Manatu o le Fa’atonu - Ua outou lailai i le mativa? E tatau ona tatou fesoasoani ia i tatou lava

638 Hits

Tusia - Mata’afa Keni Lesa

Faaliliu e Seagaitumua Tupuola 

 

E le masino mea e tatau ona tatou faitio ai pe a pa’ia la tatou aufaigaluega i totonu o le atunuu. E masani ona tatou faalogo i mea e peiseai e le o faamaoni i latou, faatalale ma e mafai lava ona latou sailia soo se auala e gaoi ai mea mai ia i latou e pulea a latou galuega. 

Ma o nisi e amio faapena. Silasila i le faatupula’ia vave o le aofai o pagota i Tafa’igata. O loo filo ia i latou nisi e matua atamamai lava ua pa’u’u atu e fai ma mea’ai a le faaalualuŏ, faaosoosoga ma una’iga malosi o le olaga. Mo le aufaigaluega i totonu o le atunuu, o le faaseā mai ia i latou e ou galuega e pa’ia lava le mea moni e faapea o le toatele o i latou e amio e pei o ni sifi i taimi uma ae sa tatau ona avea i latou ma tagata Initia. 

E faasolo ina matua sili ona leaga pe a outou faaopoopo i ai ma le anoano o mafuaga e ‘alo i ai mo le leaga o le faatinoina o le galuega, ma le le ma faitaulia o faalavelave e tatau ona latou auai (o le uiga o la’u upu e faafia ona oti se uso lona tamā poo le tuagane o lona tina i le faagasologa o le tausaga?), o aitalafu i vaiaso uma (faaunegatupe) ma le leai o se faafetai e uiga i le mea moni-ona o le i ai o a latou galuega.

O le mataupu mulimuli o se mataupu faatiga-ulu lea-talu ai o le toatele e tolotolo mai pe a latou manaomia se galuega. I nisi itu, latou te matua aioi mai lava mo se galuega ma e ala ona tuuina atu i ai ina ia faagalo ai le taua o se tulaga pe a faafaigaluegaina pe a fua i le faitau selau ma selau o isi tagata o lenei atunuu e leai ni galuega.  Ia ona faasolo ai lea ona matua leaga a latou amio se’ia ina tutuli i latou. Ma o lea faagasologa e faaauau pea lava.

O se faagasologa e matua faigata lava, o se faagasologa lea ua faamalosia ai le tele o pisinisi, a le atunuu ma pisinisi e pulea e tagata mai fafo, e tilotilo i se isi atunuu mo ni tagata faigaluega. I le taimi nei la pe a mafaufau i le faatupula’ia o le aofai o tamaitai teu fale mai fafo, tagata faigaluega fau fale ma isi lava tagata faipisinisi i totonu o Samoa mo se faata’ita’iga. A e fesili i le toatele o tagata faipisinisi pe aisea ua latou filifilia ai lea faiga, o se tasi o tali masani e aofia ai le leai o se faamaoni mai tagata faigaluega o le atunuu. O le a latou ta’u atu ia te oe e faapea o nisi o tatou lava tagata e mafai lava ona latou gaoia tupe mai lou ofuvae pe afai latou te mafaia.

O se mea lea e matua leaga lava. Mai le vaai faa-pisinisi, e le o se mea faigata ona malamalama pe aisea ua latou faia ai le mea o loo latou faia. O le itu taua lava e tau lava i le mea moni e faapea-a faaalu e tagata e ou galuega-poo tagata e teu faafaigaluega a latou tupe mo lea tulaga-a latou tupe na maua i le afu maligi, latou te manaomia ni taunuuga. Latou te le manaomia ni faaupuga e ‘alo i ai, latou te le manaomia ni mea faatiga ulu, aemaise ai lava le faafeagai ma le le faamaoni ma mafuaga e ‘alo i ai ia e faailoa mai ona o le faaauau pea o le leaga o le faatinoina o galuega. Ma ua matua tatau ma talafeagai lena. O ai na te manaomia lena tulaga?

O le faafitauli mo Samoa e faapea o nei amioga o loo faauau pea ona fai ma faatiga ia i tatou, i le avea ma atunuu. O lea matou te talanoa atu e uiga i le mativa, matou te faitioina le leai o ni avanoa, ae o nisi taimi- o tatou fili e sili ona leaga o tatou lava tagata. E peiseai e le o faafetaia e o tatou lava tagata ia avanoa- ma o lea latou te feoa’i solo ai ma faaleaga ia avanoa mo isi tagata. A tatou silasila faataamili ia Samoa i aso nei, e anoano konekarate faufale o loo faafaigaluega ai tagata faigaluega mai fafo. O nei tagata e galulue mai le tafa o ata se’ia pogisa. I le aso atoa-ma aso uma.  

Matou te fesili pea pe aisea ua le faatumuina ai nei galuega e tagata faigaluega o le atunuu. E tatau ona latou galulue ai, aemaise ai lava i totonu o se atunuu e mamao avanoa faigaluega toe itiiti. I nisi taimi tatou te tuua’ia le malo. Tatou te fetagisi ona o le latou le mafai ona maua mai ni galuega o tatou tagata, ia e tatau ona latou galulue ai. Matou te malamalama e faapea e ui lava ina i ai tiute tauave o Samoa i lalo o feagaiga sa’oloto tau fefaatauaiga e aofia ai tagata faigaluega mai fafo, ae o le mea moni lava ia e tatau ona i ai se mea i totonu o ia feagaiga e faamuamua ai le tuuina atu o galuega i tagata o le atunuu. 

O le isi itu, a tatou tilotilo i nisi o galuega o loo faatino i Samoa nei e tagata mai fafo i aso nei, o le a se mea e sili atu e manaomia ai le poto masani tau le aveeseina o ni nai ma’a ma simā mai le A i le B? O le mea mautinoa-o lena galuega e mafai ona fai se tagata Samoa, a ‘ea?

O le itu lea e tau faailoa atu e faapea e tatau i le malo ona avea ma faamuamua le mautinoa o ia galuega e mo tagata o le atunuu pe a pa’ia galuega tetele e faitau miliona ma miliona tala le tau.  .Tama’ita’i e ma alii, o lenei itu e le faapito i le maua mai o galuega ma le tuuina atu o tupe i o tatou tagata-ae o le faia lea o ni avanoa, o lea itu e faasino i le una’ia o se manatu o le mitamita i o tatou tagata e ala i lo latgou sao i le atiina a’e o lo latou atunuu.

O lea itu e faasino ia i latou ma le fausia o le tala faasolopito le o le a mafai ai ona latou ta’u atu ia latou fanau ma tupulaga lalovaoa o lenei atunuu. O lea itu e faasino i le pulea o le mea o loo tupu i totonu o Samoa. I lenei la tulaga, e talafeagai ona fai atu e faapea atu e leai se mea faapena o tupu i le taimi nei. Ma e le mafai ona tuua’ia ai na o le malo. O le latou galuega o se galuega fiti talu ai le faitau miliona ma miliona o loo aafia ai, o nei kamupani latou te le mana’omia le mate faalua o le mea latou te maua mai tagata faigaluega o le atunuu. 

Ona aumai ai lea o i tatou i le tulaga e faapea afai tatou te manaomia i le avea ma tagata Samoa le faaleleia atili o le tatou pitolaau, e tatau ona tatou matua fesoasoani ia i tatou lava muamua. E tatau ona tatou amata ma tulaga faavae.  

A faapea la ua maua sa’u galuega, taumafai ia taunuu i ai i le taimi e tatau ai-o le tulaga muamua lena. Afai o lo’u taimi amata o le 8 i le taeao, e le faapea la ou te taunuu atu ua 5 minute ua te’a ai le 8 i le taeao. E a pe a e taunuu i le 7.50 i le taeao?

E tatau ona ‘ou taumafai e fai se galuega lelei e aunoa ma le tilotilo solo i taimi uma mo se mea e gaoi. Atonu e le o tilotilo mai le pule-ma atonu e leai foi ni mea pu’eata o lea nofoaga-ae o loo silasila mai lava le Atua. O le Atua lava lea tatou te faanatinati i le falesa i Aso Sa ma faafoliga na te lei silafia le mea na tatou faia. Ia faapea foi ona aveese mea e te ‘alo i ai ae fai na o le mea o loo totogi ai a’u ou te faia. Tuu le tilotilo i le isi tagata faigaluega ma faatusatusa oe ia i latou, tuu i e pule e tilotilo i ai i latou.

O le itu e sili ona taua, ia e faamaoni.E i ai le mafuaga o lo latou fai mai o le faamaoni o le faiga faavae lea e sili ona lelei. E mafua ona a tatou faamaoni, ona to’ulu lea o mea uma lava i o latou nofoaga tonu. Tatou te galulue ma le faamalosi, tatou te galulue e tusa ai ma o tatou tiute ma o le a una’ia i tatou i taimi uma lava ina ia faalelei a tatou galuega lea e mulimuli ane ona avea ma o tatou tofi i le olaga nei. O iina e maua ai taui. O le a tu-matila la tatou galuega, o le a mata’tuina i tatou e o tatou pule ma o le a e le talosagaina se siitaga o lou totogi. Talitonu mai oe, e mafai ona tino mai! 

Ia outou maua se Aso Faraile mata’ina Samoa ma ia faamanuia atu le Atua! 

O se itu lea e faanoanoa ai ona o lea ua i ai le taitai o le Itu Agai lea o loo tau alaga atu i le isi itu ma tuua’ia le malo ona o le mavaevae o lana itu ae o loo i ai lipoti i lea itu ma lea itu e uiga i sui o lana lava vaega ua fuafua e auai e auai i lea lava vaega ua tuua’ia. I le toe vaai la i tua, matou te malamalama e faapea e le faigofie mo sui auai o le itu agai. E anoano mafuaga ua pogai ai. Ae faapefea le faatosia a o latou tagata o i totonu o le malo ma le ono maua o tofi faa-minisita i le isi malo-pe a fua i le mea moni o loo faifai malie lava ae ua mautinoa ua malepelepe-o ai o le a le tofotofoina? 

A tatou foi la ia Palusalue, o se mea uiga ese ona e ono mafai ona avea o ia ma Sui e toatasi o le Palemene ua kiki i fafo ma le Maota i le faagasologa o le taualumaga o loo faagasolo nei.

E anoano faaupuga o lena mea.Ua e aveeseina upu faa-pata mai totonu o le Maota e uiga i le aganuu a Samoa ma le manaomia o le faaaloalo lea na mafua ai le faaiuga a le Fofoga Fetalai, ae o le mea moni lava ia- e na o Palusalue lava sat u-poupou ma tulei tuaoi ma fai fesili sa tatou mana’omia uma tali. 

Faaigoa pea o ia o le “faavalevalea” ma o le “vale faata’ita’i” poo le a lava, ae saili ia te a’u ona i ai se “vale faata’ita’i” e avea ma alii lototele, talitonu i lona talitonuga, faiga faavae  ma taofi mamalu e avea ma ta’ita’i i lo le tele o polokiki atamamai e na o le nofonofo i luga o le aupa ma faa-foliga o loo lelei mea uma ae o lea e faifai malie lava ona pala le pogai ona ua toe alofia foi e le malo le talanoaina o se mataupu o loo taofia ai pea i tatou i tua. O le a sou taofi? 

Ia outou maua se Aso Faraile uiga ese Samoa, ma ia faamanuia atu le Atua!

© Samoa Observer 2016

Developed by Samoa Observer in Apia