Manatu O Le Fa’atonu - Avea le tapunia o Avele e lalaga ai le tofa

Tusia Mata'afa Keni Lesa ,

172 Hits

Leai lava sē tio i le fa’ai’uga a le malo, e tapunia ai mo se vaitaimi le Kolisi o Avele a’o fa’agasolo su’esu’ega a le Vasega o Leoleo, i fa’amata’u ia fa’apea na faia e ni tamaiti-a’oga i feso’ota’iga tau-Initaneti.

Atonu e foliga ua fai si mafamafa teisi – ae maise mo nai tamaiti e le’i ‘auai fa’apea nai faia’oga lea ua afaina fua ona o mea-valea a isi vale-saupa’u – a o le galuega lea a le malo, o le puipuia o o tatou tagata. E le tatau ai lava ona faitioina le fa’ai’uga ua fai.  

Ua ta’ua lea vaega, ona e matua tuga tau-fa’amata’u ua fai ma e le tatau lava ona ‘ela le silasila i ona o’o’oga. A talanoa loa tagata laiti nei, ia fasi teine ia pei o le fasiga o tama ma ta-tui i naifi ia feoti, ona matua atuatuvale ai lava lea o le mafaufau.  

Ioe, e fa’amuamua lava le saogalemu o fanau-a’oga ma le lautele o le atunu’u.

Silasila fo’i, ina ua gapa vesiga a tamaiti Avele ma tamaiti Maluafou i le Aso Faraile talu ai, na matua lamatia lava le soifua o le mamalu o le atunu’u i lea vaega o le taulaga.  O tau’aiga-ma’a na fa’aleagaina ai ta’avale ma mea-aoga a isi o le atunu’u. 

Ae le na o le pau lea. I lenei tausaga atoa, toetoe a le misi se vaiaso ma se misa a tamaiti-a’oga i nofoaga faitele. A’o taimi uma e tutupu ai ia vesiga, e matua lamatia ai lava le soifua o le mamalu o le atunu’u, ae le o latou e mafua ai.  

O le mafuaga lea ua matua sa’o ai lava le fa’ai’uga a le malo ua fai – moni e iai fo’i nisi e faitio. Lea ua tu’u-sa’o atu le fe’au ma le fa’amamafa, e fofo ai lea fa’aletonu, i le taimi nei lava. 

A o le fesili, e fo’ia ai le fa’afitauli? Mata e ‘uma ai le misa-so’o o a’oga? 

O le manatu, ‘ailoga. Ua na o se fofo fai-fa’atopetope fo’i. 

Aisea? Aua e le na o tamaiti Avele o lo’o a’afia i misa nei. E le tau ta’u atua isi ua pa’u-a’i i lea masani.  

Ae matua le-ofo ai lava le mafaufau, aua o le fa’aletonu o se to’a-gaogao, ae momotu sa’o ai lava avanoa o le to’atele o isi tamaiti amio-lelei o Avele. 

Ae le o se fa’aletonu lea o le a’oga? Le a sou finagalo? 

Matou ta’ua muamua le tulaga lea, ae toe avatu pea: e le o se fa’aletonu o le a’oga ua fa’apea ai amioga fa’avalevalea a tupulaga nei. Ioe, moni e iai le sao o a’oga e fa’atino, ae masalo, o finauga nei i le va o a’oga le isi mafuaga tele. 

A’o le fale lava ia, i le aiga, e foafoa mai ai le amio. Lona uiga, a amio-pua’a se tamaititi, e le tatau lava i le atunu’u atoa, ona tu’ua’ia fua faia’oga ma a’oga. 

Matou te talitonu, o matua lava e pau iai le ulu-ulu o le la’au. O ekalesia fo’i ma nu’u e tatau iai le fa’asea i nisi taimi. Talu ai, o nofoaga tonu nei e a’oa’o ma fafaga ai fanau i tu ma aga talafeaga e fua i talitonuga fa’aKerisiano.

Silasila fo’i i le tulaga lea. E tatau ona matua mamafa le sausau i faia’oga, pe a fa’aletonu a’oga ma le-pasi tamaiti. Aua fo’i o le latou matafaioi lea, ia mautinoa, e papasi tamaiti i su’ega. 

A fa’alausoso’o pea ona fa’aletonu ma valelea tamai ona o tulaga tau-a’oa’oga, e tatau la ona fesiligia faia’oga. Pa’u tonu lava le samala i le ulu o le fao.   

A’o le tu’ua’ia o nai faia’oga ma tulaga o a’oa’oga ona o vesiga o faia nei i le taulaga, o se mea-sese lea ma e tatau ona tu’u. 

Ia manatua lelei, o le aiga lava e amata ai mea lelei uma. O se isi fa’aupuga, a a’oa’i lelei lava ma fafaga e matua ma latou matutua le tama po’o le teine, ina ia fa’aaloalo ma ava i taimi uma i totonu o le aiga, e ola ane lava le tamaititi ma matua, ae le-mafai ona galo a’oa’oga ia sa faia i le fale. 

Ua leva tele lenei fa’afitauli ma ua tupu so’o fo’i vevesi i le va o fanau-a’oga, ae vave tele ona tatou tau le pua ma lalafo i a’oga, i nai faia’ogfa, o ta’alogfa ma isi lava mau mea. O nisi lava o ia faitioga, e fa’amaonia.  

A’o le tele lava o taimi, e matua mamao lava. Ae le taitai lava tusi se lima ia ‘Oe lava. O le a le tatou mea o fai iai? O le a so ta sao lelei mo le fa’afitauli? 

O a ni a’afiaga o fanau-a’oga ona o ata-mata’utia i TV?

Ae a tala i nusipepa, lea e foliga e matua fa’amapu’e ai mea-sese ma amioga mataga? 

Ae malie la, le mea fou lea ua aliali mai i nei aso, o le fa’aaogaina o telefoni fe’avea’i ma le initaneti e faia ai tulaga le-migao nei. A’o ai na fa’atagaina nei tekonolosi fou i totonu o Samoa? 

O ai le atamai e ana lea finagalo, e tu’u-sa’oloto vaega o feso’ota’iga ina ia saofaga ia so’o se Samoa i Tusifoliga, YouTube ma isi anoano o feso’ota’iga ua iai nei? 

A’o le sasi o ai na le-tapena lelei ai o tatou tagata mo le fa’aaogaina o nei mau mea fou, ae maise ona tulaga lelei ma fa’aletonu fo’i e tula’i mai ai?”

Le mamalu e o le atunu’u, e le tatau lava ona tu’ua’ia nai faia’oga ma a’oa’oga i nei mau vevesi. O nai a’afiaga ia o le soifuaga nei. O se fa’aletonu, o se sasi fo’i o vaega o lo tatou soifuaga. 

O tatou uma e ana le avega. O le matafaioi a a’u nei, o ‘Oe, o ta’ita’i ma tatou uma, e tofu ma le sao aoga e tatau ona fa’atino. 

E ioe le mafaufau, o tamaiti nei e fa’amimisa so’o, o matua vale-saupa’u lava. A’o vale a tatou, o tama lava a lo tatou atunu’u na soifua ma ola ane I Samoa nei. O le a la le mea e tatau ona fai? O le a le isi mea e tatau ona aga’i iai? 

Muamua lava, ua tatau ona toe fo’i i tu ma aga, o talitonuga ma tautinoga na masani mai ai aiga.

O “vale-saupa’u” nei e tatau ona alofagia, taumafai o latou lagona, ina ia maua le lagona o le ‘auai, lagona o le talia lelei i aiga ma tu’u iai se mea lelei e fa’atino nai lo le na ona nofonofo ma fa’asolo mafaufauga i mea-valea.

O le mea moni, o fa’aletonu nei o lo’o tutupu i totonu o nu’u; ae tofu tatou ma le sao e sa’ili ai se fofo lelei.  E le tatau lava ona na o le tusitusi-lima, tatau ona matua silasila toto’a i le totonugalemu o le fa’afitauli, ma toe fuafua lelei a tatou fa’amuamua ma mea tatou te naunau e ‘ausia. 

Manuia lenei Aso Tofi Samoa, Fa’amanuia Le Atua!

(Fa’aliliu e Maiava).


© Samoa Observer 2016

Developed by Samoa Observer in Apia