O le talitonuga lea o le ali’i talavou i a Molesi Matagi  o Vaitele-Uta i le Fofoga o Samoa i le aso ananafi.

 “O le a’upega e pito sili ona malosi ai so’o se tupulaga talavou o le to’aga  i le tatalo ma ia fa’amaoni i so’o se galuega ua maua ma ia iloa o ia o le talavou.

O Molesi  ua savali i le tolu tausaga o  galue i le ‘eleiina o so’o se itua’iga mamanu o ‘ie  aua le fa’atauina atu i  le mamalu o le atunu’u.

“E mana’omia e talavou ona faia ni filifiliga lelei ina ia aua ne’i inoino se isi i lona olaga talavou ma  o le  agaʻigaʻi i luma o le ola o le mafai ai lea ona o latou faia o ni suiga auā le lelei.

O fea na amata mai ai lou iloa ma lou silafia i lau taleni?

“O le aoga lava lea o le to’aga e alu i le fale o le faife’au , aua e pei o i na amata mai ai la’u taleni ma ou iloa fa’atino le elei ina ua a’oa’oina a’u e lo matou faletua i a Tauvela i le fa’atinoina o lea fo’i galuega.

“E pei o le fa’aaogaina o vali, o le suiina o vali, o le a le ituaiga ‘ie e aoga ai lea vali ma lea vali, ia lea la ua alualu ua ou va’ai atu lava a’u ia , e tele se aoga mo lo’u lumana’i.

“Ia o se fiafiaga i a te a’u ina ua ou iloa olo le elei ma ou va’ai atu ua tino mai, aua e tele lava galuega na uma la’u aoga o’u alu ai, ae pei e alu alu nofo.

 “Ae sa le mapu ai lava le taumafai pea e su’esu’e se galuega.

 “Ia o lea ua maua ai a’u tupe, ma ua fesoasoani tele mo le atina’eina o nai vaega laiti o le aiga aemaise o le tele o le mau fa’alavelave.

“I lo’u lava ia iloa i ai, o le a le taleni ma agava’a ua maua, ia o le talavou lava ia i le fa’atamala e ala ai ona le aoga i a te ia.

“Aua na amata loa ona ou iloa fa’atino le ‘elei, ia o le taimi lenei, o lo’o o’u titilo i le fa’aauau ai pea mo le lumana’i.

“A alualu fai so’u to’alua ma sa’u fanau ia ou te iloa o le a fa’aauau pea le  ‘elei aua se lumana’i manuia.

“E leai lava se isi ki ma le tatala o le manuia ai o so’o se taumafaiga, e pei o  le fa’amaoni lava ma usita’i i le tinā ma tamā.

“Ia iloa  fo’i e le talavou lona tiute i fafo ma totonu o le aiga, fale o le faife’au, so’o se mea e alu i ai, o lona aoga i so’o se vaega  o lo’o galue ai.

O a ni fa’afitauli o lo’o feagai ma oe le tele o aso i le galuega?

“Ia o le fa’afitauli masani lava, ona o le amio lava ua masani ai nai o tatou tagata, o lae silafia o lea fo’i e ala ona ou sau e ‘elei o le fia maua o sa’u tupe ae omai fo’i mana’o e elei fua atu a latou ‘ie.

“Ia o nisi ua uma na ‘elei ae fiu e fa’atali se totogi, ia ae tu’u ai lava le avanoa atonu e alu alu se taimi tu’u.

“Ae o lea le lu’ita’u i so’o se talavou, ia fa’amaoni i taleni ma agava’a aua le tausiga o aiga...ia  o le fa’amaoni lava i mea iti.