O le laufofoga fiafia lava!

Tusia Vatapuia Maiava ma Ilia L Likou ,

369 Hits

Ioelu Siamani o Siumu.

Ioelu Siamani o Siumu.

O Ioelu Siamani o le afio’aga o Siumu ua silia nei ma le sefulu tausaga o  galue o se tasi e malaga ma turisi pe ā taunu’u mai i le atunu’u ma fa’ailoa i a’i latou nei tu ma aganu’u a Samoa.

O se ‘au’aunaga na ia fa’ailoa le taua tele aua o le amataga lea o le silafia ai o le tele o i latou e malaga ma i Samoa po’o turisi fo’i i le soifuaga o lo’o fa’avae ai le atunu’u i aso uma.

Na ia fa’ailoa i le Fofoga o Samoa e leai lava se isi itu e fa’atosina mai ai le tele o  turisi i le atunu’u - o le laufofoga fiafia lava!

“Ia o le mea muamua lava ua le tau fesiligia le tulaga e pei ona ua ave ai nei le fa’amuamua o lo tatou atunu’u - o turisi po o’i latou e tafafao maimoa mai.

“O lo’o fia asia mai si o tatou atunu’u ia...ia e pau lava la’u fautuaga mo i latou o lo’o fia silafia le tele o vaega o lenei ‘au’uanga o le feagai ai ma turisi, ia si ata’ata lava ma ia laufofoga fiafia.

“O a’u ua leva ona ou auai i le galuega lenei, ma e ese lo’u fiafia i ai.

“E  mafai ona sau le palagi ma alu matamata i le tele o nofoaga ia e leai se uiga pe afai e leiloa po o fea na afio’aga, po a fo’i uiga o na nofoaga.

“Ia o le isi tulaga e ao ina manatua lelei o turisi o lo’o asia Samoa e le’o omai e a’o’oga, e ala ona afea Samoa e fia tafafao ma i le matagofie o le atunu’u.

“A o’o la i le taimi e taumafai e fa’ailoa le tele o vaega mo le silafia e’i latou nei ia e tatau ona i ai sina ata, fa’ailoa atu ai le fiafia.

“Aua e uma o turisi ma fai atu i isi turisi e ese le fiafia o le aganu’u a Samoa.

“O le feau e ao lava ona taumafai i ai, ia o le lau fofoga fiafia lava i turisi aemaise le moni o le aganu’u  o si o tatou atunu’u.

“O nisi ia o tulaga o lo’o ese’ese ai ma atunu’u i fafo.

O le itu taua lava i a te a’u o le auala e te kiliva  ai , ia ave i se auala fiafia, e le gata e sau le palagi o lo’o fiafia i le aganu’u ae o le auala e ave ai le fe’au e iloa ai i le tele o tagata o le lalolagi.

“Aua e tusa lava pe lelei le faletalimalo ae a oti le ‘au’aunaga....ia e ma’imau le taimi, o tatou uiga fa’aalia o se vaega e taua tele ma o se itu lelei tele o le taumafai e tumau i tu ma aganu’u....e leai se isi vaega taua nai lo le aganu’u a Samoa.

© Samoa Observer 2016

Developed by Samoa Observer in Apia