1. Matauina i Tala Fou le anoano o ‘au’upega-laau malosi poo fana o soo se ituaiga ma ututau na aumai faananā i totonu o le atunuu.

E tusa ai ma tala fou-o ia ‘au’upega sa nanā mai totonu o ni pusa oloa tetele-afifī ma ‘atopa’u! A silasila i le mata’utia o ia ‘au’upega-o lona uiga-e i ai se mea o tau fuafua-e pei o le leoleoina o faatoaga o fualaau faasaina-osofa’iga o faletupe ia poo le tafana ai foi o nisi o le atunuu!

O lona uiga la- e le o toe saogalemu Samoa atoa pe afai e tulai mai sea ituaiga o faalavelave! E ono mafai foi ona faapea o ni tapenaga ia e faasaga tau i Leoleo ma le latou galuega o loo faatino.

O le fesili la-afai ua maua ma faamaonia i latou na aumaia faananā nei auupega faasaina i totonu o le atunuu-ua molia i latou ia i le Faamasinoga pe leai? Afai na aumai faananā-o lona uiga-na fai lava ma le iloa lelei e faasa-ae aumai lava! E le o se tofotofo la lena mea i le tulafono?

Afai la ona pau le fuafuaga a le Ofisa o Leoleo-o le faatama’ia o ia ‘auupega-o lona uiga-e le mafai ona tuua aua foi ua latou iloa lelei lava-e na ona maua lava –faatama’ia loa-ae leai se faasalaga! E faapefea la pe a toe aumai i se isi taimi-ae le maua e le Ofisa o le Tiute ma Leoleo?

O le tali –e toe aumai foi –ma o le mea o le a o’o i ai- o le a faatau atu nei fana poo auupega faasaina i tagata-ona tulai mai ai lea o ni faalavelave! O le fesili la-afai ua soli e i latou ia le tulafono ma le aumai faananā o ia auupega I totonu o le atunuu-aisea ua le molia ai i le tulafono ina ia mafai ai ona taofia lea faiga leaga? O ai e molia pe a soli tulafono ae o ai e le mafai ona molia? O le a sou taofi? 

2. Ua matua felanulanua’i le faamanatuina o le Tausaga Fou 2016 ma le matau i sauniga eseese sa faatinoina. O isi aiga i Samoa nei o mafutaga poo Reunion; o isi o le faiga o nisi suafa matai o le aiga-ae o isi o le foa’i atu lea o meaalofa i o latou nuu e ala i taaloga ma isi mea faapena!

O lona uiga la-atonu e manatu nisi o ni mea fou nei mea-ae a liliu lava i le aano o ia mafutaga eseese ma sauniga faamanatu- e le o mafai lava ona ‘asa ai ma le aloa’ia o nisi o suli ma feoi o se aiga- e ala i le tofia o nisi matai fou e fesoasoani i le tausiga o le aiga ma le nuu.

O lona uiga la- e le o mafai lava ona ‘asa ai ma le loto alofa faa-Samoa moni! Aisea? Leaga tatou te ifo uma lava i le palapala-ae faaauau pea le aiga ma ona tupulaga fai mai! O le mea lea-o se uiga faatupu manatu foi lea i isi aiga o le atunuu-aua o le upu moni lava-‘o le tele o lima e māmā ai se avega! O se mea lelei la poo se mea leaga le amana’ia o isi suli ma feoi o le aiga? O le a sou taofi? 

3. Matauina pea i feoa’iga i le po le mata’utia o avetaavale a isi tagata ae mafuli lava i avetaavale la’upasese! Ua le mautinoa la i le mafaufau-pe o se tauvaga o moli o taavale le mea o loo fai nei! E matua leai lava se malamalama o isi avetaavale i le faaaogaina o moli o taavale i le po!

O le uiga o le faamatalaga- e peiseai e matua fiafia lava isi avetaavale e faailoa atu i isi avetaavale-ua na o lana taavale lava e i ai moli faapea ona matua faamumū uma ai lava lea ! O le pogai lea e tiga ona tatau ona tuu i lalo (dim) moli o lana taavale-ae matua ki uma (bright) ana moli i isi taavale-ae o le faalavelave- e i’u ina lavea ai le isi taavale.

A tatou tilotilo la i le alatele mai Vailoa, Vaiusu e tau mai i Vaitele-e anoano kalone o loo faailoga ai vaega o lea auala-ma afai la e bright uma moli o taavale-e i’u ina taso’a ai i lalo ma ia kalone- e isi taavale! Ae maumau foi pe ana i ai ma ni Leoleo Auala-ia poo nisi foi o le LTA-se’i matua silasila lelei i lea tulaga! O le a sou taofi? 

4. Matauina i Tala Fou e faapea ua sopo’ia e le Afā malosi o Ula le vaega o Fiti e igoa o Lau-ma ua amata ona popole tagata o lea vaega o Fiti-ona o se afā malosi tele-ona fai mai o lona malosi e 150 kilomita i le itula pe a to faata’uta’u ma e ono mafai ona o’o lona malosi i le 200 kilomita i le itula-ma ua aga’i atu i sauté sisifo I le va o motu o Kabara ma Ono-i-Lau. Ia o le tulaga lena o loo i ai Fiti-ae tatou te le iloa lava le mea e tupu!

O le popolega-a toe aafia nei Samoa i se matagi malosi-o lona uiga-e le gata ina faateteleina le mativa o tagata-ae o le a sili foi ona faaopoopoina le aofai o tamaiti e faatauina atu oloa i luga o ala tetele ona o le fia ola-ae o le a sili ai foi ona faato’ateleina tagata aisi i totonu o Apia! O le a sou taofi?