Saogalemu Aso Malolo-Leoleo

215 Hits

Pai Mulitalo Ale 

Faaliliu e Seagaitumua Tupuola

 

E ese mai se faalavelave lea na malelemo ai ni tagata se to’atolu i Mulinuu i le lua vaiaso talu ai, fai mai Leoleo o le Vaitau o Sauniga eseese sa matua saogalemu lava. 

O lenei itu na faamaonia e le Alii Ofisa a Leoleo mo Nusipepa, o Maotaoalii Kaioneta Kitiona, o ia lea na faafetaia sui o tagata lautele ona o le galulue faatasi ma Leoleo mo le tausia o Samoa ina ia saogalemu.

E tusa ai ma Maota, e leai ni faalavelave matuiā i le faagasologa o le Kirisimasi ma le Tausaga Fou. E ui lava ina sa i ai ni tauiviga i le va o tagata onanā i iinei ma iina, ae fai mai a ia o le tulaga malosi o le auai o Leoleo i totonu o le atunuu na mafai ai ona sili le tulaga saogalemu o Aso Fiafia.

E sili atu i lo le 600 alii ofisa sa auai i le Galuega a Leoleo i le faagasologa o le Vaitau o Fiafiaga. Sa tuuina atu i latou i nofoaga eseese i le salafa o Upolu ma Savaii.

Na faafetaia e Maota alii Leoleo mo se galuega sa lelei ona faatinoina.  “E le o se galuega faigofie ona o le toatele o i latou sa manana’o e mafuta faatasi ma o latou aiga ae lotomau i latou i le latou galuega ma o lea ua matou fiafia ai-ona sa matua saogalemu lava,” o lana faaaliga lea.

“O le tele lava o mataupu sa matou feagai ai e aofi ai avetaavale onanā ma isi lava faalavelave laiti.”Ae mo i latou na malelemo i Mulinuu, fai mai Maota o loo faaauau pea a latou suesuega. “O le galuega fuafuaina mo le Vaitau o Aso Fiafia na muta i le asŏ ma o le a toe taliu mai uma leoleo i o latou tiute masani ma latou vaega,” o lana faaaliga lea.

© Samoa Observer 2016

Developed by Samoa Observer in Apia