O LA’U TALA FO’I

89 Hits

1. Matauina i Tala Fou fai mai ua faamaonia e le Pule ma Su’etusi Sili-o le a faagasolo ona tagofia e le Palemene ana lipoti mai le 2013 e o’o i le 2016-o lona uiga-e le o faagaloina pe faapea ua salu i lalo o le fala….!. E ui lava la ina o loo to’esea Fuimaono i atunuu mamao-ae na ia tuuina mai se faamaoniga i fesili na tuuina atu e le Samoa Observer. O ia la lipoti a le Pule ma Su’etusi Sili-ua uma ona faataatia i luga o le Laulau-a-fono a le Palemene- mo le 2013, 2014, 2015 ma le 2016.

O ia la lipoti e aofia ai Matagaluega ma Faalapotopotoga a le Malo. Sa faamanatu mai foi e Fuimaono e faapea o le Lipoti a Alii Ofisa o le Palemene e faasino i ia lipoti i le Palemene mo le 2010 ma le 2011-na tuuina atu i le 2014. Na toe ta’ua foi e le Pule ma Su’etusi Sili e faapea o tali a le Malo e tusa ai ma le Lipoti a Alii Ofisa o le Palemene-na aofia ai ni faiga ma ni fuafuaga e toe faaleleia ai ia mea faaletonu-ma o ia tali na tuuina atu i le 2014….!

Ia-o se tala umi lenei tala-ae faigofie lava le fesili-“O le a le pogai e musuā ai le Malo e Iloilo ma fai se tonu i mea mataga ma le mata’utia na lipotia e le Pule ma Su’etusi Sili? Afai la e musu le Malo e faaaoga le tautiga o le Pule ma Su’etusi Sili e tusa ai ma lana mataioi faale-tulafono-o le a la le aoga e saga fai ai le Ofisa o le Pule ma Su’etusi Sili? A faapefea faiga faavae o faigamalo ia-ua uma ona faata’oto e pei o le “faimea tonu”-“mautali atu” ma “faigamalo lelei”?

O lona uiga ua sui e le HRPP faavae o faigamalo faa-temokalasi na fai e matua? Afai la e ala ona augata le Malo e Iloilo lipoti a le Pule ma Su’etusi-a faapefea la le lagolagi o faiga pi’opi’o a le faigamalo-ia ua maumau ai le faitau miliona ma miliona o tupe a le atunuu? Faamata e matitiva faapenei tagata Samoa pe ana le faamaumauina e le faigamalo lea anoano o tupe? O le a sou taofi? 

2. Matauina foi i Tala Fou se ulutala fai mai-“Ua teena e le Pule o le Falepuipui-tala o loo feavea’i nei-ma o loo aumai ai ma le ata o le alii pagota mata’utia o Lauitiiti Tualima-faatasi ai ma le faamatalaga-“e le’i sola i tua.” O lona uiga la-o se tala sese lea tala. Fai mai e anoano tagata na telefoni atu e uiga i lea tala sese. E o’o lava i le Minisita o Falepuipui-na ia ta’ua foi le anoano o valaau e ala i le telefoni-na o’o atu ia te ia- e uiga i lea mataupu!

Ia-e faapena lava le amio a isi tagata-a vaai atu ua to’afilemu mea uma-ona taumafai lava lea e fai se tala pepelo e faapopole ai tagata. Ae ui o lea-o lea lava ua faamaonia e le Pule o le Falepuipui-e leai se mea faapena o tupu! O lona uiga la-e leai se mea e ono popole ai fua le atunuu-o loo i aao pea o le Pule o le Falepuipu ma lana aufaigaluega le vaaia lelei o lea pagota pe afai ua fai lea alii ma mea tau faamata’u i le atunuu! O le a sou taofi?

3. Matauina foi i Tala Fou se folafolaga a le alii fusu o Samoa o Lupesoli’ai Joseph Parker –e faapea o le ana toe aumaia i Samoa ma Niu Sila fusuaga a siamupini-ae o le a ‘ou alu muamua i fafo-ina ia outou mitamita ai. Faafetai tele mo la outou lagolago ia te a’u. O lea la folfolaga e faapea na fai e Lupesoli’ai i le Fale Taalo i Tuana’imato i le Aso Toana’i ua mavae-lea na faa-talanoa ai e le Faatonu o le Samoa Observer-o Mataafa Keni Lesa-o ia foi lea sa avea ma talimalo-mo le Vailima Corporate Fight Night.

Sa faaalia foi i lea po le fiafia o Lupesoli’ai ina ua mafai ona toe taliu mai i Samoa mo se vaiaso se tasi. Sa maua foi le avanoa e una’ia ai e Lupesoli’ai tupulaga talavou mo lea taaloga. Fai mai o lana fe’au e faigofie lava-“Ua ‘ou vaaia le tele o tupulaga talavou talenia i totonu o Samoa. E pei lava ona fai mai le toatele-sa “masani ona ave e Samoa pine auro uma i aso ua mavae ona o le taaloga o fusuaga-ae o le taimi nei ua fai sina se’e i tua.

O le mea uiga ese le vaai atu i le tele o le lagolago- mai laufali ma i latou e aafia i lenei taaloga. O le mea lea e tatau ai ona tatou lagolagoina ma una’ia i latou-tuu atu ia i latou le avanoa ma mea faigaluega e faatino ai……Ia –e ma’eu le tau lagalaga i mea lelei o lenei alo o le atunuu-ma afai la e maua le lagolago e pei ona ta’ua e Lupesoli’ai-o lona uiga la-o le a toatele foi isi Lupesoli’ai faaopoopo! O le a sou taofi?

© Samoa Observer 2016

Developed by Samoa Observer in Apia