TALATUU O ‘IETOGA O LE MOEIUANIU-FAAOTI-GOGOTAI- MA LE TAMA-A-LE TOLOA

05 March 2016, 12:00AM

O le ulua’i ‘ietoga o nei ‘ietoga e lua-  na lalaga i Napu’a i Fagaloa e Tufi- le faletua o Ulualofaiga. O Ulualofaiga o le uso o Tuitoga Faaulufanua-ae o lona afafine o Vaetoifaga le masiofo a Tuiaana Tamalelagi ma o ia o le tina o Salamasina. Na malaga mai le Tuitoga ma ni ana auauna se to’alua o Saulualo ma Fea. 

O Fea e to’alua lana fanau teine o Tufi ma Tafimalae.O Tufi na ia muamua ona lalaga le ietoga lenei o le Moeiuaniu, lea na ave i le atalii o Ulualofaiga o Talamaivao i Fagaloa. O lona atalii o Toianofo na avatua le ‘ie ia Vaetoifaga-ma e pei foi o le Lagavaa-sa avatu uma ia ‘ietoga ia Salamasina. O le ‘ietoga lona lua o le ‘Leatumauga’ na lalaga i se ogaeleele i uta mai Napu’a i Tuanapu’a- e le afafine lona lua o Fea o Tafimalae.

O le “Faaoti” na amata ona lalaga i Saginoa-i le nofoaga lava e tasi lea na lalaga ai le “Lagavaa.” O Tonumaipe’a Saumaipe’a na alu atu i se malaga i Salani le nuu o lona faletua o Sivalavala-na faamuta ai le lalagaina o lea ietoga.

Ona o Tapumanaia le atalii o Saumaipe’a mai lana mafutaga muamua ma Tuaetali-na pogai ai ona o’o atu lea ‘ietoga ia Salamasina lea na ia tuuina atu ia Tuisamau (Fata) e fai ma taui o le suafa Gatoaitele. 

O le “Gogotai” e ui lava ina afua mai lona igoa i le tagi a le manu o le gogo, ae sa lalaga i Va’aua- o se nuu-a-uta lea o Lufilufi, e Pu’aloā-o le alo tamaitai lea o Tusa-le failauga iloga o Lufilufi. 

O Pu’aloā lenei na nofo ia Samaila Salilō o Falease’ela ona maua ai lea o Samaila-ia-Futi ma le teine o Avegatoloa. 

Na nofo Avegatoloa i le atalii o le atalii o Tuala ona maua ai lea o Fenunuti, ae o lana usuga lona lua ia Uiutafanua na maua ai  Sinauli, le tina o Fuatino lea na nofo ia Fonoti. O le pogai lea o le alu o lenei ietoga ia Fonoti lea na ia tuuina atu e faafesuia’i mo le suafa Tuiatua- ia Lufilufi lea fai mai tala e umi se taimi sa i ai pea lea ‘ietoga i Lufilufi. 

O le Tamaaletoloa e faapea o le taimi lava na nofo ai Teu’uamaua le alo o Liu i Lufilufi i lona maota-na ia lalagaina ai lea ‘ietoga-a’o milimili e se toloa (manulele) lana toloa’i. Ina ua vaaia e Teu’uamaua lea faiga a le toloa-na alaga ai loa-“Le toloa e matua e alofa i si au tama-ua maua le igoa o la’u ‘ietoga’ o le “Tamaaletoloa”.Ae ui o lea na o’o atu foi lea ‘ietoga ia Fonoti ina ua nofo Teu’uamaua ia Auvaa o Falealupo ona maua ai lea o Ugapo. 

Sa mulimuli ane ona nonofo Ugapo ma Tautala-i-moega le alo o Togi iTifitifi-ona maua lea o Alolenei, o lana tama teine o Talaleomalie na nofo ia Faumuina-ona avea ai lea o ia ma tina o Fonoti. O lenei foi ‘ietoga-ona o faiga a Fonoti na toe o’o atu ai lenei ‘ietoga i Lufilufi lea fai mai e tele tausaga o i ai pea. 

O ‘ietoga nei e ono e aupito i sili ona lauiloa i aso ua mavae; e tele foi isi ‘ietoga sa i ai e pei o le “Pulu” ma le “Leuleu” a le Aiga Sa Tuala ma le Aiga Salevalasi. O ‘ietoga a Mataafa sa iai o le “Laga’ula-ma le ‘ietoga a Saanapu e igoa o le “Fauomapiva”. A tatou faitau mae’ae’a la i tala o nei ‘ietoga-ona tatou talitonu lea i le pogai o le malosi tele o le Aiga o le Tuiaana. 

05 March 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>