Ia manuia la’u fanau

By Vatapuia Maiava 05 January 2017, 12:00AM

“Ia aua ne’i ola falolo la’u fanau pe a matutua.” O le naunautaiga lea o le tamā i a Vaiali’i Lino o Asau ma Si’usega i le Fofoga o Samoa i le aso ananafi.

E maua e le Fofoga o Samoa le fa’atalatalanoaga ma Vaiali’i o lo’o faigaluega i le fa’amamaina o le pa la’au o le kamupani o lo’o galue ai.

“Ia o le taimi lenei, ia o lea fo’i ua toe usu mai e amatalia feau tiute ma galuega o lenei tausaga, ma e mana’omia lava se tupe.

“E ta’utino atu lava o si o matou aiga, o se aiga lima vaivai ma si o’u to’alua aemaise le fanau e to’alua, o lea fo’i le tulaga e ala ai lava ona sau e faigaluega o le alofa i aiga.

“O le a le galuega ou te maua, timu pe la, e le taitai ona tu’u ai le usu mai aua o lo’u iloa a leai se galuega o lona uiga e fia’a’i si a’u fanau.

“O se itu e pito sili ona taua, ia matutua ane le fanau ia maua ni galuega lelei ma manuia olaga.

Na ia ta’ua o le taimi lenei o lo’o laiti lava lana fanau.

“O lo’u naunauta’iga ia aua ne’i fa’atinoina e la’u fanau galuega nei i le lumana’i o le tatalo o lo’o i ai le taimi lenei ia matutua ane ia avea ma ni tagata e faigaluega lelei ma maua so latou lumana’i manuia.

“O le tatalo lava i le Atua ia maua pea le malosi mo le tausiaina o le aiga aemaise ai lava o le fanau ia manuia lo latou lumana’i.

“O le taimi lenei e $120 le totogi o lo’o maua, ma o lo’o tau fa’asoasoa i le vaiaso atoa.

“Ia o lea fo’i ua toe a’e galuega o lenei tausaga, ia o lea lava le fa’amoemoega o si a’u fanau.

“Ou te mana’o fo’i a matutua ia o latou iloa le faigata o lo’o i ai le taimi lenei, ia mafai ai ona filiga e o i le aoga ma fai lelei le olaga, ina ia aua ne’i ola falolo.

“Ia finafinau ai e fai lelei aoga ma tulaga uma fa’apena e manuia ai.

Na ia ta’ua o le taimi lenei e pau lava le fesoasoani o lo’o fia maua o se fale.

“Ia o lo’o nonofo nei i Si’usega ma o lo’o se tulaga fa’aletonu le fale o lo’o nonofo, ia o lea lava e tatalo ia maua sina tupe lenei tausaga ina ia mafai ona faalava ai apa mo le fale.

“Ona o le taimi lenei o lo’o faaoga le kapoleni e fa’aso’o ai apa, ae ona o le taugata o le soifuaga o le tulaga lea ua faigata ai lava.

By Vatapuia Maiava 05 January 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>