Taugatā le soifuaga
O le aso ananafi na maua ai le fa’atalatalanoaga a le Fofoga o Samoa ma le tamā i a Epati Aiolupu o Malie ma Faleasi’u.
Na ia fa’ailoa nisi o popolega o lo’o i a te ia i le taimi lenei pe afai e fa’aauau pea le tulaga e pei ona ua i ai le tau o le soifuaga i le taugatā.
“O lea le itu moni lava o lo’o ua i ai le taimi lenei.
“O lo’o ua tatou iloa uma lava o tupe o le ki lea o mea uma lava o le soifu’aga o lo’o ua tatou i ai e pei o tupe lava mea uma.
Na ia fa’ailoa manino lea tulaga ma na ia avea lona aiga ma fa’ata’ita’iga.
“Ia o si o matou aiga na nonofo i Malie ae o nisi fo’i lava o fuafuaga ua mafua ai ona se’e mai i Faleasi’u nei ma nonofo ai.
“Ia e pei ona outou silasila mai , e leai nisi o si o matou aiga, ua na’o o’i matou ma le lo’omatua ma fanau a la’u fanau.
“E leai ni vaega mautu e fa’apea ona mafai ona fa’alagolago i ai mo le tausia ai o le soifuaga.
“Ia e le matamuli lava e fa’ailoa atu le tulaga o lo’o ua i ai nei si o matou aiga, ua matua’i mana’omia lava se fesoasoani.
“O si a’u fanau matutua, ia o lea lava le tulaga o lo’o ua i ai le taimi lenei, ia ua matutua uma lava, ia e musu fo’i e fa’alavelave i ai le taimi lenei ona o le tulaga o lo’o taumafai ai fo’i le tausiga o latou aiga.
“E pei ona ua fa’ailoa atu o lea lava le tulaga o lo’o ua i ai le taimi lenei.
Na ia fa’ailoa o le tele o mea o lo’o to to i tafāfale e mo le tausiga o le aiga ae le o ni tupe maua.
“Ia ua matutua fo’i e fai fa’ato’aga mo le aiga aemaise o le fa’atauina atu.
“Ae pei o le tele lava o taimi o si o matou aiga i Malie o lo’o fesoasoani tele mai mo si o matou aiga i le tele o taimi.
“E leai se isi o faigaluega i le taimi lenei mo se tupe maua o si o matou aiga.
“Ia e mo le taimi lenei e le gafatia lava le tau o le eletise ia po’o se fale lelei fo’i e nonofo ai.
Na ia ta’ua le taugata le tau o le soifuaga o lo’o ua i ai nei.
“Ia o le taimi lenei o lea lava le tulaga o lo’o ua taumafai ai lava, aemaise na fa’ataotolia mai lava le lo’omatua i mai o le tino i le vaiaso ua tuana’i.
Mo se fesoasoani mo Epati ma le aiga, fa’afeso’otai le numera 7633611.