Tupe fa’asili mo le aiga

Tusia Vatapuia Maiava ma Ilia L Likou ,

117 Hits

Tominiko Sanefili.

Tominiko Sanefili.

Ua silia ma le sefulu tausaga o fa’atinoina e Tominiko Sanefili le pisinisi o le vaifala i le afio’aga o Le’auva’a aemaise lava pe a tetele le fua o fala i tausaga ta’itasi.

“Ia o le taimi lenei ia o lea lava le tulaga olo’o galue ai lo’u tagata i aso uma aemaise ai o lenei  vaitau ua tele ina to’atele nai o tatou tagata olo’o ua malaga mai fafo.

“E latou te mana’omia ai lava vaifala malulu nei aua lenei vaitau o le vevela ma le mau tafaoga e pei ona ua i ai nei.

“Ia o le tupe le taimi lenei ua atoa le $30 lea e le’i taina le 11 ia e tele lava e le’i taina le 4 i aso taitasi ua uma.

Na ia ta’ua e le gata ina o latou fa’atauina le vaifala ae o fala fo’i.

“Ia o le taimi lenei e tele lava ina la’u mai le fala e fa’atau fa’atasi ai luma iinei, aua o le itu mautinoa lava o lo’o ua i ai, ia ua tele le fala.

“O lenei fo’i ua o tatou i ai le taimi e fa’aaoga ai fala, aua e lua lava i le tausaga ona pula, ma o le fa’aiuga lava la o le tausaga e tele ai lava vaega nei e fa’atau ai.

“Ou te iloa fo’i e a’u latou ia , ia o le fiafiaga lea o le to’atele o nisi o nai o tatou tagata i lenei vaitau  o sina vai malulu.

O lona talitonuga o le i ai i le fa’aiuga o le tausaga  , o se tupe lelei tele e maua mai le fa’atauina o vaega nei.

“Ia e tele tupe e maua i le taimi lenei, aua e uma ane le aso e tusa ma le $100 la’u tupe e maua ma e fesoasoani tele i lo matou aiga.

“A lelei lava fa’atau ia e $120 i le $130 i le aso.

“O le itu lelei ai, aua o le tele o fala , ia e aumai lava i le fanua o le aiga, e pau lava le tupe tele e fa’aalu o le popo ma aisa.

“Ae a fua atu ai le tele o polofiti e maua mai ai ia o le itu lelei tele lea mo lenei vaitau o le Kirisimasi ma le Tausaga Fou.

“Ia o lea fo’i ua amata ona le toe to’atele mai tagata e omai e fa’atau ia e masalo ai ona ua amata fo’i ona fa’ai’ui’u aso fiafia.

“Ae pei o le agaga maualuga lava o vaega nei e mo le tausiga lava o nai o tatou aiga ia aemaise ai o aso uma.

© Samoa Observer 2016

Developed by Samoa Observer in Apia