O uiga o le soifuaga
E tutusa lava lou faigaluega ma lou alu e fai le ma’umaga.
O lea le talitonuga o Pisu Sio o Faleasi’u i le fa’atalatalanoaga ai ma le Fofoga o Samoa i le aso ananafi.
“Ia o a’u na ou faigaluega muamua ma o le taimi lenei ia o lea ua nofo lava e fai le ma’umaga ma o le itu lelei tele lea i lo’u iloa i ai.”
“O le itu mautinoa ia e fiu lava le mea e toe fai atu nei aso ua leaga lava, ae a nofonofo loa ua atili ai ona fa’aletonu.”
Na ia fa’ailoa o le itu mautinoa lava e mafai ona fesoasoani i mafatiaga ua i ai aso nei, pe a galue malosi.
“E pei o lea lava le mapusaga o lo’o ua i ai le tele o nai o tatou tagata, o le va’ai lava o le mea lelei aua le atina’eina o aiga.”
O le isi tulaga na ia fa’ailoa o le tele ai o tagata o lo’o su’e galuega. “O lea lava le tulaga ua i ai le taimi lenei ua tele tagata ae ua leai lava ni vaega e mafai ona fesoasoani ai lenei vaitau o le oge.”
“Ia e leai lava se isi tali, o le ma’umaga lava e pei ona ua i ai nei a’u ia.”
“E pau lava le tulaga mautinoa i ma’umaga ia e matua’i leai lava se fesoasoani e maua mai tupe o saofaga ma le A.C.C.”
“Ae mo a’u lava ia o le taimi lenei o lea lava le olaga o lo’o ua i ai nei, o le tala faigofie, o le ola lava a ia iloa ona ola.”
“Ae le’o le ola e fa’alagolago i isi tagata ae o le itu sili o le galue
lava ma fa’atatau le ola ma le soifuaga i mea ua mafai ona o tatou maua ona lelei ai lea o le gasologa o le soifuaga.”
Na ia fa’ailoa o le taimi lenei o lo’o sologa lelei mea uma i totonu o le afio’aga se’i vagana ai le suavai maua i nisi o aiga.
“Ia ou te iloa ole fa’afitauli lava lea ua i ai le taimi lenei i le tele o afio’aga o le suavai lava.”