Aeto ma Pi

By Fa’aliliu e Maiava 08 April 2016, 12:00AM

Toe mafaufau tasi lava…

O pi (lago-meli) ma aeto, o meaola e matua ‘ese’ese mamao a latou taga ma aga atoa fo’i ma mea e a’ai ai. O aeto, e felelei maualuga ma ta’amilomilo solo e va’ava’ai ni manu-lavevea po’o manu-mamate fo’i.

A va’aia loa se manu, fa’aifo ane loa, saei ma a’ai fiafia ai se’ia mae’a lelei. Ae matua ‘ese mamao ai la lago-meli. O pi fai-hani nei, e na o le feoa’i solo, e felelea’i mai lea fugala’au i lea fugala’au e sa’ili sua-suamalie mananaia o la’au.

O aeto, o foliga ma va’aiga masani lava, e tupu ai le fefe, le tiga ma le oti fo’i, pe a va’aia i le taimi e a’ai ai. A’o lago-meli, e maua ai fa’amoega e tumu i le meli-suamalie, e maua ai le soifua-maloloina lelei, e maua ai fo’i le fiafia o isi tagata. 

A o le mea mata’ina la, pe aeto pe lago-meli, e mautinoa lava, e maua lelei mea o lo’o manana’o iai! Pei a o se fafine, e tele ina na maua mea lililo na te fia iloa i lona to’alua.

E tilotilo i mea uma e fa’anaunau i ai: mea lelei ma mea le-lelei fo’i. Afai o fa’aletonu o le toea’ina na te fia iloa, e mautinoa lava na te maua lelei. Ae lagona loa e le tamaloa ua tau le-amana’ia o ia e le fafine, fa’apea e leai sona aoga, e amio-sese ma isi mau fa’aletonu, e te silafia la o ai le tagata mulimuli e mana’o la te fa’atasi?

Ioe, o lona to’alua! Talu ai, ua na lagona, e le mafai ona ia toe fa’amalieina lona to’alua pe o toe iai fo’i sona lelei mo ia. 

Ae a sa’ili loa e le fafine uiga lelei o lona to’alua, e mautinoa lava, o le a atili fiafia ai, o le a atili fa’aaloalo ai ma aloa’ia o ia. Ma e le gata o le a fiafia ai le tamaloa e fa’atasi ma ia, a o le a atili naunau ai fo’i ia avea o se tamaloa lelei mo lona to’alua. Pei o saunoaga a le sa’o o le i si aiga:

“O uiga lelei o lou to’alua ia fa’alagi, ae fa’apasi-teisi ona fa’aletonu ma sasi.”

Manatua: “O le fa’a-leagaina o lou to’alua, e le lelei mo lou fatu – fa’apena fo’i ia.” O le mea moni: “E tele atu mea lelei e te faia mo lou to’alua, pe a e fa’asa’osa’o muamua ou fa’aletonu nai lo le taumafai o

‘Oe, e fa’asa’o Ia..A tele sou taimi e alu i le fa’aleleia muamua o ‘Oe lava, o le a la’ititi fo’i ou taimi e totoe, e faitioina ai lou to’alua.” 

Ae ‘aua ne’i galo, e matua ‘ese’ese mamao tatou, ma aeto ma lago-meli. E le iloa e manu o latou mana’oga, o lagona, mana’oga ma amioga, a’o tatou o tagata-soifua na faia e Le Atua Soifua, tatou te faia tonu ma fa’atatau, ma filifili i mea e mafaufau ia, mea e tautatala ai ma mea fo’i e ao ona fa’atino.

Afai o ‘Oe o le fafine po’o le tamaloa e te le’i fa’amalosi’Au lava ma avea o se to’alua alofa e mo’omia e lou to’alua, ua tatau nei ona e tatalo ia Iesu e fa’amagalo ‘Oe. Tatalo ia pulea mai e Ia lou fatu ma lou tagata atoa, ina ia amata ona suia lou olaga, e avea ai o se fafine ma se tamaloa lelei e mo’omia e lou to’alua. Toe mafaufau tasi lava…           

By Fa’aliliu e Maiava 08 April 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>