Deidre Fanene

Faaliliu e Seagaitumua Tupuola

E lua ni sauniga na faamanatu i totonu o le Aiga o Gogo i le vaiaso talu ai i Matautu-Falelatai. Muamua o le tatalaina lea o le “Maota o Nefunefu” ona soso’o ai lea ma le faae’eina atu o le suafa “Misa” i sui e tolusefulu o le aiga.

O se sui o le aiga o Misa Loata Misa fai mai o le Maota o Nefunefu na tatalas i le Aso Lua ae o le faiga o matai na faatino i le Aso Lulu. O Reverend Tauti’aga ma le taitaifono o le nuu o Misa Anae na lapata’ina ma una’ia matai foi ina ia ‘aua nei alofa faapito, ia loto alofa ma faaaloalo pe a fai ni faaiuga mo le lelei o le aiga.

A outou manana’o tou te muamua, e tatau ona outou iloa ona mulimuli,  a outou manana’o e avea outou ma ta’ita’i-e tatau ona outou auauna muamua,” o le faaaliga lea a Reverend Tautiaga.” 

“E tatau ona outou faamuamua mana’oga o outou aiga ae le o outou mana’o. O se matai lelei o lona uiga-ia sili ona taua ia te ia manaoga o le aiga i lo ona lava mana’oga.  “O se matai lelei o le a avea ma ta’ita’i lelei pe a manuia sui o lona aiga i lana ta’ita’iga.

“E le o se mea faigofie le avea ma taitai o le aiga talu ai e tatau ona e ta’ita’i e tusa ai ma lau faata’ita’iga.” O le Taitaifono o le nuu o Matautu Falelatai o Misa Anae na ia momoli atu le faala’ei’au i matai fou ina ia ta’ita’i e tusa ma latou faata’ita’iga ae o le mea sili o le alofa.

 “A aunoa ma le alofa- e le mafai ona e ta’ita’ia lou aiga,” o lana faaaliga lea.

 “Faailoa atu ia i latou le alofa e tatau ona latou maua ona latou tautua lea ia te outou i le mea sili latou te mafaia. “E le o se mea e faigofie ma o le mea moni lava lena, ae afai e ta’ita’i outou aiga i le alofa ma le faaaloalo, ona sologa lelei lea o mea uma lava. 

“Ia ole atu i le Atua mo lana ta’ita’iga ma lana puipuiga ia te outou, aemaise ai lava le ole atu ia te Ia ina ia tuu atu ia te outou le poto ma le malosi e ta’ita’i ai lou aiga i le faamaoni ma le alofa..

 “O le a i ai taimi o le a tuuina atu ai oe i luga o se tulaga vevela ina ia fai ni faaiuga faigata, ae a i ai le Alii i ou tafatafa-o le a na faaali atu ia te oe le ala sa’o ma le faaiuga tonu e ao ona fai.”