Fesiligia le galuega a Malu-o-le-Malō

Tusia Vatapuia Maiava ma Ilia L Likou ,

136 Hits

Pa’ese Fiaui.

Pa’ese Fiaui.

O le aso ananafi na afea ai e le Fofoga o Samoa le tinā i a Pa’ese Fiaui, 60 le matua o le soifua o Nu’u.

Na ia fa’ailoa i lea fa’atalatalanoaga le mana’omia tele ai lea o lo latou pitonu’u le galuega a leoleo aua le tau fa’ato’afilemuina o le tele o vevesi o lo’o ua alia’e mai ai aemaise lava i fa’ai’uga o vaiaso.

O le fa’apisapisaō ma le so’ona talafo o upu masoā, na ia ta’ua o nisi nei o fa’afitauli o lo’o ua matua’i mana’omia lava se vaifōfō ona  o le faigata o le tulaga ua maitauina nei aemaise ona o le leai lea o ni pulega fa’amatai e mafai ona lima ta’ita’iina ai le tele o afio’aga i lea fo’i itu o le atunu’u.

“Ia o le galuega tele lea o lo’o faia i aso uma aemaise lava pe ā fa’alogo atu ua amata fo’i ona laulauvavale mai ni inuga i gatai atu i le magatolu, o le vili o leoleo....ae fiu e fa’atali.

“O la matou maitau i ai tusa e o’o loa i po o  aso Faraile ma le Aso To’ona’i...oka e tau le mafai e upu ona fa’amatala nei ituaiga amio...e ese ma le le mafaufau, ae pei o tupulaga talavou lava.

“ Ia na vili fo’i leoleo ona sa vevesi fo’i i le fa’ai’uga o le vaiaso ua te’a ma na taumafai lava e feso’ota’i leoleo ia a vili atu fai mai e fa’atali ae fiu e fa’atali.

“E pei o le fa’anoanoaga lava lea o lo’o i ai o le ‘au’aunaga e leoleo, aua ou te iloa e a’u e le tatau ona osovale se isi i ituaiga inuga malomaloā fa’apea ona lavea atu ai fua le tagata e le’i fai misa.

“E a la na fia maua se fesoasoani ona o le puipui fo’i i lo matou aiga ma lo latou saogalemu, o le agaga ia fa’afilemu ina ia aua ne’i pisa tele  ma o’o atu ai nisi tulaga e le’i fuafuaina.

Na ia fa’aalia e ao lava i matua ona  a’oa’i lelei fanau iana ia mafai ona pulea lelei a latou amio.

 “O lo’o silafia lava e aiga ae le mafai ona fai pe tautatala atu ai matua, ia e pei lava o le aso Faraile e totogi ai ia fai loa ma inuga nei.

“E  le lelei ni faigalotu aua o upu e talafo ia ua le talafeagai lava i le tele o taimi.

“Ia e pei o le tulaga lena ou te ofo lava a’u i nei matua, e le fa’alogo ai ni fanau, ia o le to’atele o tamaiti e i ai matua ae ou te leiloa se galuega o fai ai.

“Ia ou te iloa lava e le o nei matua ini  falesa ni Aso Sa ma o le mea lena e fa’apea ai latou fanau,  e pei a la o matua e i ai paū ai le tulaga lea.

“Na filemu lea o aiga ma matua i o latou fale ae matua’i mafatia ai lava matou i uta nei...ma ua le  saogalemu lava le mea lea ua i ai ona o amioaga nei a tupulaga.

“Ia pau lava le mea i a ma’ua ma si a’u fanau, ia e pei o le tausiga o le filemu ae e talosaga ai lava le ofisa o leoleo se’i tautuana le taimi e vili atu ai.

© Samoa Observer 2016

Developed by Samoa Observer in Apia