Tusi O Le Fa’atonu - O le pese o le tama’ita’i o Elekina, e le o Eleitino

452 Hits

Afioga Mataafa Keni Lesa

Faatonu 

Observer Nusipepa

 

Afioga e, 

 

MATAUPU: FA’AMALAMALAMAINA MA FA’ASA’OINA LE PESE I LE TAMA’ITA’I O ELEKINA, UA SUIA IA ELEITINO. 

E muamua ona fa’atulou atu i le pa’ia ma le mamalu o Samoa atoa mai Saua e o’o atu i Agalega. E fa’atulou atu fo’i i le mamalu o Samoa o lo’o afifio ma alala i so’o se itu o le lalolagi o lo’o mafai ona ona mauaina lenei tusitusiga. Ae le gata i lea a’o le pa’ia o le au fa’afofoga o lo’o fiafia e fa’afofoga i pese ma fatuga a Samoa. 

Matou te talitonu ua le o toe po Malae i le fa’afofoga’aga a le atunu’u i fa’asalalauga i le si’ufofoga a Samoa 2AP, le fofoga fa’asalalau o le FM Radio aemaise le TV1 a Samoa i le susuga ia Eti Taualapini o Malifa ma Niu Sila. 

Sa mata’ituina taualumaga uma o lenei mataupu ona o le manatu i suafa mamalu o afio’aga ua afaina fua ona o le le fa’autauta lelei o le tofa a le na fa’atinoina lenei mataupu. 

Ua a’e ai nei se manatu ua alagatatau ona fa’ailoa, fa’amalamalama ma fa’asa’oina le mataupu e uiga i le pese i le tama’ita’i o “ELEKINA”, ina ia nonofo malamalama le atunu’u ma ‘ia fa’amutaina le sese o lo’o ua ta’ita’i seseina ai le mamalu o le au fa’afofoga. 

O le fa’amalamalamaina lenei o le Mataupu autu:

(1) O le pese a le Aufaipese: TAMA VAIALA, i le tama’ita’i o le Vaimauga o lona suafa o ‘ELEKINA’

(2) Igoa o lenei fatuga o le “FILIFILI AURO”

Ua pu’eina e Eti Taualapini ma ua suia ai le suafa o le tama’ita’i o lo’o autu iai le pese i le afioga ia Eleitino; o lea fesuia’iga e aunoa lava ma se fa’atanaga aloa’ia fa’a le tulafono mai i ai matou e ona lea fatuga (copyright). Fa’amautuina e le Tulafono Toe Teuteu a le Palemene o Samoa “Pule tau Fatuga 1998 Nu, 25”.

E le gata o lo’o i ai mau maumaututu, o le atoaga o le galuega o lenei fatuga o lo’o teuina malu e le Aufaipese a Tama Vaiala, o i latou fo’i e ona le meatotino. 

Ia manuia tele lau fa’asausauga Samoa.

 

Muliaga M Mamaia ma le Aufaipese Tama Vaiala

© Samoa Observer 2016

Developed by Samoa Observer in Apia