Saunoa le tamā i le faigata o le olaga

Tusia Deidre Tautua – Fanene ,

43 Hits

Iosefo Ioane.

Iosefo Ioane.

O le faigata o le olaga i totonu o le aiga o se itu lea na talanoa ai le tamā o Iosefa Ioane mai le afioaga o Leulumoega.

O lenei tamā ua 59 le matua o le soifua ma e to’alima lana fanau.

O le faigata o le olaga o le tausiga lea o lana fanau ma fanau a lana fanau.

Sa ia ta’ua fo’i e to’atasi le tagata faigaluega o lona aiga o le tasi lea o ona atalii o lona uiga o isi o lana fanau e leai ni galuega o lona uiga e nonof ma o latou ta’ito’alua ae fa’amoemoe atu i a laua ma le tinā I le tausiga.

 “E ese le faigata o le to’atasi o le tagata faigaluega o le aiga,” o lana saunoaga lea i le Fofoga o Samoa.

 “O lea ou te tausia uma latou ae le’o lava le tupe e tausi ai si a’u fanau laiti ma lo’u aiga atoa.

“E i ai fo’i si o’u afafine o lo’o aumau i atunuu mamao o lo’o fesoaosani malosi mai i le tausiga o matou uma.

“E le faigaluega fo’i lo’u afafine na o lona to’alua e faigaluega ae o lo’o alofa mai pea.”

Sa ta’ua e Ioane a o’o i aso totogi o lona atalii e le umi lava ona fa’aaoga ae leai se mea.

“e fai o meafai a le lotu, o le nuu ae sili ai lava le aiga,

“E i ai taimi e sau ai le fa’alavelave ua le gafatia ona fai ae o le tele o taimi e fai lava.

“a tupu mai la o lona uiga ua leai se tupe mo lena vaiaso ona o le tele o fa’alavelave.

“Ae ui i lea e le’o taofia ai lava le tiute fa’aletamā o Ioane i totonu o lona aiga.

“O lona naunautaiga ia manuia olaga o lana fanau iti ma maua ni latou lumanai manuia.”

Fa’afesootai le numera o le telefoni 7228865/7260631 pe afai e te fia fesoaosani i a Ioane ma lona aiga.

© Samoa Observer 2016

Developed by Samoa Observer in Apia