Mamafa puipuiga a atunu’u tetele mai le ‘au fa’atupu fa’alavelave

Tusia Fa’aliliuina e Ilia L Likou ,

127 Hits

Va’aiga i nisi o le vaega Isalama i totonu o Suria

Va’aiga i nisi o le vaega Isalama i totonu o Suria

E o’o mai lava I le taimi lenei o lo’o ua amata lava ona mamafa leoleoga a atunu’u tetele mai le tele o osofa’iga o lo’o ua i ai nei le au fa’atupu fa’alavelave i totonu o a latou atunu’u.

O lea tulaga ona o lo’o ua maitauina pea le aga’i atu o tagata mai atunu’u nei e ‘au’au fa’atasi ma le Isalama lea o lo’o tele i totonu o Suria.

I tala ripotia muamua atu , na fa’amaonia ai e to’atolu ni ali’i talavou ua taofia nei e leoleo i totonu o Amerika ona o se fuafuaga o lo’o o latou fuafua ai e malaga atu i Suria e fa’atasi ai ma le vaega a le ISIS.

O lo’o ua ta’ua e maua i latou nei o lo’o ua ma’ea ona polokalame nisi o gaioiga e malaga i le Aso Lulu ma ave fa’amalosia se faigamalaga a se va’alele ma ave sa’o i le Setete o Isalama.

O lenei fuafuaga o lo’o ua manino mai a ripoti i totonu o le ‘a’ai o Niu Ioka.

O nisi o a latou fuafuaga o lo’o ua maua nei e Amerika o lo latou fuafua ai ea e fana (tulou) le Peresietene o Amerika i a Barack Obama.

O se tasi o ali’i lea o lo’o ua aofia i le to’atolu lenei e aofia ai Abdurasul Jaraboev, 24 tausaga lea na ia tusia i luga o upega tafa’ilagi lea faiga taumafata’u.

O lo’o ua maua lava nisi o talanoaga e Amerika o lo’o ia fa’apea ai afai ae le mafai lana malaga ai i Suria o le a ia fa’atauina se fana ma tafanaina ai leoleo o Amerika ma fa’asolo atu ai i nisi o tagata.

O le taimi lenei o lo’o ua matua’I mata’ituina e Amerika i latou o lo’o aga’I atu I Suria ona o faiga fouvale e pei ona ua fa’ailoa mai ma ua to’atele I latou ua malliliu ai.

O ripoti lata mai na fa’ailoa atu ai le su’esu’eina ai nei e Malo ‘Aufa’atasi ni fa’asalalauga, e uiga i Malo Isalama (ISIS) – lea ua manatu o vaega Fa’aTelolisi aupito mau-oloa ia ua fa’amauina – e fa’apea, pei lava o lo’o latou ‘ave’esea totoga o tagata o latou fasiotia ma fa’atau atu ia maua ai Tupe. O fa’aaliga aloa’ia nei na maua i nai aso e le’i mamao atu.

Ae na ta’ua e le Amepasa Peretania mo Malo Aufa’atasi, Mark Lyall Grant, e le’i talanoaina aloa’ia le mata’upu lenei. Talu ai, e leai ni fa’amaoniga po’o ni molimau fo’i o ia tu’ua’iga na faia, e le Amepasa Iraq mo Malo ‘Aufa’atasi. 

O lea tulaga na tatalo atu ai le Amepasa Iraq, Mohamed Alhakin i le Fono mo le Saogalemu, ina ia su’esu’eina le maliliu ai o foma’i e 12 i Mosul, Iraq. Na ta’ua, na fasiotia i latou ina ua mumusu e ‘ave’esea totoga mai tino o tagata.

“O nisi tino e maua ua tipitipi … o lona uiga, ua leai isi vaega,” o lana fa’aaliga lea i le vaega fa’asalalau, ma fa’aopoopo ane, sa va’ai i pū-pū i papatua o tino-maliu nei, i le vaega e iai fatuga’o.

“E matua mata’utia lenei mea pe a manatu iai,” o le fa’amatalaga lea a Alhakim.

O le gaoia o tino mo totoga ma vaega uma e toe fia fa’aaoga, ua ta’atele, o le fa’aaliga lea a Nancy Scheper-Hughes, o le fa’atonu o le Vaega e Mata’ituina Totoga, a le Iunivesete o Kalefonia, e fa’amautu I Berkeley mo Fa’amatalaga ma Su’esu’ega. 

“E le fou le gaoi totoga i le taimi o taua, taua i le va o atunu’u ta’itasi, o taua mataga ma taua e aofia ai ‘au-taua tetele le-mafaufau,” o le fa’aaliga lea na ‘auina mai i se tusi-Imeli a Schper-Hughes, o le Ta’ita’ifono o le Polokalame Fa’afoma’i Berkeley, i su’esu’ega tau-tagata.

Na ta’ua e Alhakim, e le’i fa’atagaina se fa’atalanoaga ma le Vaega Su’esu’e Fa’apitoa a Malo ‘Aufa’atasi i Iraq.

“O le taimi nei, e le o fa’amaonia fa’aaliga na tu’uina mai, ae mautinoa, so’o se ‘auala solitulafono e su’e ai tupe a vaega pei o le ISI po’o ai lava, e matua ogaoga popolega e tupu mai ai,” o le fa’aaliga lea a Stephane Dujarric, o le fofoga o Malo Aufa’atasi, i le talanoaga ma le CNN. 

Na ta’ua fo’i e Nickolay Mladenov, o le ‘Ave-fe’au fa’apitoa a Malo ‘Aufa’atasi o lo’o va’aia Iraq, e fa’apea, o le gaoi totoga o tagata ua ta’ua, o le a su’esu’eina.

“Na matou va’ai i ripoti nei,” o lana fa’aaliga lea. “Ui i lea, ‘ou te le manatu e fa’amaonia mea nei vagana ua matou va’ai toto’a iai ma su’esu’eina atili.”

Na ta’ua e Mladenov, o ripoti ua maua, fa’apea o lo’o “fa’aaogaina e le vaega lea se faiga e fa’atauina ai tagata, o se tasi o a latou ‘auala e sa’ili-tupe ai. ‘Ou te le iloa le ogaoga o le fa’afitauli lea vagana ua mae’a a matou iloiloga o le fa’afitauli ua alia’e nei ae a taga’i i le ata atoa, e mautinoa ai le mata’utia o ‘auala ua fa’aaoga e le ISIS, ma e ono fa’ateleina i taimi uma.” 

Na ta’ua e Alhakim, e iai se maketi i Europa mo totoga gaoi nei. Ua ‘ave fa’amalosi e tagata fa’atupu-fa’alavelave nei, le tele o malae-va’alele lea e la’u atu ai totoga ma vaega o tino o tagata, i maliega sa fafau i le va o “tagata-fa’atau-fa’aogatotonu” ma I latou e fa’atauina. 

O tino maliliu ua le-atoatoa, sa maua i fanua-maliu (papa’u) i vaiaso ua tuana’i atu, o lana fa’aaliga lea.  I se fonotaga masani a le Fono mo le Puipuiga na fai I Iraq ,na fa’ailoa ai e Alhakim, nisi o solitulafono o le fasiotia o tagata e le ISIS – “e aunoa ma se ta’ua o le fa’atauina o totoga o tagata fa’apea le gaoia ma le fa’atauina atu o toega mai aso ua mavae fa’apea suau’u. Ua fa’aleaogaina atoa e vaega fa’atupu-fa’alavelave nei, le tino o le tagata soifua ma lona taua,” o lana fa’aaliga lea. “Ua latou faia se fa’atinoga aupito ogaoga, a o se agasala fa’atupu-fa’alavelave matuiā aga’i i tagata Iraqi – pe Shia, Sunni, Kerisiano, Turkmen.” 

O nisi o ripoti talu ai, na fa’aalia mai ai e le Vaega o Tala Fou a le Anadolu, o se Vaega fa’asalalau aloa’ia i Turkey, fa’atasi ma isi tusitala e fa’apea, ua fa’asilasilaina e le ISIS le tatalaina aloa’ia o le a’oga fa’aFoma’i lona nofoaga ‘autu ma malu-puipuia i Suria i matu.

“O tino maliliu, a mae’a ona fa’aleagaina ma fai iai nisi togafitiga ma faiga… pe a ‘uma ona ‘ave’esea mai le “tino” o le tagata, ona avea loa lea ma oloa e fa’atauina atu,” o le fa’aaliga lea a Scheper-Hughes. “O le mana’oga mo totoga fou ma isi vaega uma o le tino o le tagata … e le fa’amalieina.” 

E tele ma anoanoa’i le mata’utia ua o’o atu ai le sauaina e tagata e i latou nei e pei ona i ai O nisi o ripoti lata mai le iloga ai o le toe tali atu o nisi o atunu’u i nei sauaga ma faiga fouvale i alii pailate o Ioritana lea na pu’e ma faa-falepuipui e le Setete Isalama (ISIS) “sa susuna ola i totonu o se pa,” ma o le tali atu i lea faiga, o lea “na fasiotia ai e le Pulega a Ioritana ni tagata faatupu faalavelave ua faasalaina e iai a latou sootaga ma le ISIS.”

I lea taimi, fai mai lipoti, o King Abdullah II o Ioritana sa asiasi atu i le Iunaite Setete ina ua na iloa e faapea na “susunu ola lea alii pailate,” ma o lea na faapuupuu ai lana asiasiga ma toe taliu atu i le aiga.

Ina ua taunuu, na ia “poloaiina ina ia sisi ni pagota se to’alua e i ai a la sootaga i le ISIS se’ia feoti. “  Sa faatonuina e le “Grand Sheikh Ahmed al-Tayeb nofoaga uma o le Setete Isalama o loo i ai tagata faatupu faalavelave ina ina fasiotia, pe faa-satauro, poo le tatipi ese o latou lima ma vae.” 

Ae mo le tamā o le pailate lea na fasiotia, “o ia lea o se tagata iloga o le ituaiga o sheikh, o ia lea na ia fesiligia muamua pe tatau foi ona tau Ioritana ma le ISIS,”o ia ana upu na mou ese ina ua fasiotia lona atalii. 

I se talanoaga fai mai a ia: “Ou te talosagaina le lalolagi ina ia faatinoina le faasalaga e tatau ai mo ia vaega faatupu faalavelave ia e leai ni a latou faataua tau talitonuga ma aganuu.” 

O le sa avea muamua ma faauluuluga o auaunaga faalilolilo a Ioritana o Adnan Abu-Odeh, na ioe i ai, fai mai “I se tasi itu ua leai se tatou pailate ae i lea lava taimi, ou te manatu ua maua e le malo se lagolago tuufaatasi e tau ai ma i latou, i totonu o Ioritana ma mai itu uma o siomia ai.”  Ma, ona soso’o mai ai lea ma se tafega o manatu faaalia e uiga i le mata’utia o le iloa e faapea “ua uma ona susunu ola le pailate i totonu o se pa” 

E ala i se fuafuaga e tuua’ia ai le ISIS, fai mai nisi o i latou: 

Tagata e le o iloa: “Ua latou faia se mea sese uiga ese. A faavaivaia outou e pei ona sa i ai i latou, ona e taumafai lea e faa-talitonu e lagolagoina oe o loo e malosi e ala i le uiga ese o lou malosi, ae i le taimi, ua maoa’e tele le mea ua latou faia.”

O Iran: e le amio faa-tagata ma e le Isalama.”

O le vaega Shiite a Lepanona o le Hezbollah. “O faalavelave aupito i mata’utia ma le tiga na fai e le Setete Isalama

Qatafr: “(Na ia fetuu) le fasioti o le tagata ona e feteena’i ma faavae faapalepale a le Isalama.”

Take: Na tuua’ia le toatele o loo i totonu o le itulagi mo le faatagaina o fitafita mai fafo e sopoia ona tuaoi i totonu o Suria, ia e fesootai ai nisi ma le Setete Isalama.

Peresetene Recep Tayyip Erdogan: O se faiga faa-saua e leai sona nofoaga i totonu o le Isalama. Ou te fetuuina ma inosia le susunuina o le pailate Ioritana.”

O le taitai o le Al Azhar ma o se imam tu-mati’e o Sheikh Tayeb: “E tusa ai ma le ‘Diavolical, o fuaiupu o le Quranic o loo faaalia ai e faasa e le Isalama ona susunu pe tatipi tino o e ua ta’ua o le fili i le taua”.

Ma o lea la, ‘o le Iunaite Setete o Amerika, le fesoasoani malosi a Ioritana i le taua e faasaga i le ISIS,”o a ni ona manatu faaalia e uiga i lenei sauaga “faa-manu ma le le talafeaga faa-Isalama,”sauaga faa-maligi toto? 

O le itu e faanoanoa ai mo i tatou uma, i lenei lava taimi, o le gugu o Amerika. 

Ona o le malosi ai o nei fetauaiga e aunoa ma se vaifofo o le itu tonu lea lamatia o le nofoaga o lo’o i ai le toatele o tagata sulufa’i i Suria mai le Assad ma le Vaega o le Setete o Isalama po o le ISIS.

O le taimi lenei e tusa ai ma ripoti e pei o le toulu fa’atimu pomu otomika i totonu o Yarmouk i le vaega tonu o lo’o toatele ai tagata sulufa’i lea e ta’ua e le mamao tele ma Tamaseko. O le amataga o le masina lenei o Aperila na avea ai nei vaega eleele e le Setete o Isalama ma ua matua’i se tulaga mafatia a i latou ne i le leai oni vai, meaai ma ni vailaau mo ni togafitiga.

E pei ona silafia ai e le fa’aitiitia le to’atele o e ua ma’imau lo latou ola ona o taua ma fevesiaiga o lo’o ua tula’i mai pea i totonu o Suria aemaise o atunu’u tu lalata ane ai.

E pei ona fa’ailoa mai ai e ripoti e fa’apea, o le tausaga ua mavae atu nei o se tausaga mata’utia lea le to’atele o e ua maliliu ai.

E tusa ai ma fa’amaumauga ua tu’uina mai e latalata i le 1000,000 e ua maliliu ona o fetauaiga o lo’o i a i atunu’u nei ma o se numera maualuga tele lea talu mai le tausaga e 2007.

E tusa ai ma ripoti muamua lava o se fa’anoanoaga tele lea i fa’alapotopotoga tetele o le lalolagi e i ai ma Malo Auafa’atasi i le leai lea o se filemu e ona tula’i mai i se taimi vave lava.

O le to’atele o nisi o lo’o latou tu’ua’ia lava le lava lea o puipuiga o sui o malo o lo’o tutu mai i le taimi lenei mo le tausia o le filemu i va o atunu’u, ma ua fai lava le mea e o’o ai le malosi o le tagata lava ia.

O aso i luga o maga’ala o atunu’u nei e pei ona i ai fo’i Pakistan ma Afghanistan ua le misi ma le solo fa’aaloalo e aualofa ai i le faitau fia o e maliliu, i vaega uma e lua o le tuao’i.

O le tele o nisi o fa’alavelave e mafua mai i le va o Pakistan ma Afghanistan ma e tele ina fa’apa e le au osofa’i se pomu, ma maliliu ai le faitau selaui o tagata i ni osofa’iga se lua i le taimi e tasi.

O se tasi o fa’alavelave na alia’e mai i le taulaga o Quetta, i le itulagi i sisifo o Baluchistan, lea na maliliu ai le la’ititi ifo i le 30 o tagata i se osofa’iga pule i le ola, i le sauniga o le maliu o se leoleo, lea na fasiotia, ma o va’aiga le toe saogalemu o lo’o ua feagai ma atunu’u nei i aso uma.

O se fa’atausi’usi’uga o le itu i sasa’e o le tuaoi, i le Itumalo o Nangarhar i Afghan, na ripotia ai fo’i le pa ai se pomu i le tu’ugamau, lea na fa’apotopoto ai tagata e fa’anōnōmanu mo latou aiga ua maliliu. E to’a 14 tinā ma tamaiti mai le aiga e tasi na fasiotia ai, ma o se va’aiga i ai i letaimi lenei e pei o se mea ua ta’aalo ai tagata ma ua leai se manatu mamafa i le ola o isi.

O ia ripoti na fa’aalia ai e le so’oupu o le vaega a le Taliban a Pakistan, Shahidullah Shahid, na ia faitioina le galuega mo osofa’iga a le Quetta, ma fai mai o lea lava o lo’o fa’aauau le tulimata’i e le vaega’au lea o le ofisa o leoleo, e tusa ai ma fa’amatalaga mai le au fa’asalalau o le atunu’u. 

O le ogaoga o nisi o ripoti na alia’e mai i le tausaga ua mavae atu nei na o’o atu osofa’iga a le vaega fa’atupu fa’alavelave i le a’ai to’aititi o Shiites i Quetta, a’o tu’uina ta’itasi mai ai e tagatanu’u o Baluch ni vaega’au mo puipuiga. Na ta’u mai e’i latou o lo’o nofomau ai i lea nofoaga le si’itia o le ave fa’amalosi o tamaiti e nei vaega’au fa’atupu fa’alavelave uma e lua ma fasiotia.

E pei ona silafia o nai tausaga e le’i leva atu nei nao se alii Peretania e galue e ala i le tuuina atu o fesoasoani o David Haines na fasiotia e fitafita a le ISIS, e tusa ai ma le ata video na tuuina mai i initeneti e fesootai ai ma lea vaega, ma o lona tolu a’i lea o tagata ua pu’e faa-pagota ma fasiotia e lea vaega o fitafita Isalama i nai vaiaso ua mavae. 

O lea ata video a le ISIS o loo faaalia ai le aveeseina o le ao o Haines ma faaigoaina le fasiotia o ia o “se fe’au I malo e aufaatasi ma Amerika”.  O le faiga o lea ata video e tutusa lelei lava ma ata video o loo faaalia ai le vavaeeseina o le ao o tusitala o Amerika o James Foley ma Steven Sotloff, o le faasalaga mulimuli lea e aofia ai Haines ma le faamata’u o ia le isi o le a fasiotia. 

O ata video fou o se fitafita ISIS o loo fai le ufimata ma tuuina atu lona lima i luga o le isi tagata ua pu’e, o ia lea ua mautinoa o Alan Henning, o se tagatanuu o Peretania.

O le tali a le Palemia o Peretania o David Cameron na ia faaigoa ai le “fasiotia o David Haines o se “matua mea faa-tevolo.”

Na toe ta’ua e Cameron, “O le a matou faia mea uma lava e tusa ai ma lo matou malosi e saili ai nei tagata fasioti tagata ma ia mautinoa ua tuuina atu i latou e fai i ai le amiotonu, tusa lava lava pe o le a le umi e faatino ai lenei sailiga. “

Na tuuina mai e Haines ni nai upu faamaumauina o loo i luga o le ata video, e faapea foi ma upu a le alii na fasiotia o ia.

Sa faatūtū ana upu ia Peretani, o le faaoo sala-o ia lea e tusa ai ma le faaloga na fasiotia Foley ma Sotloff-fai mai, 

“O au sootaga faa-tevolo ma Amerika, lea ua mafua ai ona faaauau pea osofaiga i tagata Mosalami o Iraq ma tu’i ai talu ai nei le faatanoa o Haditha, ua na ona faateleina ai o lou faata’ape’apeina ma maua ai lou tiute o le avea ma ta’ifau fagafao usita’i. 

“Pau o le mea e fai e Cameron o le toso o oe ma ou tagata I totonu o le isi taua mata’utia e te le manumalo ai.” 

.O se Alii Lutena Col o Rick Francona-o se alii ofisa ua leva e faiva i le Air Force ma o se alii ofisa tau suesuega ma fuafuaina faiga tau vaega-‘au a le CNN-o lona manatu e faapea afai o fuafua le ISIS e faatosina ese Peretania mai le faifaimea faatasi ma le Iunaite Setete, o le a matua pagatia lea vaega. 

E le’i leva ona faamaonia e le ISIS le lagolago a Peretania ma Amerika i soo se itu o mea uma o le a matou faia,” o le faaaliga lea a Francona.”….Ou te manatu ua avea le taua i le taimi nei ma taua a Sisifo, e le na o le Iunaite Setete o loo tau. “

Uso: O Haines ‘o le isi lava tagata na soifua ina ia fesoasoani atu i isi. O tala fou o lea fasioti tagata uiga ese na maua i lea lava aso na tuuina atu ai e le aiga o Haines ua 44 tausaga lona matua, se fe’au puupuu i e na pu’eina o ia e ui atu i le Ofisa o Mataupu Tau le Va i Fafo a Peretania.

I totonu o lea fe’au, fai mai le aiga, “Ua uma ona matou auina atu ia te outou ni fe’au tou te le’i tali mai i ai. Matou te talosaga atu ia i latou o loo taofia David ina ia faafesoota’i mai matou.” 

Ua silafia e le lalolagi foliga o Haines i totonu o le ata video a le ISIS, na tuuina mai i le aso 2 o Setema, lea sa tiltotilo ai o ia i luma ma tootuli a’o tu mai ona tua le fitafita a le ISIS e fai le ufimata. 

Fai mai le fitafita i totonu o lea ata video; “Matou te faaaogaina lenei avanoa e lapata’ia ai i latou ia ua auai i totonu o lenei sootaga faa-tevolo a Amerika e faasaga i le Setete Isalama, ina ia o ese ae tu’u ai pe o matou tagata ia.”

Fai mai alii ofisa o Peretania ina ua uma ona maua mai lea ata video, ua uma ona latou auina atu fitafia e taumafai e lavea’I mai se tagatanuu o Peretania sa le mafai ona faamaonia mo se taimi ua leva,” ae sa latou le mafai ona faatino lea tulaga. E leai nisi faamatalaga na latou tuuina mai. O Mike Haines, e tusa ai ma le faamatalaga na maua i le vaveao o le Aso Sa, e ala i se Ofisa Tau le Va i Fafo a Peretania, na faamauina ai e faapea o lona uso na alu ese ae tuu lana fanau e to’alua ma lona to’alua o Dragana. Na ia faamatalaina lona uso e faapea “e pei lava o le isi tagata” o lona olaga a’o “tamaitiiti” o lona lava aiga”ma na “tausi ina ia ona iloa le mea sa’o mai le mea sese.” O David Haines sa galue mo le Royal Mail, ona soso’o lea ma lona ulufale i le Royal Air Force. Sa mulimuli ane ona galulue ma Malo Aufaatasi i le Balkans, lea “sa fesoasoani atu ai o ia i soo se tasi sa manaomia lana fesoasoani, e ui ina eseese lane, lotu poo talitonuga,” e tusa ai ma le faaaliga a lona uso. 

“I le faagasologa o lenei taimi, sa amata ona tonu i le manatu o David e faapea o le galuega mo le manuia o tagata o le matata lea e fia galue ai,” o le faaaliga lea a Mike Haines. 

“…Sa matua sili ona malosi David ma fiafia i ona faiva tau le galue mo tagata.”

Ina ua mae’a ona galue mo le ScotRail, sa alu atu David Haines e su’e sana galuega e avea ma pule tau le faamaopoopona o faalapotopotoga ma le puipuiga malu mo le Sui SooupuTau le Tausia o Tagata e faamautu i Pale mo le Atiina a’e ma le Galulue Faatasi Tau le Poto Faapitoa.

Na aveeseina faamalosi o ia ia Mati 2013 e latalata i se togalauapi o tagata sulufa’i i totonu o Atmeh, i Suria, lea sa galue ai e fai fuafuaga mo le auina atu o fesoasoani mo tagata i tagata o loo i lea togalauapi. Sa galue muamua o ia i galuega tau fesoasoani mo tagata ua afaina i fevesiaiga i totonu o le Balkans, Aferika ma isi lava vaega o Sasa’e Tutotonu, e tusa ai ma le fofoga o le ACTED.  “O lona fiafia ma le naunau mo le galuega na ia (faia) i totonu o Suria e, mo a’u ma le aiga, o le vaega aupito i taua lea o le tala faanoanoa atoa e uiga ia te ia,” o le faaaliga lea a Mike Haines. “Sa alofagia ma alofagia o ia e tagata uma o lona aiga ma o le a matua misia lava o ia.”

O le isi na pu’e faa-pagota ua uma foi ona fasiotia faalaua’etle e le ISIS. O le soifua o le isi ua faamata’uina. Ma o fitafita tau mo le ISIS-ia ua latou faaigoa i latou o le Setete Isalama, ona ua ioe i ana taumafaiga e faavae se kalipafe e aupito i tele i totonu o Sasa’e Tutotonu i lalo o lana ta’u o le tulafono a – Sharia o loo faaauau pea ona latou fasiotia tagata sivili e leai se sala i totonu o Iraq ma Suria. 

© Samoa Observer 2016

Developed by Samoa Observer in Apia