Manatu O Le Fa’atonu - O se mea na tupu e ao ina manatua. O se faafetai lea i tagata galulue mo le soifua maloloina

Tusia Mata’afa Keni Lesa ma Faaliliu e Seagaitumua Tupuola ,

189 Hits

Ia-se’i o tatou vaai. A pa’ia loa le tausiga tau le soifua maloloina i totonu o Samoa, e tofu i tatou um lava ma tala e faailoa atu, aemaise ai lava mea na tutupu i le falema’i tele i Motootua. O nisi o tala e uiga ese, o nisi e lelei, e i ai foi le tala leaga ma e matua mataga lava. 

Na tatou faalogo muamua i nei tala uma. Ae faapefea uiga e le tausaafia o nisi o sui o le aufaigaluega, leaga o le auaunaga, o fale ma na leoleo po e foliga mai e fiafia i o latou leo i itula tuneva a’o taumafai gasegase e momoe. E faigata ona faapea o loo i ai se mea fou!

Tuu mai la a’u ou te ta’u atu ia te outou se tala itiiti. O lea mea e mafai ona tupu ia i tatou uma lava. E tatau i lea taimi ma lea taimi ona toe faafou le afi ma a o’o mai le taimi e te le mafai ai ona fai soo se mea e uiga i lea tulaga. E le afaina pe e te malosi, pisi, malosi atoatoa poo le a lava, ae tumau pea ona i ai lea taimi e tatau ai ona i ai se tasi i le falema’i-e le faapea o se tagata asiasi ae o se tagata gasegase. 

O lo’u taimi-ma o le taimi muamua lava lea-o le lua vaiaso talu ai. O le a ‘ou le tuuina atu ia te outou auiliiliga e uiga i le pogai na ‘ou o’o ai i lea nofoaga-ae na ‘ou faaaluina ni aso se fa i lea fale ma sa tausi a’u e nisi e aupito i sili ona alolofa o loo i totonu o Samoa..I le tele o tausaga-e tele itula sa ‘ou faaaluina e asiasi ai i tagata mama’i, aiga ma uo-ae o le taoto i le falemai mo le ulua’i taimi-e ono mafai ona uiga ese –aemaise ai lava pe a e nofo i luga o lo’u nofoa lea e te faitauina ai tala uma e le manuia e uiga i lea auaunaga. O le tele lava la o taimi, e taga solo e le aufaigaluega ma latou faaaogaina le anoano o faamatalaga e le talafeagai ai mo mataupu e faasino i lea auaunaga-tusa pea o avea lea auaunaga ma fatu o le mataupu e matua mamao ese atu mai le latou pule. O le a se’i o’u faamatala atu. 

O le mataupu muamua lava o le faamoemoe o le sao atu lea mai le motu o tagata o loo i le Potu mo Faalavelave Faafuase’i. O le faatali iina e faitau itula. I le avea ma tagata gasegase, e te le fia faalogo i se lauga faa-Samoa a se leoleo Po pe a o e i ai i lea nofoaga. Ona pau lava le mea e te manao i ai o le vaai lea o se fomai ma afai o loo e matua tigaina, e mafai ona avea ma faatiga e le talafeagai ai. O le mea lenei e foliga mai ua fai ma faatiga i le toatele o tagata. E sa’o lo latou manatu ma na ‘ou maua lea tulaga i le taimi na ‘ou taunuu ai.  Ae peitai-o le faatali e le mafua ona o so latou mana’o ia tuu ai pea oe e te faatali. E matua leai se mafuaga mo lenei faiga. Ua outou silasila la, o le to’agaogao o foma’i ma tamaitai tausima’i e mafai ona avanoa atu e auauna i tagata gasegase o se vaega tele lea o le faafitauli. Na ‘ou maua lea tulaga.  Afai e na o le to’alua poo le to’atolu fomai o loo auauna atu i le faitau selau ma selau o ituaiga eseese o gasegase, o le mea moni- e mafai ona tatou faafetaia uma lea lu’itau. 

O le tulaga e sili ona leaga, e ono mafai ona na o le to’atasi le fomai mo ia gasegase uma. Ma e ono mafai ona faapea o lona lua lea o aso mo se alii/tamaitai foma’i-o loo galue pea i taimi uma talu mai ona tiute i le po ananafi. E matua faigata lava ia i latou ona tuu tasi o latou mafaufau i le galuega. 

O le matua le lava o fomai ma tamaitai tausi ma’i i se tasi itu- e le o se mea fou lea mo Samoa. O loo faamaumau lelei lea faafitauli mo le tele o tausaga ma o loo tumau pea ona faapea e ui lava ina faatiga le vaai atu e faapea o loo i ai lava ni faiga lelei ua faagaoioi e le O.U.M, N.U.S ma latou paaga e toe putiputi ai a tatou lava tagata faigaluega ma lo latou tomai tau le soifua maloloina. E lelei foi ona manatua e faapea o Samoa e le ona pau lea o le atunuu o loo tauivi ma le taofia o foma’i ma tamaitai tausimai. E ui lva o lo latou tulaga e le o leaga faapena, ae ua outou faafofoga i tala faapena i totonu o Fiti, Niu Sila ma le tele lava o isi atunuu tetele. 

A toe fo’i mai la i Samoa, o se tasi o suiga aupito i tele i le falemai o le faaleleia lea o totonu o fale- pei ona i ai i totonu o le fale. Faafetai ia Saina ma le ma’elega o le malo e tusa ai ma lea atiina a’e, ua faamanuiaina tagata o Saoa i lea fale. E le o se nofoaga aupito i manaia i le lalolagi, ae afai sa e i ai muamua i lea nofoaga ma ua e iloa folia o ia fale, e te lagona le loto faafetai. 

Ae o le itu e tatau ona faailoa atu, o se fale lea e te i ai i totonu pe a e gasegase (ae le faapea e mana’o soo se tagata ina ia gasegase). A faatusatusa la i le vevela, pefu, ma le leaga pe a faaalia faalaua’itele fale o tausaga ua mavae, lea sa avea ma faatiga i taimi uma –iole, pusi tata’a ma ta’ifau tata’a, o lo tatou falemai i le taimi nei ua asi le laasaga ua sili atu ai. E mamā, ‘ea malulῡ ma lelei ona faaaoaina. O le isi itu, e tatau ona faailoa atu e faapea o loo matua taumafai le aufaigaluega i le mea sili latou te mafaia –e tusa ai ma le latou lava faiga faapitoa. O le a i ai foi ma ni tagata le mafaufau (ae faalagolago lava i lo latou lagona) ae le faapea o tagata uma lava o i lea nofoaga –e mafai ona vali i lena lava pulumu vali fale. E anoano tagata lelei ma le alolofa, ia e faigata i nisi taimi ona maua i se siosiomaga pagatia lea e faataua i aso uma le ola ma le oti.  

O le ta’ua la o uiga le mafaufau, ua aumai e lenei mataupu ia te a’u se mataupu e masani ona ‘ou faalogo i ai e uiga i le falema’i, aemaise ai lava i le itu i leoleo po. E le mna’omia ona ta’u atu ia te outou le tala ma i nisi itu, o le faaaloalo ma le loto gaua’i e tuuina atu ma ave o le a soloia ai a tatou faafitauli uma. Ae peitai-ina ia fai le amiotonu i leoleo po, e i ai foi a latou galuega e fai. Ma o nisi taimi e inosia i latou ona o le faatino o a latou galuega.

Fai la ma faata’ita’iga  le mata’ituina o tagata e avatu faananā taumafa i totonu ma le soli o itula mo asiasiga. O le faiga faavae a le falemai e faapea o taumafa mai fafo mo gasegase e faasa. Mo se mafuaga lelei. Mo le toatele o gasegase, o taumafa tonu ia o loo avatu faananā e o latou aiga mo i latou –na auina atu ai latou i le falema’i i le taimi muamua. O le a le aogai o foma’i ma tamaitai tausima’i ia e taumafai e togafiti se gasegase pe a le tausisia e aiga ma uo faatonuga faa-foma’i ma fafaga o ia i moa falai ma isi mea uma lava e le tatau ona taumafaina i o latou tua? Aisea e faamaumau ai o latou taimi? .Uso e, e le o se alofa lena mea.

O le matua faavalevalea lava. E tatau ona tatou faamanatu ia i tatou iinei ma le taimi nei e faapea o le tausiga o le soifua e faasino i se ‘au-galulue ma se galuega e fai faatasi. O lea galuega e faasino i tomai ma tamaitai tausima’i ma le faatinoina  o le latou galuega a’o faatino foi la tatou vaega. E mafua ona o i latou o tagata popoto faapitoa ua i ai manatu aloa’ia, e tatau ona tatou faalogo i ai pe a latou ta’u mai ia i tatou le mea e mafai ona tatou taumafaina ma mea e le tatau ona tatou taumafaina. Ma a faapena ona tatou faia, o le a tatou maua e faapea o le a le toe taofia e leoleo po tagata o tatou aiga ma uo i le faitoto’a. 

O le mea e sili ona lelei pe a fai, afai e te lagona e tatau ona e faaalia lou alofa i le falemai, ia ave sina tupe ma tuuina atu i le gasegase ina ia mafai ai e i latou o tausia o ia ona savavali i le itu o le auala ma faatau ni mea taumafa mo i latou.

Ua ‘ou fai atu faapenei talu ai –i le falemai, e anoano taumafa lelei tau le soifua maloloina mo gasegase. Ina ia tuuina atu ia te outou se manatu, latou te tuuina atu taumafa mo le taeao ma le ti mo vaiaimi o le taeao, taumafataga o le aoauli ma le afiafi. O le tele o ia taumafa e tutusa lelei ma faatonuga a le foma’i. Ma o ni taumafa lelei. O fea o le lalolagi e te maua ai se auaunaga faapenei mo ni tau ua faatulagaina i Samoa nei? 

O le itu i itula o asiasiga, tuu mai a’u ou te faailoa atu lenei mea. Afai o oe o se tagata e masani ona e alu i ai e pei o a’u, o le mea e sili ona lelei na ‘ou maua i le falemai e faapea na tuuina mai ai ia te a’u se avanoa ou te moe ma malolo ai. E leai se tau. Ma o iina na ‘ou iloa mulimuli ai pe aisea e inainā leoleo po i itula o asiasiga. Afai e manatu foma’i o le leo tetele o se mea lea e sili ona lelei mo gasegase, semanu ua latou auina atu matou i se fale kalapu poo le maketi i Fugalei. Ae peitai-e manaomia e gasegase le filemu ma le leai o se pisa i aimi uma. O loo pagatia foi i latou, latou te le manaomia ona faalavelave atu se tasi ma e mafai lava ona latou faia e aunoa ma le mea e masani ona taua e le ‘au-matutua o le “ata tauvala’au” lea e fai ma faatiga ma le ‘ata leotele e le talafeagai ai). Pau lava le mea latou te manaomia o le malolo. 

Ua ‘ou laki ina ua i ai i se potu faleesea i le Numera Fitu faatasi ai ma le isi gasegase. E i ai lava lona potu taele, paipa ma se vaaiga i le Taulaga o Apia e te faananau i ai. O nei mea uma o loo i totonu o se potu lelei ‘ea malῡlῡ, o vailaau mo togafitiga ma taumafa e $30 i le aso. 

Ma sa i ai foi se fiafia i foliga o le aufaigaluega i totonu o lenei lava falema’i faapitoa. Latou te loto fesoasoani, agalelei ma latou te manaomia a latou gasegase ina ia malolosi. O lenei itu e mafai ona avea ma galuega fita aemaise ai lava i totonu o Samoa lea tatou te manatu ai o i tatou o tagata tomai i soo se mea. Ae peiai o lo taumafai tagata faigaluea o le soifua maloloina, o loo latou matua faasaga lava e fai ma ona pau o le mea tatou te mafai ona fai o na faafetaia lea o i latou e tusa ai ma ia tulaga. E mafai ona ou fai atu pe fai atu pea ae o le a faamua ai iinei.

O le itu ou matua mana’o e faailoa atu e faapea e faigofie lava ona fai ni nai faaupuga faigofie ma liligi le suavai malῡlῡ i luga o taumafaiga o loo fai e saga faaleleia ai mea pe afai tatou te fia malamalama i le mea moni. Ae peitai o le iloa ma le poto masani o le malosi lea.

O lo’u taimi muamua na ‘ou masani ai i le falemai i se avea ma tagata ma’i o se mea lea e le mafai ona ‘ou faagaloina i se taimi vave. E te alu atu i totonu o lea nofoaga ma e te faatuatua i le Atua o le a galulue o ia e ala i fomai ma tamaitai tausima’i ia o loo avea ma vaega o se faiga na fuafuaina e tuuina atu se tausiga lelei tau le soifua maloloina mo tagata uma. O nisi o gasegase e tuuina atu i le falemai ma e le toe fo’i mai i fafo.

Afai o oe o se fomai poo se tamaitai tausima’i, o lea tulaga e te matua afaina ai. E tatau ona matua tiga.  .Sa ‘ou vaaia ni lu’itau, tauiviga ma sa ‘ou vaaia ni manumalo laiti sa latou faamanatuina e aunoa ma se leo. Sa ‘ou molimauina foi le faiga e manaomia e le faiga faatulagaina o loo manaomia e faaleleia ai mea. 

E leai se tulaga masalomia e faapea tatou te manaomia nisi fomai, tatou te mana’omia nisi tamaitai tausima’i.Tatou te manaomia le taofi o lenei faigamalo mai le faamaumauina o tupe a tagata totogi lafoga i mea e leai se aoga e pei o elefane papa’e ma faiga pi’opi’o ae o loo tauave e nei tagata faigaluega o le soifua maloloina le tuuaiga o le soona galulue ma le leaga o totogi. O lenei faiga o le matua faavalevalea lava.

E tatau ona taofi. Afai e faamaoni le malo e uiga i le faamuamua o le soifua maloloina o le atunuu, e tatau ona tuuina atu ana tupe i le mea o i ai lona gutu. O le toe Faaola mai o le faitau miliona ma miliona na maumau e ala i taupulepulega leaga, faaaoga sese ma faiga pi’opi’o ma toe tuuina atu i totonu o le faiga tau le soifua maloloina. Ma e tatau i le malo ona faatino se galuega e sili atu e uiga i le taofia o gasegase ia o loo fasiotia ai o tatou lava tagata. E tatau foi i Taitai ona taitai e ala i lana faata’ita’iga ma savali i le mea e tautala ai.

Ona o lena ua faailoa atu na mea uma, e le o se mea lenei e fautua atu ai e faapea o le masani i le falemai i Motootua o le a tutusa lea mo tagata uma. E leai. O lou masani e ono eseese. O le itu lelei e tatau ona iloa e faapea o le tatou auaunaga tau le soifua maloloina o se galuega lea o loo faagasolo ma e tusa ai ma le mea na ‘ou vaaia i le falemai- e tele ni laasaga o loo faia. 

O le a i ai pea tulaga lelei ma tulaga faaletonu i lea vaega ma lea vaega –o le a i ai ni faafitauli ma ni faaseā ia o le a mulimuli ane ona taunuu mai i luga o nei itulau. E faapena lava le soifuaga.

Ae o le faafetai ma viiga e tatau ona tuuina atu i le mea e tatau ma e umi lona faagasologa. 

Ma ia talia mai se tasi o lona taimi muamua lea ua taoto ai i le falemai e aofia ai ma se taotoga ma le toe faaleleia. Ua ou matua lagona le loto faafetai. Faafetai e faavavau!

E tusa ai la ma lea faaupuga, ou te fia momoli atu se faafetai ma le loto ia Dr. Ponifasio, Dr.Aleki Fuimaono, Dr. Raymond Laulu, Dr. Faitasi Gae’e ma fomai uma lava sa fesoasoani mai- e aofia ai le ‘au-galulue na faia lo’u ta’otoga. 

Ou te fia ta’ua Leo’o Dr. John Adams-o lona tomai faapitoa i le avea ma fomai e galue na o ia –na ia vaaia le vave tuuina atu o lo’u ma’i i aao sa’o, i le taimi tonu talafeagai. 

Ou te faafetaia foi le tomai masani o le aufaigaluega i le vaega o le Faata ma le  Matagaluega o le CT Scan . E momoli atu le faafetai tele i le Tamaitai Tausimai o Tapena Solofuti Alo ma lana vaega o tamaitai tausimai mata ataata i le Acute 7. Na outou faia se eseesega atoa. 

O le itu mulimuli ae le faatauvaa, i tagata faigaluega uma lava tau le soifua maloloina i Samoa, ia faaauau pea le galuega lelei. I totonu o se atunuu o loo faateleina ai pe ma’i, o le a faaauau pea ona valaauina outou –ae ia outou iloa ua uma ona faamanuia le Atua Silisili Ese ma faapa’iaina outou mo se taimi faapea e pei o lenei. Ia outou maua Samoa se Aso Sa to’afilemu, ma ia faamanuia atu le Atua!

© Samoa Observer 2016

Developed by Samoa Observer in Apia