O le toe amataina ai o le fa’atauina e le tinā i a Le’iasina Samu o fuala’au ‘aina i le tausaga ua mavae o se fiafiaga tele lea i a te ia.

O Le’iasina o lo’o auai i se fa’alapotopotoga lea o lo’o mafai ona tu’uina atu  i tua nonogatupe mo le mamalu o le atunu’u aua le amataina o a latou pisinisi laiti.

Na ia fa’ailoa i le Fofoga o Samoa lona agaga fa’afetai ona o le tele o le sao taua o lea nonogatupe mo pisinisi i le atina’eina o lona aiga, aemaise ai  tupe fa’asili mo nisi o vaega mana’omia.

E  ui na i ai tausaga na amata ai ma toe tu’u ae na malosi lava lona finagalo i le toe amataina ai le 2015.“E tusa sa fai la’u nonogatupe lea e fai mo le atina’eina o aiga ma amata ai loa le pisinisi nei.“Ia o isi mea e aumai i fa’ato’aga ia ma fa’atau mai le maketi  ia na’o sina si’i mo sina tupe fa’asili.

“Aua le fesoasoani ai mo aoga a tamaiti, ia pei o le Aso Sa ia e $300 i le $400 le tupe ou te u’uina, ia o le Aso Sa fo’i ia na’o le taeao lava e tatala ai, e pau lava lena o le aso e tapuni i le aso atoa se’i vagana le taeao mo fa’atauga.

“Ia o fafie ma malala isi tupe maua lelei a le maketi, a o’o lava i le taimi e lelei ai le fa’atau o le aso ia e $150, tusa la a fai le fa’atau mai le maketi ia pe na’o le $50 le tupe e fa’aalu ia ae toeitiiti o’o le $100 le polofiti ma te mauaina.

“I a te a’u lava ia o lo’o sologa lelei le tau o le soifuaga ia ma o le taimi lenei ia e leai ni fa’afitauli tele iinei , ia a tele lava  fuala’au ia ua fa’aaoga fo’i mo mea’ai a le aiga.

Ia na amata la’u maketi i le 2010, ina ua ausage fo’i le aiga ma nisi o fa’alavelave ia ona tu’u loa lea, ae na toe amata i le tausaga ua mavae lea la ua alu ai lava i le taimi lenei.

“Ou te iloa ua matua’i tele la’u tupe fa’asili o lo’o ua maua mai i a’i latou nei.“O le tele lava o fa’atau o tagata e omai i a latou ta’avale, ia ae mo’i lava i le afio’aga nei e tau leai.