Ta’ita’i e le Sui-Palemia le ‘Aumalaga a le Polenisia

177 Hits

Fonotoe Pierre Lauofo

Fonotoe Pierre Lauofo

Ripotia e Tusitala a le Samoa Observer

Fa’aliliu e Maiava

 

O le Afioga a le Sui Palemia, Fonotoe Pierre Lauofo o lo’o ta’ita’ia le ‘aumalaga a Samoa lea na tu’ua le atunu’u i le aso ananafi mo Aukilani i Niu Sila.

O le a fono Fonotoe ma lana ‘Aumalaga ma le Peresetene o le Malo o Farani Polenisia, o Eduard Fritch i le asō, e talanoaina le isi la’asaga mo le Maliega o Femalamalamaa’iga na sainia e le Kamupani a le Polenisia ma le Air Tahiti Nui (ATN) mo faigamalaga i le va o Samoa ma atunu’u i fafo.

O lo’o ‘auai ai fo’i i le fono lava lea, le Palemia o le Atu Kuki, o Henry Puna, e mata’itu pe fa’apei ona manuia ai lona fo’i atunu’u mai lea fuafuaga. Ua māua e le Samoa Observer, o lo’o ‘auai ai fo’i sui o le malo o Tonga.

O lo’o malaga fa’atasi le Sui Palemia ma le Ofisa Sili o le Kamupani Va’alele a le Polenisia,  o Seiuli Alvin Tuala, o le Pule Sili o le Pulega o Malae Va’alele, o Magele Hoe Viali ma le Ofisa Sili a le Pulega mo Tagata Tafafao, o Papali’i Sonja Hunter. 

O Eduard Fritch, o lo’o malaga fa’atasi ma le Ta’ita’ifono, o le Ofisa Sili lava lea o le Kamupani a le Air Tahiti Nui, o Michael Monvoisin, le Minisita mo le Atina’e o le Tamaoaiga, o Teva Rofritch ma le Faufautua Fa’apitoa mo Mata’upu o le Lotoifale o le Pasefika a Farani Polenisia, o Manuel Terai. 

O le Maliega i le va o le Polenisia ma le Air Tahiti Nui, na sainia latalata i le fa’ai’uga o le tausaga talu ai ma sa fa’alauiloa fa’alaua’itele e le Palemia o Tuila’epa Sa’ilele Malielegaoi.

Na fa’aigoaina e Tuila’epa le maliega lea o se “’ausaga o le a fa’amauina i tala-fa’asolopito” ma ta’ua ai, o lea taunu’uga, e atagia ai le agaga moni fa’aPolenisia o le galulue felagolagoma’i fa’aleUso.  

 “Ua talafeauga lelei lea ma le va’ai-mamao a Ta’ita’i o le Vaega a Malo Polenisia, e feso’ota’i ai atunu’u Polenisia ma isi a’ai tetele o le lalolagi o lo’o fa’atino ai le tele o a tatou fefa’ataua’iga,” o lana saunoaga lea. “E taua tele i atunu’u Polenisia feso’ota’iga nei i le ‘ea ma o le tasi lea o avanoa mata’ina e fa’alauiloa atu ai le matagofie o iai i o tatou motu nei.”

Na ta’ua fo’i e le Palemia, mo Samoa lava ia, o le so’otaga va-va-lalata ma le Air Tahiti Niu, ua matala tu’usa’o ai Samoa i atunu’u i Asia, Amerika  ma Europa.”

“O le faiga-pa’aga lea o le a tali ai le mana’oga ua leva ona mo’omo’o iai i tulaga tau-tagata maimoa mai fafo. O le a matala tu’usa’o mai ai maketi i le Iunaite Setete ma Europa i tulaga tau-fefa’ataua’iga ma tagata-asiasi lea e le’i taitai o’o iai Samoa ona o le leai o ni malaga tu’u-sa’o."  

Ae le pau ai lea.

“O lenei fo’i faiga-pa’aga, o le a maua ai avanoa mo Atu Asia e ala atu i Narita i Iapani, ma maua ai fo’i avanoa e femalagaa’i ai le to’atele o tagata Asia o lo’o galulue i Samoa nei, ae fia malaga i so’o se atunu’u i Asia,” o le saunoaga lea a Tuila’epa.

“O le a maua ai fo’i e o tatou tagata faipisinisi ni feso’ota’iga lelei ma fa’aitiitia ai tau o ‘auina atu o oloa i ia atunu’u. E mautinoa fo’i, o le a manuia ai a tatou i’a e ‘auina atu i fafo aua o le a maualalo tau o fela’ua’iga mo o tatou tagata faiPisinisi.”

Afai ae manuia lenei fa’amoemoe, o le a galulue so’o-so’o-tau’au loa le Air Tahiti Nui ma le Polenisia ma amata lea ‘au’aunaga o malaga e ta’itasi i le vaiaso i Tahiti/Samoa/Iapani/Samoa/ma Tahiti. 

O le a iai fo’i le malaga i Los Angeles/Apia/Aukilani/Apia/Los Angeles e fa’alua i le vaiaso, e fa’aaoga ai le tasi o va’alele e lima o le Aerobus A340-300 a le Air Tahiti Nui, lea e 30 nofoa i le Vaega Fa’apitoa ma le 264 i le vaega lautele.

O le Air Tahiti Nui, o se kamupani ua felelea’i i so’o se vaega o le lalolagi, lea e fa’alua ona lele i Los Angeles mai Tahiti i vaiaso ta’itasi, e lelei i aso uma i Pale i Farani, fa’atolu i le vaiaso i Aukilani ae fa’alua i le vaiaso ona lele i Narita i Iapani, e fa’aaogaina ai ana va’alele o le ituaiga o le Aerobus A430-300 e lima. 

E iai fo’i femalagaa’iga fa’aLotoifale a le Air Tahiti Nui, lea e femalagaa’i i malae-va’alele e 41 i totonu lava o lea atunu’u e fa’aaoga ai ana va’alele laiti. E iai fo’i malaga e aga’i ai i le Atu Kuki e ta’itasi i le vaiaso.

© Samoa Observer 2016

Developed by Samoa Observer in Apia