Filifili e avea ma faiaoga

Tusia Ilia L Likou ,

94 Hits

Sisa Apulu.

Sisa Apulu.

O le taumafai ai o le olaga o Sisa Apulu i le aoga o se tulaga fiafia tele lea mo ia.

“Ia o a’u e lona lua i le fanau e to’aono a nai o’u matua.

“O lo’o i le Vasega 12n a le Kolisi o Leulumoega Fou.

Na ia fa’ailoa o le vaai ai le lima vaivai o lona aiga i le tele o taimi i le tau faasoasoaina o le tupe maua e unaia ai lava o ia i le aoga.

“Ia o le tele lava o taimi ou te vaai lava ma le alofa i nai o’u matua i le taumafai lea e faasoasoaina o le tupe maua.

“E na’o si o’u tuagane olo’o faigaluega ia ma e le taitai ona lava le fa’asoa, o lo’o fa’atino fo’i e le tama nai galuega laiti i le fale i le faia lea o moavao, ma olo’o fesoasoani tele.

O le toe a’e ai o aoga o lenei tausaga o se isi lea vaega fa’aopopo o tupe alu o le aiga.

“Ia o ma’ua ma lo’u uso matua o lo’o i le aoga uma, ma e mana’omia lava tupe i le totogiina o ma pili aoga.

“E pei o lea lava le mafuaga e taumafai ai lava ina ia i’u lelei a ma aoga, ina ia mafai ona o ma atia’e i o ma aiga.

Na ia ta’ua o ona matua o lo’o una’ia o ia i a’oa’oga.

“Ia e pei o lea lava le fa’amolosi o nai o’u matua, ina ia fai lelei le aoga ua le toe faigofie nei aso.

“O lea lava e taumafai ai pea ina ia mafai ona ausia lelei ma fa’aiu ma le manuia aoga.

“E pei ona fa’ailoa atu ia ua le faigofie lava nei aso, e o’o lava fo’i se suka i nisi o taimi i si o matou aiga, ia e taumafai lava e fa’amuamua aoga a’i matou le fanau.

O a ni fa’afitauli lenei taimi i le toe a’e o aoga?

“Ia e  pei ona fa’ ailoa atu ia o pili aoga lava, e alofa lava i nai o’u matua po o le a le tele omea fai e ave lava le faamuamua i aoga.

“Ia o lea fo’i e le’i taitai ona uma le kuata lenei ae o le la fo’i ua amata ona su’esu’e auala ina ia vave ai ona totogi o matou pili aoga.

“O la la’ua lu’i lea i a te’i matou ia to’a’aga i le aoga.

O le a se tagata e fia avea ai oe pe a e matua?

“Ia ou te mana’o e avea a’u  ma faiaoga.

“O si o’u tina lava e una’ia a’u ina ia ou toaga i le aoga ina ia mafai ona ou ausia la’u miti o le avea ai o a’u ma faiaoga.

“Ina ia mafai ona o’u a’oa’oina lelei tamaiti ia fai ai fo’i ma so’u sao le atunu’u aemaise ai lava le atina’eina o lo matou aiga.

“Aua se lumana’i manuia.

© Samoa Observer 2016

Developed by Samoa Observer in Apia