Fa’aali le le-fiafia o le ‘Aufaipisinisi i le Flea Maketi

By Fa’aliliu e Maiava 05 August 2016, 12:00AM

A’o fa’atalitali pea mo se suiga lelei mo le aga’i i luma, o le to’atele o le ‘aufai-faleoloa i le Flea Maketi i Savalalo ua tau le-lava onosa’ia faiga fa’atigaulu a le malo. O le nofoaga le-tumau o iai nei le maketi, o lo’o fa’amalumalu pea e fale-‘ie tetele mo le ‘aufai-pisinisi ma a latou oloa, peita’i ua matua pa’u maulalo le numera o tagata-fa’atau.   

 “Na fa’atau lava a matou oloa i’inei talu mai le 2002. Ae le’i tupu le mu lea na mu atoa ai le maketi ia Ianuari, sa feololo lava a matou fa’atau sa maua. A’o lenei vaitaimi, ua matua le toe tutusa lava,” o le talatala le-fiafia mai lea a Tasi Sione mai ‘Ululoloa. 

E fai fa’atasi le la pisinisi ma lana uo o Ului Lalomilo mai Vailele, e i le tulimanu mulimuli o le maketi. Na ta’ua e la’ua, ua matua leaga-faia lava le pisinisi i nei aso, e le gata ua tele faleoloa, a ua matua pa’u maulalo turisi e asiasi atu ma tagata-fa’atau e maua i le aso.

 “’Ou te iloa lava e mafua ona o le fale’ie. E le-lelei mo faleoloa ma poloka ta’itasi,” o le fa’amatalaga lea a Sione ma tusitusi le a’ao i fale’ie pupu e ta’u mai ai le fa’aletonu tele o le malo, i le le-faia o se fuafuaga lelei e fo’ia ai ia fa’afitauli.

“A o’o ina timuga, e matua palavivi a matou oloa nei. Na o si tama’i avanoa la’ititi lea e teu ai a matou meataulima, ae le-taitai lava avanoa ma le-lelei fo’i, e le pei o aso e le’i tupu le mu.” 

O le finagalo o Tasi, e matua mautinoa lava le mo’omia o se fuafuaga lelei i le taimi nei: “E tatau ona iai o se nofoaga lelei, pei o le maketi sa iai muamua. E tatau lava ona sili atu i lo le mea o iai nei. Pau le mea lea e fai mai ai le malo, o le matou fa’atalitali se’i fai se fa’ai’uga lelei mo le faia o se fale-mautu. Lea ua silia ma le fitu masina o fa’atalitali pea e o’o mai i le taimi nei. Ae fa’anoanoa ai lava ona e leai se isi mea e mapu iai, aua matou te mo’omia fo’i se tupe mo matou aiga”.

By Fa’aliliu e Maiava 05 August 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>