PA LE TANE-SUAU’U MALIU SE TAGATA FAIGALUEGA, AE AMATA SU’ESU’EGA

Tusia Lanuola Tusani Tupufia ,

232 Hits

O lo’o faia nei se su’esu’ega i le mafuaga o se mu na tula’i mai i se tasi o tane o lo’o teu ai le suau’u-tiso i luga o le uafu i Matautu-tai, i le aso ananafi. 

O lea fa’alavelave na maliu ai lava se tasi o le ‘aufaigaluega a le Kamupani-suau’u, le PPSL, sa galue ai i le tane i le taimi na pa ai.

Sa ‘auina atu fo’i i le falema’i le isi tagata-faigaluega o le kamupani lava lea, peita’i ua toe te’a i tua. 

O le sasao o le mu lea ananafi, na matua gatete ai ma atu-popole le to’atele sa i le talafatai o Apia i lea taimi, o e sa i fale-faigaluega, o tagata-tafafao ma tamaiti-a’o’oga fo’i, na tu’ua uma o latou nofoaga sa iai.

O lea fo’i fa’alavelave, na matua le-tu-lelei ai a’ao o le Komiti Faufautua mo Fa’alavelave Fa’afuase’i, ona sa tau-vala’au uma a latou tagata-faigaluega, o tagata-ta’ito’atasi fa’apea tagata-faigaluega lautele mo se fesoasoani.

O le afiafi ananafi, na ta’ua ai e le Ta’ita’ifono o le Komiti lea, o Suluimalo Amataga Penaia, ua ma’ea le mu, ua pe le afi.

Na ia fa’amaonia fo’i, e to’atasi ua ma’umau ai lona soifua i le afi, atoa ma nisi sa tali atu – e aofia ai nisi o le vaega tinei-mu, na togafitia o latou a’afiaga ma toe fo’i ai i aiga.  

Suluimalo A. Penaia, le Ofisa Sili o le Matagaluega a le Palemia ma le Kapeneta, Agafili Shem Teo, Pule Sili o le EPC, Tologata T. Tuimalealiifano, Pule o Poloketi a le E.P.C, Fonoti Perelini ma le Fa’atonu Aoao o le Soifua Maloloina, Leausa Dr. T. Naseri

Suluimalo A. Penaia, le Ofisa Sili o le Matagaluega a le Palemia ma le Kapeneta, Agafili Shem Teo, Pule Sili o le EPC, Tologata T. Tuimalealiifano, Pule o Poloketi a le E.P.C, Fonoti Perelini ma le Fa’atonu Aoao o le Soifua Maloloina, Leausa Dr. T. Naseri

 

“Ua mae’a galuega fa’apitoa ma o lo’o fa’atalitali pea ne’i tupu mai se isi mea mulimuli atu,” o le fa’aaliga lea a Suluimalo.

Na ta’ua fo’i e le Ta’ita’ifono – o ia le Ofisa Sili o le Matagaluega o Puna’oa ma le Si’osi’omaga, pe tusa o le afe tone o le suau’u sa i totonu o le tane

Suluimalo A. Penaia, le Ofisa Sili o le Matagaluega a le Palemia ma le Kapeneta, Agafili Shem Teo, Pule Sili o le EPC, Tologata T. Tuimalealiifano, Pule o Poloketi a le E.P.C, Fonoti Perelini ma le Fa’atonu Aoao o le Soifua Maloloina, Leausa Dr. T. Naseri
Suluimalo A. Penaia, le Ofisa Sili o le Matagaluega a le Palemia ma le Kapeneta, Agafili Shem Teo, Pule Sili o le EPC, Tologata T. Tuimalealiifano, Pule o Poloketi a le E.P.C, Fonoti Perelini ma le Fa’atonu Aoao o le Soifua Maloloina, Leausa Dr. T. Naseri

O le tala na o’o atu ia ia, na ta’ua e Suluimalo, sa faia galuega o le tausiga masani o tane ia, atonu pe sa iai lava se mea na mafua ai le pa.

Na fa’aopopo mai fo’i, o galuega tau-so’oga-u’amea sa faia ai, ma o le tulaga lena na mafua ai le mu.

“O isi vaega o le ‘au-tinei-mu lea na a’afia ai fo’i ona o le vevela tele o le afi ma ua manavaina le suau’u ma le asu,” o lana fa’aaliga lea. 

 “O lo’o iai pea la i le falema’i. O le tagata lea ua maliu, na pa’u mai luga o le tane, le mea na amata ai le mu.”

Na vave lava le tali atu a le Ta’ita’ifono ma sui o le Komiti, e aofia ai le Soifua Maloloina, o Leoleo ma le Vaega Tinei-Mu ina ua o’o atu le vala’au. 

O le vasega o leoleo ma le Pulega o Fela’ua’iga i le Lau’ele’ele sa feagai ma le leoina o le nofoaga atoa i Matautu, lea sa ‘ave uma iai le to’atele sa taulalata i le uafu.

Na fa’ailoa mai fo’i e Suluimalo, o lana vaega atoa lea sa feagai ma feso’ota’iga uma ma atunu’u-tua’oi, ne’i iai nisi fesoasoani e mo’omia, pe o va’alele helikopa, ma latou e popoto fa’apitoa i vaega ‘ese’ese e mo’omia. 

Mo le su’esu’ega, na ta’ua: “Vagana lava ua te’a le vevela o le tane, fa’atoa amata ona o’o iai se isi, ne’i toe pa i le taimi nei o lo’o matua vevela lava.

“Ae fa’afetai, ua laki ona o le tane o le suau’u-tiso, semanu e matua fiu e tau-tape se mu pe ana o se penisini.” 

Na ta’ua fo’i, na o’o mai loli-fui-mu mai le Malae Va’alele, lea sa fa’aaogaina ai le fana-‘oa. Sa fa’aaogaina fo’i le suasami e tau-fa’aifo ai le vevela o le tane.

Na saunoa fo’i le Fa’atonu Aoao o le Soifua Maloloina, o Leausa Dr. Take Naseri, sa nofo-tapenapena fo’i le Matagaluega ne’i tupu se fa’alavelave matuia.

 “Sa lapata’ia lava le ‘au’aunaga fa’aSoifua Maloloina, ina ia nofo-sauniuni uma mo nisi e a’afia mai lenei fa’alavelave ae maise, ia tapena mo nisi a’afiaga matuia,” o lana saunoaga lea.

Ina ua tupu le mu, na tapunia uma a’oga i le taulaga fa’apea fo’i le ‘aufaigaluega a le malo i le taulaga, na fa’amalolo uma.

© Samoa Observer 2016

Developed by Samoa Observer in Apia