in Apia