O loo su’esu’e e Leoleo se maliu na tatui

Tusia Pai Mulitalo Ale ma Faaliliu e Seagaitumua Tupuola ,

210 Hits

O loo su’esu’e e Leoleo se maliu o se alii talavou mai Taufusi-o ia lea na lipotia e faapea na tatui se’ia o’o lava ina le iloa e ia se mea-ina ua mae’a se tafaoga o le po i le taulaga-lea na taunuu i se tulaga e matua sese lava.

O se Alii Leoleo lea na talanoa i le Weekend Observer ae musu e faailoa lona suafa ananafi-na ia faamaonia lea faalavelave, ma fai na tupu i le Aso Faraile talu ai. O tagata faigaluega uma o le malo sa ave o latou malolo aloa’ia mo sauniga faamanatu o le Aso o le Tuto’atasi ma o le pogai lea sa le mafai ai ona maua mai se faamatalaga aloa’ia mai le Fofoga o Leoleo-o Maotaoalii Kaioneta Kitiona.

Ae peitai fai mai faamatalaga a Leoleo o le alii lea ua maliu na fasi e ni alii talavou se to’atolu-ia ua uma ona pu’e ma saisai ma taofia e faatali ai le aso latou te tutu ai i totonu o le Faamasinoga. “. O loo ua faagasolo le suesuega..”o le faaaliga lea i le Weekend Observer.” 

E tusa ai ma mea ua maua e Leoleo e o’o mai i le taimi nei, o lea alii mai Taufusi sa alu atu i se fale kalapu lea na amata ai se finauga. Na tuli ese mai le fale kalapu, sa faaauau pea le fusuaga a ia alii i luga o le auala lea e faapea na tatui ai mo le tele o taimi le alii ua maliu.

“Na ‘ausia e le ua maliu le falema’i-ae o le taimi lava lena na maliu ai ona o le matuia o ona manu’a mai le faalavelave na tupu,” o se tasi lea o faamatalaga.Na matua leaga le fasiga o ia ma e tele taimi sa tatui ai. E tele lona toto ua alu.

Ua matua faanoanoa lava lona aiga.”O lea maliu i le Aso Faraile talu ai-o lona lua ai lea o ia faalavelave matuiā e pei ona lipotia-e faapea na amata mai se fale kalapu. I le amataga o lenei tausaga, e to’alua ni alii talavou Samoa, o Barry Mafi ma Ashley Wilsona, na falepuipui  mo le fa tausaga talu ai le fasiga o se tama a’oga mai Fiti ona tuu lea o ia a ua na le iloa se mea i fafo ane o se fale kalapu i totonu o le atunuu.

E tusa ai ma le Otootoga o Faamaumauga Moni a Leoleo, o le ua afaina na o atu ma ana uo i se fale kalapu i totonu o Apia i le po o loo fesiligia. Ina ua sau i fafo lē ua afaina-sa amata ona felafoa’i a latou upu ma Wilson ma Mafi-ma na i’u ai ina tu’i le gutu o lē ua afaina.

Na toe fo’i le tama a’oga mai Fiti i totonu o le fale kalapu ma pe o se taimi o le vaeluaga o le po –na o atu ai o ia ma ana uo i fafo –o le a o i le fale..Na toe osofai e Wilson ma Mafi ma la uo o ia ma ana uo. Sa mafai e uo a le na afaina ona sosola ese, ae na maua le ua afaina e i latou ua molia ma matua fasi lava ia te ia.

Sa le mafai e le ua molia ona taofi le fasiga o lē na afaina se’ia o’o lava ina latou vaaia ua matapogia lē na afaina ma o le taimi lea na latou sosola ese ai loa.

© Samoa Observer 2016

Developed by Samoa Observer in Apia