O la’u tala fo’i

132 Hits

1. Matauina i Tala  Fou o lea ua talosagaina e Le Tagaloa lona nuu o Sili ina ia mau le toovae ma ia tausi le filemu……! A tatou tilotilo la i lenei Tala Fou ma fesili pe aisea ua tulai mai ai le vevesi i totonu o lenei afioaga o Sili-o le tali- e mafua mai polokiki leaga ma le palapalā! O fea la o i ai nei polokiki leaga ae o lea ua fetuatuana’i le afioaga? A toe faaupu-o fea la o i ai polokiki leaga ae o lea ua fefulituaa’i le afioaga?

O le a le pogai ua le alu ane ai e fofŏ le faafitauli lea ua pogai mai ona o le lote fua ma fiapule i faavae ta’oto o afioaga ma itumalo? Ua silasila i le tofā mamao a le Afioga i le Papā!

E tiga lava ona faalumaina lona tulaga mamalu talu ai polokiki leaga-ae na te faatauina pea ma faamuamua le alofa i lona nuu ma lona itumalo! Ia-o lea la ua aumai le finagalo o le afioaga-ua tafi ese ma le nuu ma ua tapu ona toe tu-vae i laueleele o Sili! E mafai la e polokiki leaga ona toe faalelei le va lea ua tala i le va o le afioaga o Sili ma matai o le latou nuu? E i ai la ni eleele o polokiki leaga e nonofo ai matai ia ua faate’a ma le nuu? O  le a la sou taofi? 

2. Matauina foi i Tala Fou le anoano o fautuaga ina ia faaaoga tatau le palota a le tagata lava ia-ae o le amana’ia pe leai o ia fautuaga matagofie ma le moni- e faatoa iloa lava –pe a ta le logo.

E mafua se manatu-ona a tuu i le Tulafono e pei ona laulau mai e le Ofisa o le Komesina o Faiga-Palota-e leai lava ma se mea e tasi o tausisia! Mo se faataitaiga- fai mai –ia alu lava le tagata palota ia i le fale palota-ae o le matau i ai-o lea lava sa la’u mai tagata palota e taavale a sui faatutū!

O le fesili la- afai o aiaiga ia e pei ona tolaulau mai e le Ofisa o Faiga-Palota-aisea ua le faia ai ni a latou fuafuaga- e mata’itu ai lea faafitauli -aua o lea e soli le tulafono! Afai la e na ona tolaulau mai o lea tulafono ma lea tulafono-ae le o tuliloaina pe o tausisia pea leai- o lona uiga la-o se tulafono mo isi sui faatutu ae le o sui faatutu uma mo le Faiga-Palota! O le a la sou taofi? 

Matauina foi i Tala Fou ata o le Palemia ma le ata o le Taitai o le Tautua Samoa Party. O le ulutala la o le ata o le Palemia-fai mai o Atiina A’e mo tagata-ae o le ulutala o le ata o le Taitai o le Tautua Samoa Party-fai mai-“Palota mo se Suiga”! O le matau la i le ulutala Atiina A’e mo Tagata-o atiina a’e lava ia ua fia tausaga o taulagi mai-ae matua leai lava se manuia o tagata o maua ai!

O lona uiga la-e le o ni Atiina A’e mo Tagata-ae o Atiina A’e mo le Malo lava ia! A tuu la i le ulutala o le ata o le Ta’ita’I o le Tautua Samoa Party- fai mai –“Palota mo se suiga”….!

O lona uiga la- e tatau i le atunuu ona tilotilo lelei i atiina a’e ia o loo ta’ua e le Palemia pe o manuia ai pe leai! Afai la o le tali- e leai se manuia o le atunuu o maua mai ai- o lona uiga la- ua tatau loa ona palota mo se suiga e pei ona fautuaina e Palusalue! Aisea? Afai o loo pologa le atunuu ma matitiva-e le faapea la se’iloga e afio mai Iesu e sui ona faatoa sui lea!

O le mea moni lena e igoa o le fia fai-tavini! Ua uma ona aumai e le Alii le poto ma le mafaufau i le tagata e fai ai lana filifiliga mo lona lava manuia i le lalolagi nei! Afai la tatou te le o faaaogaina le poto mai le Atua e fai ai se suiga mo lo tatou manuia-o ai la e sau na te faia? Afai o e iloa e le o manuia oe ma le atunuu atoa-o oe e faia le tonu e te manuia ai. O le a sou taofi?

© Samoa Observer 2016

Developed by Samoa Observer in Apia