Finau le Minisita o Fa’amasinoga ia fa’aleaogaina lona tusi-saisai

Tusia Lanuola Tusani Tupufia ma Fa’aliliu e Maiava ,

180 Hits

MINISITA O FA’AMASINOGA: Fa’aolesa Katopau Ainu’u ma le LOIA SILI AMERIKA SAMOA: Talauega Eleasalo Ale.

MINISITA O FA’AMASINOGA: Fa’aolesa Katopau Ainu’u ma le LOIA SILI AMERIKA SAMOA: Talauega Eleasalo Ale.

O lo’o finau malosi pea le Minisita o Fa’amasinoga ma le Fa’afoeina o Mata’upu Tau Fa’amasinoga, o Fa’aolesa Katopau Ainu’u, i se ‘auala e fa’aleaogina ai lona tusi-saisai mai Amerika Samoa. 

O le tusi-saisai lea o Fa’aolesa na tu’uina mai i le 2008, o lo’o iai nisi o tu’ua’iga, e uiga i lona fa’atinoina o galuega fa’aLoia mo se tasi sa tula’i ai.

I se talanoaga i le telefoni a lana Afioga ma le Samoa Observer, na saunoa ai le Ali’i Minisita, o lo’o galue i le taimi nei lana loia i Amerika Samoa, i le mata’upu lea. Na te le’i ta’ua, po’o ai lana loia lea.

“O le a tu’uina atu e la’u loia se talosaga e fa’aleaogaina ai lea tusi-saisai,” o lana saunoaga lea. 

“O le fa’atuai  lea, e mafua ona o lo’o taumafai lava le Ofisa i Amerika Samoa e sa’ilia fa’amatalaga talafeagai e lagolagoina ai le tusi-saisai.  

“E le o maua i le Ofisa o le Loia Sili mea ia o lo’o sa’ilia ma o lo’o tau-sa’ili kopi mai le Fa’amasinoga.” 

Na fesiliga pe malaga la i Amerika pe a vala’au lana mata’upu e le Fa’amasinoga, ae saunoa Fa’aolesa, e leai.

“O lo’o fa’atino uma lava e la’u loia,” o lana fa’aaliga lea. 

“A maua mai loa le fa’ai’uga, ‘ou te vala’au atu mo la’u tali aloa’ia. A’o le taimi nei, e leai sa’u tala e fai atu ona e ono afaina ai galuega a la’u loia.” 

Na fesiligia fo’i i le vaiaso talu ai, le Ali’i Palemia mo sona finagalo i lea mata’upu, ae saunoa, o le a se’i fesili muamua i le Minisita mo se fa’amalamalamaga.

I se talanoaga lata mai nei ma le Loia Sili a Amerika Samoa, o Talau’ega Eleasalo ‘Ale, sa ia fa’amaonia ai, o lo’o aloa’ia lava ma aoga i le taimi nei, le tusi-saisai o Fa’aolesa.

“O lea lava, o lo’o aloa’ia lava ma e mautinoa o lo’o iai pea iu fa’amaumauga a le Fa’amasinoga e le’i tagofia,” o lana fa’aaliga lea. 

 “E leai se matou gaioiga o faia iai i le taimi nei, aua o le mata’upu lena e fitoi tonu i Leoleo, e fa’amalosia le tulafono, pe a molia so’o se tasi. O fa’amatalaga uma e afua ai lenei tusi-saisai, o lo’o iai lava. ‘Ae ‘ou te le malamalama i le mea na tupu. ‘Ou te le-iloa lava le tulaga ua o’o iai, pe ua mae’a ona fai iai o se fa’atatau pe leai.” 

Na ta’ua fo’i e le Loia Sili, talu lava ona tu’uina mai o le tusi-saisai, e le’i fa’atinoina lava. O le mafuaga o lea tulaga pei ona ia ta’ua, “atonu ona e le o iai i ga-o le tagata lea.

“O lo’o aoga pea le tusi-saisai, ana o i’inei i Amerika Samoa, ua leva ona loka mai e Leoleo e tusa o fa’atonuga a le Fa’amasinoga.” 

Na fa’aopopo mai fo’i, o le tusi-saisai, e le’i tu’uina mai e lona ofisa, a’o le Fa’amasinoga a Amerika Samoa. 

© Samoa Observer 2016

Developed by Samoa Observer in Apia