Ia felagolagoma’i

Tusia Vatapuia Maiava ma Ilia L Likou ,

142 Hits

Ioana Schsuter.

Ioana Schsuter. (Photo: Ilia l Likou)

O le galulue ai o tinā ma tama’ita’i o so’o se afioaga fa’atasi ai ma matai, o se itu na fa’ailoa e le tinā i a Ioana Schsuter o Vailele le avea ai lea ma auala e faigofie ai ona tauamo se avega.

O lona finagalo na fa’ailoa i le Fofoga o Samoa o le pitola’au a tinā i totonu o so’o se afio’aga, ekalesia ma le atunu’u, o se ‘au’aunaga taua tele.

“O le pitola’au lava a tinā o le afioaga o lo’o gafa ai i aso uma ia o le fa’amaopopoga , aua e mo’i lava i tamā ae o tinā e tapenaina nu’u ma afio’aga ta’itasi aua le lelei alu i luma o so’o se taumafaiga.

“Aemaise lava i taligamalo ma le itu lea i le fa’amamaina o totonu o afio’aga i aso uma.

“ Ia o fa’afitauli o lo’o feagai ai i le taimi lenei o le tapenaina ai o tamaiti aoga aemaise o fa’alavelave o le aiga aua e le misi le fa’atinoina o ia vaega taua nei, ia o nisi o taimi ua ote le tamā pe a  omai umi matou nei i mafutaga a tinā , ia o le isi fa’afitauli ia o le le auai mai o nisi o tinā pe a talo fonotaga.

“A fai saoga ia e le tele lava ni tupe e sao.

“Aua e  ta’i $5 e ao i masina ta’itasi aua ni mea fai o le nu’u ae o lo’o fesoasoani mai fo’i fa’alapotopotoga mo le atina’eina o tinā nei.

“E ova ma le 200 le to’atele o tinā o lo’o i totonu o le nu’u, pe a fa’apea o i ai nai taligamalo ua vavave mai, ia e ta’i $2 e sao…e o’o atu lava le $1 aua o lea e to’atele.

“O le vaega lava lea e titilo aga’i i ai, o le fa’amamaina o le vaipuna o lo’o inu mai ai lo matou nu’u, ia o le isi itu lea o lo’o fa’amamaina i le taimi lenei, o lo’o ave ai le fa’amamafa ma  titilo ai  le mafutaga a tinā…ia o faiganu’u lava e malu ai afio’aga.

“O matai lava e malu ai fo’i matou i le tele o taimi aua e i ai fa’afitauli e tula’i mai, ia o le galulue fa’atasi e mama ai se avega.

“O a fo’i lava ni fa’afaigata e feagai ai o le taumafai lava e talatalanoa ma soalaupule le tele o vaega. 

© Samoa Observer 2016

Developed by Samoa Observer in Apia