O’o i le Soifua Maloloina le su’esu’eina o se taumafa (pai) na maua ai se atualoa i totonu

Tusia Fa’aliliu e Maiava ,

164 Hits

PAI-ATUALOA: Atualoa sasa’o na i totonu o se pai mai se tasi o fale’oloa i Apia.

PAI-ATUALOA: Atualoa sasa’o na i totonu o se pai mai se tasi o fale’oloa i Apia. (Photo: Loimata o Apaula Wendt)

Ua lafo atu nei i le Matagaluega o le Soifua Maloloina, le su’esu’eina o le mata’upu e uiga i se pai na fa’atau mai i se tasi o faleoloa i le taulaga, na maua ai se atualoa i totonu.

O lea mata’upu na fa’ailoa e Loimata o ‘Apa’ula Wendt, e fa’apea sa fa’atau  lana pai mai le supamaketi lea i Apia i le vaiaso talu ai. 

Sa taumafai atu le Samoa Observer mo se fa’amatalaga mai le Matagaluega o le Soifua Maloloina, peita’i e le’i manuia.

Peita’i na ta’ua e lea tama’ita’i – e faigaluega i le taulaga, na matua fa’ate’ia lava o ia i lea mea. 

Na fa’amatala e Loimata o ‘Apa’ula,  na fa’atau le pai i le taeao po’o le ‘afa o le iva ae fa’atoa ‘ai i se mea o le tolu i le aoauli.

“O le faleoloa lava lea e fa’atau mai ai a matou pai, peita’i o le aso lava lea, ua fai si matou pisi tele, na tu’u ai la’u pai i totonu o le pusa’aisa,” o lana fa’aaliga lea. 

“Pe o le ta o le tolu i le aoauli ina ua te’a le pisi, na fa’ato’a ‘ou alu ai loa ‘aumai le pai ma fa’avevela i le masini (microwave).

 “Na vevela loa ‘ou tago ‘aumai, ‘ai le isi pito, ae ‘uma le ‘afa o le pai ae ‘ou va’aia loa se mea uliuli i totonu, na ‘ou fa’apea lava o se fasi-kapisi, ae leai, e sese la’u va’ai ma le iloilo atu, o se atualoa.”

E le tau fa’amatalaina, ae na matua oso le ‘ino’ino o Loimata o ‘Apa’ula ma uma sa’o ai ma le fia ‘ai. Na ia faitioina fo’i le le-tali lelei atu o le faleoloa, ma tu’ua’ia i le le-agava’a o tagata faigaluega, ae maise lava, i le tulaga fa’aletonu fa’apea.  

Na feso’ota’i atu mo se fa’aaliga, ae saunoa mai se tasi o le supamaketi, ua lafo atu nei le mata’upu i le Matagaluega o le Soifua Maloloina. Na ta’ua fo’i, o tulaga mama lava ma le saogalemu o lo’o fa’amamafaina i la latou ‘au’aunaga ma e fa’atauaina fo’i le ‘au-fa’atau o le atunu’u. 

 “Na matou fa’amalulu atu lava iai ina ua telefoni muamua mai,” o lana fa’aaliga lea. 

Na ta’ua fo’i, sa o’o atu lava i le tamaita’i le-fiafia o Loimata o Apa’ula i lona falefaigaluega peita’i e taunu’u atu, ua iai sui o le Soifua Maloloina. 

 “Na matou o’o atu lava iai i le aoauli lea ae ma taunu’u atu, ua iai sui o le Matagaluega o le Soifua Maloloina, ma ua iai nei la i le Matagaluega le mata’upu,  ma o le a matou fa’atalitali lava iai po’o le a se mea o le a tupu.

 “Ae na ona matou fa’amalulu atu lava, e leai nisi upu i luga atu o le FA’AMALULU  ATU”.

© Samoa Observer 2016

Developed by Samoa Observer in Apia