E sili lava le maumaga ae aoga foi le galuega ona o le tele o mea e fai nei vaitau

Tusia Fetalai Tuilulu’u ,

82 Hits

Faigaluega toe galue le maumaga: Titi Talamoni o Faleasi’u.

Faigaluega toe galue le maumaga: Titi Talamoni o Faleasi’u.

E ala eseese lava tagata ma a latou tali atu i le tau o le soifuaga ma auala e foia ai lea faafitauli tele.

 E le’o na’o le faigaluega i le faletupe ma le faleoloa tele e maua mai se tupe mo le tausiga o aiga. E pito sili ona tele tupe e maua mai i le faatoaga ma le togalaau aina e sili lava lea e maua fua mai mo le tausiga o le aiga.

O le manatu lea o le taule’ale’a ia Titi Talamoni, 28 tausaga le matua mai i le afioaga o Faleasi’u. E silia ma le toasefulu  tagata o lona aiga.

“E faigata ia o se tautuaina o se aiga e ova ma le sefulu ona tagata aua e talanoa lava o tupe mea uma e tausia ai.” O lana tala lea i le Fofoga o Samoa.

“E moni lava e faigaluega le toatele o le aiga, ae o tupe e maua mai ai e le taitai gafatia lea ma lava mo mea e moomia I totonu o lona aiga.

“O le ala foi lea ua ou manatu ai e galue le maumaga  e fesoasoani ai I seisi vagea o mea fai I totonu o le aiga.

O Titi e lei fai aiga, ma o lana galuega o lo’o faia i aso uma o le tautuaina lea o lona aiga pe a malolo mai lana galugea fealua’iva’a. 

“Tusa lava po o lea o le toatele i fea, o mea lava ua maua i lima ua lava lena ma totoe aua le tausiga o aiga. Ma o lo’u manao foi lea ina ia le sailia so’u galuega ae fai le fatu aiga tausi.

“O lea la ua ou fealua’i va’a ma malolo mai galuega aua e ta’i ono masina ma malolo mai ia o le maumaga lava e tua iai ma galue e fa’aoga ai le malolo mai. 

O lona manatu, e moni ua taugata le tau o le soifuaga ma ua fai lava sina taugata.

“A alu lava i luma le olaga ua siisii ai foi ma le tau o le soifuaga ma le tau o ana oloa o lo’o faatauina mo le lautele o le atunuu. 

Ma a fua atu iai mo a’u ma lo’u aiga e fai sina toatele ia e talanoa mai lava i le tele o tupe e faatino ai mea uma.

O le isi itu foi o le itu e faigata ai le tausiga o aiga ona o le tele o mea fai e fa’aalu ai tupe ma ua tupe a mea uma nei vaitau. 

Na ia faailoa foi pau le tulaga tele o lo’o alu ai ana tupe o le totogi ina lea o pili o le suavai ma le moli mo le aiga, ma fesoasoani i nisi o tulaga e moomia ai sana fesoasoani.

“Out e fesoasoani i nisi o o’u uso ma tuafafine pe a moomia se seleni aua le faaa’oogaina o tamaiti ma mea e fai e pei o foai i le lotu aua e seasea fai ni faalavelave faale-aiga iai i matou.

Na fesiligia foi e le Fofoga o Samoa Titi po le fea o galuega ma lona galuega i le maumaga e sili atu ona faigofie, sa ia taua e sili lava le maumaga ae o le itu e lelei ai foi le galuega o le tele o mea e fai ma o le tupe lava e mana’omia ae o le maumaga lava e sili atu.

© Samoa Observer 2016

Developed by Samoa Observer in Apia