‘Uti’uti le suāvai maua

Tusia Vatapuia Maiava ma Ilia L Likou ,

127 Hits

Makerita Opapu.

Makerita Opapu.

Na fa’ailoa e Makerita Opapu i le Fofoga o Samoa le tulaga faigatā o lo’o ua leva ona feagai ma le aiga i le tele o tausaga i Levi Saleimoa, o le ‘uti’uti lea o le  suāvai maua.

I lea fa’atalatalanoaga na ia ta’ua ma le manino o lea fa’afitauli ua ‘avea lea ma faigatā i le feoa’iga i le tele o aso e taumafai e sa’ili mai ai i tai i le ‘a’ai se suāvai maua mo lo latou aiga.

“Ia o le taimi lenei, ia o lo’o i ai kalone o lo’o o matou fa’aaogāina ma nai fagupa’u ia ae alu alu uma le malosi o vaega nei pe ā fa’apea lava lea ua tuai ona sua mai o le vai.

“E mo le silafia ai e pei lava o le fa’afitauli lenei o lo’o feagai ma i matou i  uta nei o le suāvai ona o le tele o aso e le ola mai ai le paipa.

“Ia o nisi lava vaiaso e fiu e fa’atali le taimi e ola mai ai ma e le faigofie lea i a’i matou.

“Ia e faigata tele le  tau la’uina mai o le suāvai i le tele o taimi aua e fai sina maomao i tai, ia a leai se ta’avale ia pe a ma le afa itula e la’a ai mo le  tau aumaia o le suāvai.

“O le agaga lava ia o lo’o taumafai i ai ia vave ona i ai se suiga o le ola mai o le suāvai i le tele o aso.

“O le tulaga  lava ia o le pologa tele lea  o lo’o feagai ai i le tele o aso ae fa’afetai o lo’o i ai le ta’avale a si o’u uncle o lo’o tele ina fesoasoani mai i le la’uina mai ai o le suāvai.

“E pei o lea le tulaga faigatā ona e fai sina to’atele o si o matou aiga, ia e mana’omia lava le suāvai i le tele o taimi, ae fa’afetai fo’i o lo’o i ai kalone o lo’o lavelave tu mai le tele o taimi mo se suāvai aemaise lava pe ā timu.

“Ia e manaia lava i uta nei, ia a leai lava ni tupe ma ni galuega ae lea e tetele fanua mo le tōtōina o fuala’au ‘aina o talo ma fai.

“O la’u ia maitau i ai e filemu lava le tele o aso, ia ae pei o lo matou aiga ia e to’atolu i latou o lo’o faigaluega, o mea’ai ma  mea o le nu’u ma le ekalesia o lo’o tele ina alu ai tupe i le tele o taimi tupe o  si o matou aiga.

© Samoa Observer 2016

Developed by Samoa Observer in Apia