Fa’amalō lava ile faigamalō

By Sarafina Sanerivi 05 September 2016, 12:00AM

O Tofālagi Samuelu mai le afioaga o Falevao o lo’o matuā fiafia tele i le manatu mai le malō ina ia toe una’i tagata ina ia toe atina’e le fai fa’ato’aga i Samoa. 

Fai mai lana fa’aaliga, “Ua matuā manaia tele lea lu’i.

“Ou te matuā lagolagoina lenei manatu auā e tele ma anoanoa’i tupe e maua mai i fa’ato’aga. 

“O fa’ato’aga fo’i na fa’alagolago i iai o tatou tua’ā ma o le ‘ā maimau pe a lē galueina.

“E mafai ona maua mai ai tupe mai fa’ato’aga ma ou te fa’afetai ile malō mole una’ia o lea tulaga. 

“E to’atele lava i latou ua fa’apea mai o lo’o ola matitiva tagata Samoa. Ae o a’u ou te auai ai i lea manatu auā fo’i o lo’o iai lau’ele’ele ma le sami e fa’alagolago iai mo mea’ai. Amu’ia I tatou o lo’o iai fanua ma ele’ele e mafai ona galulue sa’oloto ai. 

“O le to’atele e le’o fa’aaogaina tatau o tatou fanua. E mo’omia le toe amata ona toe fai ma’umaga auā e tele lava le tamaoaiga e maua mai ai.

E aogā fo’i e fesoasoani ai ile atina’eina o aiga. E mafai ona totō fa’atoaga mo le fofoga taumafa ole atunu’u ma su’e ai foi seleni. E fa’apea fo’i ile sami. 

“O meaalofa uma ia mai le Atua mo i tatou, ae a tatou fa’atalalē loa iai ma fa’alagolago I mea’ai mai fafo ma fa’atau mai le faleoloa, ona tupu loa lea ole oi. 

“E moomia le fa’aaoga tatau o tatou fanua.”

Na ia viia foi le faigamalō mo galuega lelei ile atina’eina o le atunu’u. 

“E tō lo’u pulou ile afioga ile Palemia ma lana Kapeneta mo galuega lelei auā le atina’e o Samoa. 

“Ua fa’aleleia le soifuaga o tagata ona o atina’e ese’ese ma o lo’o manuia uma ai le atunu’u mai ia atina’e.

“Fa’ata’ita’iga, ua mananaia auala ile tele o vaega ole atunu’u, ua tele ina fou faleaoga, o falema’i ma isi. 

“O mea e le’i iai I tausaga ua mavae ma o le ala lea ou te fiafia ai ile malō. E mo’i lava e ‘ese’ese le olaga i tua nei ma Apia, ae ua tele lava ina tutusa mea o lo’o i Apia ma tua nei.”

By Sarafina Sanerivi 05 September 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>