O la’u tala fo’i

05 February 2016, 12:00AM

1. Matauina i Tala Fou ananafi-o loo i ai se ulutala e faapea ua fulitua ia Savaii-ma o le mau lea a le Tautua Samoa Party. O lea la ulutala- e faasino i le tofia e le Malo o ni faipule se to’alua o le HRPP- i le Fono a Sui Tofia-ae leai se faipule o Savaii o aafia ai. O le finagalo faaalia lea o le Faipule o Salega-o Afualo Dr. Wood Salele.

E tusa ai la ma sona finagalo faaalia i le talanoaga ma sui o nusipepa ananafi-fai mai ua matua popole lava Afualo-ona o le le tofia o se sui mai Savaii i le Fono a Sui Tofia.Fai mai la Afualo-o le faaupuga la a le Malo fai mai o le mea e lelei mo Upolu- e lelei foi mo Savaii-ua le talafeagai.

O le fesili la-o manatua e Afualo na tofia muamua e Tofilau le sui o Savaii i le Fono a Sui Tofia? Afai la e le o silafia e le Faipule o Salega lea tulaga-ina o lena ua faamanatu atu! Ae o le fesili lava i le Faipule o Salega-o le a sou finagalo?

E sa’o le mea lea ua fai e le HRPP o le tofi o ona faipule i le Fono a Sui Tofia? A toe faamalamalama atili-o se mea lea e pule ai le HRPP poo le atunuu atoa? Afai la tatou te talanoa i le Fono a Sui Tofia- e moni e le o fai mai le Faavae poo ai e tatau ona avea ma Sui Tofia-ae o le fesili-o ai la le Sui muamua lava o le Fono a Sui Tofia? 

O ni faipule poo se Tama –a-Aiga? Pe o aiaia la pe leai i totonu o le Faavae-ae a tatou fesili la poo ai le Sui Tofia muamua lava o le Fono a Sui Tofia-o le tali-o Tuimalealiifano! O ai la na suitulaga ina ua tuumalo le Tamaaiga o Tuimalealiifano?

O le tali-e leai se isi-ona avanoa mai ai lava lea o lea Tofi? Aisea la na le toe tofia ai e Mataafa Faumuina Mulinuu II se isi i lea tofi? Ona soso’o lea o Mataafa Faumuina Mulinuu II ma Tupua Tamasese i le tofi Palemia. Na tofi e Tupua Tamasese se tasi e le o se Tamaaiga i lea tofi?

O le tali-e leai. Ona soso’o lea ma Tupuola Efi. O le fesili-na tofi e Tupuola Efi se tasi e le o Tamaaiga i lea tofi? O le tali-LEAI! Aisea? O le tali-o le tofi o Tamaaiga! E ui lava la ina e le o aiaia i totonu o le Faavae-ae ua silafia uma e le atunuu le tagata e faasino i ai lea tofi!

O le pine la o lenei mau-ina ua mae’a ona lauiliu e Sui o le Atunuu poo le Faavae a Samoa-o le vaega mulimuli lava na silasila i ai-o a latou Tamaaiga! Ina ua fesiligia la e Sui Usufono o le Fono Faavae a le atunuu Aiga pe o le a so latou finagalo  i Tofi o le Ao o le Malo ma le tofi Palemia- o Tuimalealiifano lava na tulai-ma o lana saunoaga lea-“Samoa –e tou te le masalomia Aiga-ma o la’u tali e faapea-“Malietoa Tanumafili II ma Tupua Tamasese-ou  te loto ia avea oulua ma Ao Soofaatasi o le atunuu-Mataafa ou te loto ia avea oe ma Palemia o Samoa; ae o a’u o le a ou “Faufautua”! E i ai la se taimi na soli ai e Tuimaliefano lana ta’utinoga?

O le tali –e leai-leaga e manumanu i lana saunoga na fai i luma o Samoa! 

O le mau lenei- e mafai ona outou maua ma faamaonia i taualumaga faamaumauina a le Fono Faavae! O le pogai lea na fai ai le aiaiga mo le Fono Faufautua-ma e le o se fono a ni faipule o se Vaega Faa-Upufai-ae o le Fono mo Tuimalealiifano lea na ioe e avea Malietoa ma Tupua Tamasese ma Ao Soofaatasi o Samoa, na ioe foi ia avea Mataafa Faumuina Mulinuu II ma Palemia- ae o ia-o le a Faufautua! O le fesili la-o le a le pogai ua lote ai faavae popo o le atunuu e le HRPP?

O manatua e le Palemia-na nofo foi muamua Tofilau ma tofi i ai isi faipule e aofia ai ma le faipule mai Savaii! O le a le mea na o’o i ai? Afai la e le o aafia se Faipule o Savaii i lea tofiga-faafetai o lena e mau le toovae i le tofa ma le faautaga a Puleono- o le Fono a Sui Tofia e le o se mea e pule ai ni polokiki-vagana ai Aiga o Samoa! O le a sou taofi? 

2. Matauina i Tala Fou se tupe tele ua tuuina atu e le Malo mo a’oga uma i totonu o le atunuu-ma o lea faasoa e aliali mai na matua faasalafa lava ina ia aofia ai aoga uma! E le o iloa la pe o lava pe leai-ae atonu o se foa’i aoga tele mo le aoaoina o le fanau-ma ua lata foi le vaiva’a ua toe o ni nai aso fai le Faiga-Palota Tele!

O le tasi itu taua e na ona lafo atu pea i le Malo-ona o le tulaga mativa ua i ai nei le atunuu-maumau pe ana tuuina atu ai ma sina fesoasoani mo nai tamaiti e o atu i le a’oga e le’i aai ona o le leai o se tupe ma e leai foi se lunch! Ia atonu o se mea fou lenei manatu-ae a fua i le tele o tausaga talu ona tuto’atasi Samoa-ua tatau ona tatou ‘ausia le tulaga o a’oga i Niu Sila- e fai mea’ai mo tamaiti- e fuafua lea mo nai tamaiti e matitiva o latou aiga-ma e fa’i o le leai o se pelekifasi toe leai foi ma se lunch. E le o fai atu nei la o se mea e tatau ona fai nei loa- ae mo le lumana’i-pe afai lava o loo lelei pea le tamaoaiga o le atunuu! O le a sou taofi? 

3. Matauina foi i Tala Fou se ulutala matagofie o le toe to manatu i tua o ni alii faipule se to’alua- faatasi ma le la tatalo fai mai-“Le Alii e-ia e avea a’u ma meafaigaluega o lou filemu, o fea o i ai le feitaga’i-ia ‘ou lūlū i ai le alofa; o fea o i ai tiga-ia e faamagalo mai, o fea o i ai le le mautonu-ia ou maua le faatuatua…” Ia atonu ua talafeagai lelei le talosaga a ia tamalii –pe a fua i le loa o le la tautua i le atunuu e ala i le Palemene!

Ma afai la ua toe to manatu i tua-e pogai ona o le umi o le ala-ma o se ala e le faigata mo e ta’ita’ia le Malo-ae matua faigata lava mo le atunuu!

Afai la ua i faitoto’a le palota-ua matua talafeagai le upu o le la tatalo ua faaalia i luga-talu ai –e leai se faiva e ‘asa ma se maumau-o nisi foi taimi- e te togi le moa ae ‘u’u le ‘afa; atonu foi sa lape le faasoa ma le le faatauaina le tagata mativa-ae o taimi lava faapenei aemaise ai o le sauni atu i le palota-o le taimi lea lua te faafesaga’i tonu ai ma le Atua!

E mafua ona e leai se mea o lilo ia te Ia-E silafia uma lava e le Atua vaega taitasi o tatou tino ma o tatou mafaufau e o’o lava i le loto!

O le mea lea-o le matou nofo tatalo mo oulua!

Ia manuia le alo atu i le Palota!

05 February 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>