‘Once our actions change, the foundations have been overturned’

354 Hits

author picture

Taua Pu’a Leota

The following paper by Tuia Pu'a Letoa questions the validity of multiple matai titles, in particular matai "Sa'o titles." He supports the premise that the "Sa'o" titles of families should not be multiplied or distributed. The "Sa'o" titleholder has duties and authority that should be exercised to protect the family land and "measina."

Tuia asks: "What is the point of being bestowed a matai "Sa'o" title and never being able to sit at the decision making post to make decisions on behalf of your family and village?

What is the legitimacy of a "matai Sa'o" sitting at the umu or serving another "matai Sa'o" who receives the honorifics due to the title? 

How can land be apportioned to 100 or 50  "Sa'o" titles?

The theme of the Measina conference this year was "E sui faiga 'ae tumau faavae" or  "our actions change but foundations remain constant." Tuia argues that once our actions change, the foundations have been overturned." The paper in Samoan will be published over the coming days, starting today:

 

FOLASAGA.

E fa’atulou ma fa’atalofa atu i le paia i le susu o le Aufaigaluega a le Atua, afio i lau Afioga i le Tapa’au ma tulaga fa’alupe o le Iunivesete, fa’apea le paia ma le mamalu o le atunu’u i ona Tupu ma ona Ee, aemaise le mamalu i le au Puputoa ma le au Fueloloa o le Atunu’u. Talofa lava.

O le a vaipa ia lou gutu ne’i mea ane ua sipa se lamaga i se fa’atalaga ona faitauina lea o lo’u tagata.  O lena ua nofofale i le a’ai o finagalo le autu o lenei  fa’afaletui e fa’apea,  

“E SUI FAIGA AE TUMAU FA’AVAE.” 

 

O ESE’ESEGA O LE UPU FAIGA MA LE UPU SUIGA.

• O upu nei o le FAIGA ma SUIGA e tatau ona matua autala ma auili’ili lelei lona ese’esega, ona o lea ua taumafai nisi e fa’apea mai, o faiga o suiga lava ia. Ae peita’i o nei upu e lua e ese’ese o la uiga ma le fa’atinoga.

 

• O le uiga o le upu FAIGA, e sau mai le upu FAI. O lona uiga o se mea e faia e se tagata po’o le fa’atinoga o le upu faiga. O Faiga la o lea e ave i ai le fa’amamafa a le faipepa, o faiga ua afaina ma lavasiga ai Fa’avae taoto o le Aganu’u. O le fesili la e ao ona mua’i manino, “e fa’afefea ona tumau Fa’avae pe afai e sui faiga e fa’atino ai Fa’avae.”

 

• Ae peita’i o ni suiga lelei o le soifuaga i Samoa nei e mafua mai i ni a’afiaga o tu ma aga mai fafo mo le atia’eina o le soifuaga i totonu o aiga, nu’u ma le atunu’u, o le a le taea lea i le tautalaga. E i ai lo’u talitonu o ni suiga lelei e fetaui ma lo tatou soifuaga, o se tulaga lelei e tatau ona aputiputi.

 

• Ae peita’i e i ai fo’i suiga i totonu o le tatou atunu’u ua alia’e mai, ona o a’afiaga o tu ma aga mai fafo, lea ua le mafai ona fa’amalieina ona tulaga lelei ma le matagofie e pei ona vaaia i fafo, talu ai ona e le o gafatia e o tatou tagata ona ausia le tau po’o mea faitino e fa’amalieina ai tulaga lelei ma le matagofie o ia suiga. Ma e tele la ni fa’afitauli ua tula’i mai ona o lea tulaga. 

 

• O le a taoto ia la lea tulaga i suiga fou, ae o le a aga’i sa’u fa’amamafa i Faiga ua afaina ai fa’avae taoto o le Aganu’u ma Agaifanua o aiga, nu’u ma le atunuu, ina ua sui faiga lea ua afaina ma satia ai FA’AVAE.  O le upu la Faiga fou, o se mea ua faia e tagata Samoa i  Aganu’u ma Agaifanua ua oia ai Fa’avae taoto o le Aganu’u. 

 

• Ou te talitonu e ao ona malamalama lelei i le uiga o le upu AGANU’U ma le upu AGAIFANUA. O le Aganu’u ma le Agaifanua i le fa’auigaina e le Tulafono o Fanua ma Suafa 1981 i lona Fuaiupu 2(a)(b) e faapea :

“Aganuu ma Agaifanua” po’o aganuu ma agaifanua a Samoa, o lona uiga o aganuu ma agaifanua a Samoa ua talia e pei ona fa’amamaluina i taimi e fa’asino i ai ma e aofia ai…

 

(a) O tulaga fa’avae tau le Aganu’u ma Agaifanua ua talia e tagata Samoa i le tulaga aoao; ma

(b) Aganuu ma Agaifanua e pei ona o lo’o fa’amamaluina e fa’atatau i se nofoaga po o se mataupu fa’apitoa.  

 

• O lo’o matua manino lelei le Tulafono i lona fa’ata’atiaina o fa’avae tau le aganu’u ma le agaifanua ua talia e tagata Samoa i le tulaga aoao. O le aganu’u la ma le agaifanua o fa’avae o matai Samoa i lona tulaga aoao, o le “MATAI FILIFILIA ma le MATAI TOFIA,” lea o le a aga’i i ai se fa’amatalaga i lenei taeao i le afaina o Fa’avae ona ua sui Faiga i le faasafuaina o suafa matai Sa’o.

 

• O le Matai Filifilia ua taliaina i lona tulaga aoao, o le suafa matai e pulea fa’a-suli. I se isi fa’aupuga o le suafa e filifili e Suli. O le matai filifilia la o le matai sa’o, o le pule poo le aia tatau a suli e filifili ai so latou matai sa’o e aga i ai le pulea ma le tausiga o measina a le aiga ma le suafa.

 

• O le Matai Tofia, o ni matai e tofia e le matai filifilia po’o le matai sa’o e fesoasoani i le fa’afoeina o le aiga ma le puipuiga o tofi ma measina a suli o le suafa sa’o. Ae le gata i lea, ia sologa lelei le laina o feso’ota’iga ma pulega lelei i totonu o le aiga.

 

• Ma o lea la o lo’o manino lelei i le folasiaina e le Tulafono o Fanua ma Suafa i le tulaga  Fa’avae o Suafa Matai Sa’o ua talia e Samoa i lona tulaga aoao e tatau lava ona tasi. 

 

• O le matai na filifili e suli, o se filifiliga e fai to’atele e filifili se numera tasi. I se isi fa’aupuga, o le filifiliga a suli e filifili se Matai Sa’o e tasi. 

 

• Ma suafa matai Tofia, e tofia to’atasi e le matai filifilia po’o le matai sa’o ni matai se to’atele po’o ni matai pitovao e fesoasoani i le fa’atautaia ma le fa’afoeina o le aiga ma puipui tofi ma measina a suli o le suafa filifilia po’o le suafa sa’o.         

 

• O se vaivaiga la o lo’o taumafai e autalatala atu e fa’apea, o lea ua folasia manino i fa’avae o le aganu’u, e i ai suafa matai e mafai ona fa’asafua, e i  ai fo’i suafa matai e le mafai ona fa’asafua e tusa ai ma le fa’amaleina o mana’oga o le Aganuu. 

Ou te le o talanoa atu la i le fa’amalieina o le tupu ma ola o se aiga, po’o le fa’amalieina o se mana’o o se suli po’o se tagata. O le tulaga o lo’o taumafai e talatala atu,  o le afaina ma lavasiga e tula’i mai, pe afai e le mafai ona fa’amalieina mana’oga fa’avae o le aganu’u, e ala lea i le fa’asafua o suafa matai sa’o o aiga.  

 

• O mana’oga fa’avae o le Aganu’u, o le suafa matai filifili ua i ai ona lagisoifua e fa’apei, o le pule, o fa’amanuiaga, o lona fa’asinomaga, o tiute ma matafaioi e le mafai e le suafa matai tofia po’o matai pitovao ona agava’a i ai, ua na o le matai filifilia lava po’o le matai Sa’o e agava’a i ai.

 

• O tapu ma sasa o se suafa Sa’o, o le agaifanua lea e fitoitonu i se suafa sa’o i totonu  o lona lava nu’u e le mafai ona faatinoina i se isi nuu. Ma o lea faavae o lo’o faamanino lelei mai e le (b) o le Tulafono o Fanua ma Suafa e faapea, “o se aganuu ma agaifanua e faatatau i se nofoaga po’o se mataupu fa’apitoa.”   

 

• O le mataupu fa’apitoa la, o tapu ma sasa o le suafa Siaki e tatau ona aloaia ma fa’aaloalogia lona fa’atinoina i totonu o le nuu lava o Siaki, peita’i e le mafai ona fa’atinoa lea tualaga i se isi nu’u. O le uiga lea ma le fa’atinoina o le agaifanua. O ni aga e fa’asino lava i le fanua po’o le suafa Siaki i lona lava nu’u. o le uiga fo’i lea e tele ina fa’alogoina ai le upu lenei, “e tupu lava le tagata i lona nu’u.” 

 

FA’ASAFUA O MATAI SA’O O LE FA’ATAUTE’E I LE TULAFONO AGANUU MA AGAIFANUA.

• O le fa’asafuaina la o suafa matai sa’o, o le fa’ataute’e lea i le Tulafono, Aganuu ma Agaifanua a Samoa e tusa ma lona tulaga fa’avae. Aua o suafa matai sa’o i lona tulaga fa’avae o le pule ma le aia tatau a suli ma le aigapotopoto atoa e filifili ai se matai sa’o. 

 

• Afai la ae filifili fa’a-itupaepae, pe fa’afuaifale, pe fa’amatafale se suafa sa’o, o lona uiga ua malepe le fa’avae o le pule ma aia tatau a suli uma ma le aigapotpoto e filifili ai se matai sa’o e tusa ai o Tu ma Aganuu o lo’o fa’ataoto mai e le Tulafono o Fanua ma Suafa. 

• O le fa’apea mai la o le autu e sui faiga ae tumau fa’avae, o se fuaitau e faigata ona taliaina e le faipepa, ona ua le tusa ai ma Aganu’u ma Agaifanua a Samoa i lona tulaga fa’avae ma lona taliaina aoao tetele.      

   

SUI FAIGA AE TUMAU FA’AVAE.

• O le autalaina o lenei fuaitau po’o lenei fatua’iupu, o se fatu gagana o lo’o fa’alogoina pea i taimi e utu vagagana ai faleupolu. O se fatu gagana po’o se fatua’i upu, o lo’o talatala ai le atoponapona a tulatoa ma tula o malae o le atunu’u. Ae o se muagagana fo’i o lo’o fai ma suaga a le mamalu lautele o le atunu’u i talanoaga fai fai pea.

 

• O lenei fatu gagana po’o lenei fatua’i upu e ao ona tamua i ai se talitonuga a lo’u tagata, pe o se fuaitau e sa’o ma tonu e tusa ai ma le soifuaga o le tagata Samoa i Tu ma Aga a ona fa’asinomaga. O le mea lea ou te fa’apea atu ai, ou te le ioeina lea fuaitau, “e sui faiga ae tumau fa’avae.”  E sui loa faiga, ua malepe fo’i fa’avae. I se isi fa’aupuga e sui loa faiga ua leai se taua o Fa’avae.

 

• O Iesu keriso lava ia e le liu ananafi ma le aso e o’o lava i le fa’avavau.  O ia foi na saunoa, ou te le’i sau e talepe le Tulafono ae ia fa’aatoatoa. O le tala fo’i a le Tusi a Failauga 1: 9 e leai se mea fou i lalo o le la. O lona uiga, so’o se fa’avae pe fa’aleagaga pe faa-le-Aganuu e tumau e fa’avavau.

• O lenei fatua’iupu po’o lenei fatugagana ua masani ona fa’aaogaina e faleupolu e malie  i le faalogo, ae peita’i o lona fa’aaogaina e fai lea ma ‘alofaga po’o se si’omaga e lalafi ai tua faleupolu i le faia o se mea sese po’o se mea fou e suia ma afaina ai fa’avae o le mea o lo’o fetalai i ai. 

 

• O le mea lea ua tatau ai i le au puputoa o Afio’aga, Iunivesete, Matagaluega o Tu ma Aganuu ma le Faamasinoga ona ta’afi manino, ta’afi talatala ma ta’afi nonoa e uiga i lenei fatugagana po’o lenei fatua’iupu, pe ua talafeagai lea fuaitau i le fa’aaogaina i le gagana tautala i totonu o aoga.

 

• O le mea lea, ou te fa’afetaia ai le tofa ua ae i le Tapa’au ma le mamalu o i latou o le Iunivesete o lo’o taulamua i le autalaina o lenei autu, aua le silafia e teine ma tama aoga o a’afiaga o lenei upu i le soifuaga i Samoa nei ma le fa’atinoina o a latou Tu ma Aganu’u mamalu a Samoa o lo’o tiu ai. 

 

• O le fa’amasani pea e tautala i ai i lenei fatua’i upu, e avea ai lenei fuaitau e lima ta’ita’i seseina ai o latou talitonuga i le fa’atinoina o Aganuu fa’avae a Samoa.  

AUTU: “LAVASIGA O FA’AVAE O SUAFA SA’O, INA UA SUI FAIGA I LE 

FA’ASAFUA O  SUAFA SA’O O AIGA.” 

 

ULUFATUINA O SUAFA MATAI.

• O le avea ma se matai, o se tofi po’o se vala’auga mai le Atua. O se ua fa’amamaluina e vaelua i ai le suafa o le Atua. O se vala’auga na afua mai i le nu’u o le Atua, e pei ona folasia manino mai e le Tusi a Kenese 36, e ala  i usuga e tolu a Esau i fafine Kanana, lea e maua ai matai o le aiga sa Heti, Sa Hivi ma sa Hori ma amata ai loa le nuu o Esau i Etoma.  

 

• Usu Esau ia Ata le afafine o Ailona le sa Heti –fg- o Elifasa.

Toe usu Esau ia Alipana le afafine o Sepeona le sa Hivi –fg- o Iuso, Ilama ma kara.

Toe usu Esau ia Pasemata le afafine Isamaeli –fg- o Reuelu.

Ma na avea ulumatutua o nei usuga e tolu e fai ma alii sili o ituaiga e pei ona taua i luga. Ae o latou suli lea na totofi ai matai pitovao o le nu’u o Etoma.

 

• O le ulufatuina la o suafa sa’o o aiga i le nu’u o le Atua na amata mai lava e tasi. Ma sa fa’apea fo’i le tulaga na fofoa mai ai suafa sa’o i Samoa nei. O suafa sa’o o aiga o se tofiga ua mautu lona fa’avae ua atofaina e ala i le pule, lagisoifua ma fa’asinomaga, laei ma lauvae, tapu ma sasa  o suafa sa’o o aiga, lea ua afaina ina ua fa’asafua suafa sa’o. 

 

• Ma o le ala fo’i lea o le faiga fou lenei, o le tofia o se Fa’aaloaloga o se nofo a suafa, ina ia mafai ona faatino lagisoifua o se suafa sa’o e tusa ai o faavae o le Aganuu ma Agaifanua. Aua e le mafai e suafa pitovao ma suli o le aiga ona agaavaa uma i ai.  O le fa’atinoga foi o nei lagisoifua o suafa sa’o, e le mafai e suafa uma o se nofo a suafa ona fa’atofusia i ai i le fa’atinoga o nei lagisoifua. 

 

• Ma o le mafuaaga tonu lea ua toe fo’i ai le nofo a suafa e filifilia se FA’AALOALOGA a se nofoa suafa ina ia mafai ona fa’amalieina mana’oga o le Faavae o suafa matai sa’o, o le filifilia o le tasi, ae le o le toatele po’o le fa’asafua o suafa.  

 

PULE FAA-SA’O.

• E talitonu le fai pepa, o le tofiaina o suafa sa’o i aso ua mavae na pule fa’a sa’o, e ala i se mavaega a le Sa’o po’o le Alii Sili o aiga. A o’o ina ifo le la ma taolia fo’i le fala i le soifua o se alii Sili, ona poto foi lea o Faleupolu ma le aiga ma fesiliga le siitaga o le mavaega a se Alii sili, po’o ai e fa’aauauina le gafa o le fale. O ai lava la o suli o le aiga e mavaea’ina e le sa’o, o ia lava lea na te fa’aauauina le gafa o le fale, po’o le nofoia o le suafa sa’o o se aiga. 

• E pei o le mafua’aga lea e tele ai fa’ai’uga a le Faamasinoga o Fanua ma Suafa i tua atu 1920, sa tele ina faapea mai, “Afai ae uma le soifua o Siaki, e leai sana mavaega e fai, ae toe foi le filifiliga o le suafa Siaki i le aigapotopoto.”  O lona uiga, o mavaega lava a suafa Sa’o na tofia ai suafa sa’o o aiga i aso ua mavae.

 

• O le tofia fo’i o suafa Sa’o i aso ua mavae, sa le’i tele ni agava’a mo’omia i se tagata e tofia ai o se matai sa’o. E pei o le tulaga sa lilifa i ai le tofiga o matai sa’o i aso ua mavae, o le TAUTUA.  

 

• Sa le’i tilotilo tele i le poto salalau po’o se tamaoaiga, po’o le alofa e pei ona tau fesiligia e le Fa’amasinoga o Fanua ma Suafa i taimi o Fa’amasinoga. E pau lava le tulaga sa tilotilo i ai le tofiaina matai sa’o: 

1. Ose tagata sa tautua matavela fa’amaoni, e afua ai le upu Tautua Tuavae.

2. O se tagata e iloa upu o le aiga po’o tapu ma sasa ma lagisoifua o le suafa ma iloa le Aganuu ma lelei le utuvagaga, e afua ai le upu Tautua Upu. 

3. O se tagata e toa e le pala’ai e puipui ma malu ai le suafa ma le aiga, lea e afua ai le upu Tautua Toto. 

4. Ma le suli ai tau malele, e le misi i le tautuaina o le aiga i mea e fai poo mea e finagalo i ai le sa’o o le aiga, lea e afua ai le upu Tautua Mamao.   

 

• E pei o le agava’a numera tasi lea sa ave i ai se fa’amamafa a se sa’o e tofia ai se isi na te fa’aauau le suafa o le aiga po’o le gafa o le fale. Ae peita’i, ina ua fa’atula’i mai le pule fa’a-suli, o i tonu lea na tau amata mai ai le fa’asafuaina o suafa sa’o. 

 

PULE FA’A-SULI.

O se tasi nei o faiga na afua ai ona fa’asafua suafa sa’o o aiga ina ua fa’atula’i mai, “le pule faa suli.” Le pule lea na amata ai ona tele finauga ma aumai malosi le aia tatau fa’a suli. Aua o le pule lea na amata ai ona aga’i mai suli ma aiga i le  Fa’amasinoga o Fanua ma Suafa, e saili le pule ma suli fa’avae moni o le suafa.

 

E tele la ni suiga ua amata ona alia’e mai, ma ua avea ai fo’i  ma ala ua amata ai ona fa’asafua suafa matai sa’o. Aua o le tele o aiga ua omai e talosagaina le fa’a itupaepae o suafa, fa’a fuaifale suafa, fa’a-fale tama suafa, fa’amavaevae filifiliga. 

 

O suiga tetele nei ua amata ona tula’i mai ai le fa’asafua o suafa, ina ua pule fa’a-suli suafa. Ma ua avea fo’i lea faiga ua le mafai ai ona taofiofi le fa’asafuaina o suafa matai sa’o, ona ua tele magavai o le filifiliga. Aua e fa’amavevae loa filifiliga o se suafa sa’o i ni Itupaepae po’o ni fuaifale o le suafa, ona sa’oloto lea o ia Itupaepae i le tele o le fuainumera e o’o i ai le tele o latou suafa matai sa’o.

 

PALOTA NA O MATAI.

• O le isi tulaga na sasao fa’aafi ai le fa’asafuaina o suafa Sa’o, o le vaitau a’o palota na o matai i le palotaina o Su’i o le Palemene. Aua o le fa’amoemoe autu lava o lea faiga, ia tele ni matai Palota o le Itumalo. Ma o se tasi lenei o ala na matua saoasaoa ai le fa’asafuaina o matai sa’o. 

 

SI’ITIA LE POTO SALALAU MA LE TAMAOAIGA.

• O le isi tulaga ua vave ai le faasafuaina o suafa matai sa’o, ona ua  si’itia le tulaga o le ola a’oa’oina o suli o aiga ma tutupu ai lagona o le taua o le avea ma se matai sa’o, ma ua tutupu ai manatu o suli, “o ai o le a le fia pa’i i vai o le tama.” 

 

• Ma ua amata fo’i ona lagonaina le upu lenei, “o aia faa-suli po’o le aia tatau a le suli.” Ma o lenei upu o lo’o mafuli lona fa’aleoina e suli ua lava le ola a’oa’oina ma ola i le tulaga o aia tatau fa’a-tagata soifua.

 

• O nisi o fanau ua lava le a’oa’oina ma tulaga lelei i galuega ua tutupu ai manatu i le fai o sona suafa matai, ona e matai uma le pulega a le latou Matagaluega. Ona talosagaina  fo’i lea e matua le sa’o o aiga, se’i alofagia ma fai se siaki o la’u tama e te lua nofo lua, ona ua maualuga lava lona tulaga i le galuega.  Ae o lenei fo’i tama poo fanau i lenei vaitau ua le o toe fia nonofo i ni suafa vai matai po’o ni matai pitovao, ua tagisa lava i se suafa sa’o.

 

SULI E NONOFO I FAFO.

O le isi tulaga ua saoasaoa ai le fa’asafua o suafa sa’o, o suli ma feoi o lo’o nonofo i fafo. O nisi o tamafanau a suafa ua avea ma failautusi po’o ua mau tofiga i totonu o se Aulotu I fafo o lo’o afaina le sa’olotoga e tautala ai po’o le noatia o le fa’aali sa’oloto o se manatu, ona e leai sona suafa matai. Ona Malaga mai ai fo’i lea i Samoa nei ma talosagaina  le matai sa’o, ae a pe a fai sona suafa siaki e la te nofo lua ai e tausi le aiga?  E tausi atu e oe le aiga i Samoa nei, ae ou tausia le aiga i Niu Sila.

 

Ae le gata i lea, o se fa’anaunauga a matua o lo’o soifua ma ola i atunu’u i fafo, aemaise lava i latou na fananau ma soifua a’e i Samoa nei, i le le mapu o le titi, tata i le fanau e alolofa mai i le aiga i Samoa nei, ae peita’i o le agaga moni lava o matua ia ‘aua ne’i motusia le latou gafa po’o le pule i le suafa Siaki. Ne’i mea ane ua o mai le fanau i ni aso o i luma ae fa’asinosino lima i ai le aiga.E talitonu o se tasi lenei o ala ua saoasaoa ai le faasafua o suafa sa’o, o le taumafai lea o matua e una’i le fanau ina ia lagona le taua o le umia o se suafa matai o aiga.  Ma o le ala fo’i lea e mafuli ai le finau a matua e nonofo i fafo e fa’asafua suafa sa’o o aiga.

 

UNA’IA FAIA O MATAI TAMA’ITA’I.

• O le isi tulaga ua fa’ateleina ai le fa’asafuaina o suafa sa’o, o le tule’i malosi a le vaega o fa’alapotpotoga a tamaita’i o lo’o finauina ma fa’alauiloa le aga tutusa o Alii ma Tamaita’i i so’o se tofiga i totonu o le atunu’u, “e o e fai ni o latou matai ina ia fa’aaogaina o latou tomai e tautua ai aiga, nu’u ma le Malo.” 

 

Ae o le fesili tele o lo’o fetogia’i fa’asoi o tuaoi e le itupa o tamaita’i ma le itupa o alii e faapea, “se fa’avae o le aganu’u le faia o ni matai o tama’ita’i?”  

 

E pule oe i lau tali, ae pau le popolega o le televave ma le saoasaoa o lenei suiga. Ou te talitonu o se tasi lenei tulaga ua matua saoasaoa ai le fa’asafuaina o suafa sa’o, ona o mea nei o tamaitai e ese le televavave o le fa’ataunu’uina o fuafuaga fai. E fai mai se tasi o talitonuga i nei aso, “ae e fia maua se tala alu i tamaloloa, ae e fia mana’o i se mea e fai, alu i tamaita’i.”  

 

• Na ou matamata i le Samoa Observer ma ou maitauina ai le tele o saofa’i o fai nei, o nisi o taimi ua sili atu le to’atele o matai sa’o tamaita’i nai lo alii. Atonu e le o toe mamao se vaitaimi e sili ai le aofa’i o matai tama’ita’i, nai lo alii. Ma o se suiga lenei o le a fa’a-televave ai fo’i le fa’asafuaina o suafa sa’o o aiga. 

 

• E tele ma anoanoa’i nisi o mafua’aga na fa’asafua ai suafa matai. Ae ou te talitonu o le mafua’aga autu ua fa’asafua ai suafa matai, ona o le tau fa’amalieina o mana’oga o tagata, ona ua si’itia le tulaga i a’oa’oga ma le si’itia o le tulaga o le olaga. Ma le fa’aupuga lenei ua fai ma a’upega malosi, “ua tupu ma ola aiga.”

 

LAVASIGA O LE FA’ASAFUA O SUAFA SA’O.

• O nei la mafua’aga uma e pei ona ou tau fa’apupula atu e uiga i le fa’asafua o suafa sa’o, ua tula’i mai ni faiga fou ua manunu ai fa’avae taoto o le aganu’u, ma ua fa’ateleina ai fa’afitauli po’o lavasiga i totonu aiga ma nu’u. 

• Ae le gata i lea ua faatupula’ia le taugata o le soifuaga, ona ua mana’omia le tele o mea e fa’amalieina ai lagisoifua o se nofo a suafa. Ae le gata i lea, ua le mafai e se nofo a suafa ona ola ma soifua i fa’asinomaga ma lagisoifua o le suafa.

 

• Ma ua le o toe taua le upu lenei, “o le ala i le pule o le tautua,” ona o lea ua tai $1,000.00 le tau o le tele o matai sa’o a aiga.

 

FA’AALOALOGA

• A  silasila toto’a ma mata’ituina lelei e le mamalu o sasao nei le uiga ma le agaga tonu o le faiga fou lenei a se nofo a suafa e filifili so latou Fa’aaloaloga. O le agaga tonu lava lea na faavae ai e le aganuu le filifiliga o suafa matai sa’o, ina ia tasi le leo, tasi le ala i malo, tasi le ta’ita’i, tasi le pule ma e tasi fo’i le suafa e mafai ona soifua i fa’asinomaga ma lagisoifua o le suafa. Ma o lea lava ua toe fa’afo’i e le faiga fou lenei o le Fa’aaloaloga a se nofo a suafa, le Fa’avae na ulufatu ai le Aganu’u ma le Agaifanua i le filifiliga o suafa matai sa’o.

   

• E talitonu la le faipepa ua taua tele lenei faiga o le Faaaloaloga e toe fa’amanatu mai ai i aiga le agaga tonu o le faavae, e tasi lava le suafa e tatau ona filifilia e tausia le aiga. Aua o le agaga tonu na fai ai le faiga fou lenei o le Fa’aaloaloga, ina ia fa’afaigofie ona fa’afoe le aiga i le aloaia lea o lagisoifua ma fa’asinomaga ma le pule a le suafa sa’o. Aua o fa’asinomaga ma lagisoifua o se suafa, e tasi lava le suafa e mafai ona soifua ai.  Ae peita’i o le faiga fou lenei o le Fa’aaloaloga, ua aveesea ai le avanoa o isi o le nofo a suafa e soifua ai i le pule ma le fa’asinomaga ma lagisoifua o le suafa. 

 

O le Fa’aaaloaloga o se  tasi o suafa o le nofo a suafa ua ave i ai le fa’amuamua a le nofo a suafa e aga’i uma i ai fa’aaloaloga ma laei i lagisoifua ma fa’asinomaga o le suafa, ae le gata i lea, o ia e fa’aleoina se finagalo o le aiga i le saofa’iga a le nuu ma avea ma taiulu o le fa’afoeina o le nofo a suafa ma le aiga. 

 

O le fesili ogaoga lava ua tula’i, “aisea la na fa’asafua ma fai ai le toatele o lenei nofo a suafa pe afai e to’atasi le suafa e mana’omia e le Aganu’u e aga’i i ai le fa’atinoina o tiute ma matafaioi a le suafa sa’o, e pei ona toe faia e le Fa’aaloaloga a se nofo a suafa?” 

 

E foliga mai o le faiga fou lenei o le Fa’aaloaloga, o lea ua toe fa’amautuina ma toe fa’asa’o mai le sese o le faiga lenei o le fa’asafua o suafa, ona e na o le tasi lava le suafa Sa’o e mana’omia e aga’i uma i ai faamanuiaga, le pule, Lagisoifua ma faasinomaga ua atofaina i se matai sa’o. 

 

O le fesili la, “o le a la le taua na fa’asafua ai suafa sa’o?”  Ma o lea ua aliali manino mai i le faiga fou lenei o le Fa’aaloaloga ua sui fa’avae ma ua lavasiga ma afaina ai Aganu’u ma Agaifanua mamalu a Samoa.    

 

FA’ATA’ITA’IGA

• O ni fa’ata’ita’iga e fa’amaonia ai le leai o se taua na fa’asafua ai suafa sa’o. O le tele o suafa o se nofo a suafa, a fai fono a nu’u ae la e nofonofo i lalo o ulu, po’o la e nofo ma talatalanoa ma isi suafa i le umukuka. O le fesili aisea?  O le tali, ona e le mafai ona ofi uma le nofoa suafa i le pou e tasi ua atofaina e le saofa’iga mo lea suafa, e le mafai fo’i e le nofo a suafa ona taumamafa uma i le ava o le feiloa’iga. E le lua ni tofa a se suafa i fonotaga a nu’u. O le fa’asafua la o suafa sa’o o lea ua manunu ai le fa’avae o le aganuu e fitoitonu i se suafa sa’o.

 

O le suafa Sa’o, o se tofiga ta’ita’i. O se ta’ita’i o se lafu mamoe. A sili atu i le tasi le matai sa’o ona logo ese’ese lea o mamoe. O le fa’avae o le aganu’u, o le suafa matai sa’o, o le Pule. Le pule lea a le matai sa’o, lea ua tau sui i le Tausi Mea a aiga, ina ia talia gofie e tagata, ma aua ne’i logo a i le faalogo le upu pule fa’a-sa’o. Peita’i e tatau pea ona faia le mea moni ma sa’o. 

 

O le a le mea moni? 

O le tali : o le mea moni, o le matai sa’o na tofia e le Atua e pulea aiga ma le Atunuu. O le fetalaiga a le Alii fa’aola, afai e iloa e outou le upu moni e fa’asaolotoina outou e le upu moni. E fa’asaolotoina i latou o lo’o taumafai e fa’asili i le pule a le matai sa’o. O le mea moni la o le malamalama o suli e to’atasi se suafa sa’o o le aiga e tatau ona tofia ma filifilia e tusa ai ma faavae o le Aganuu. 

 

O le anofale atoa o le aganuu o le Pule. O le pule e afua ai Tu ma Aganuu. O le pule na fa’ataoto ai aulape po’o fa’avae e taiala ai le va nonofo o tagata o le aiga, le va nonofo o aiga ma le nu’u, ina ia malu le filemu i totonu o aiga ma le nu’u. Ma o lena pule e mai le Atua ia. E leai la se mea o le a tatou taumafai ai fua e sui le upu “Pule” i le upu “Tausimea.”

 

LAVASIGA MA FA’AFITAULI UA TULA’I MAI?

 

1. Afaina Tupu’aga ma fa’asimomaga.

Ua afaina fa’asinomaga ma tupu’aga o suafa, ona ua to’atele le nofo a suafa. Ua i ai taimi ua tula’i mai ai fe’ese’esea’iga i totonu o nu’u, ina ua taumafai nisi o le nu’u e lu’iina measina a le suafa, ona aga’i lea o le isi o nofo a suafa ua lagolago le itu o lo’o fa’ataute’e ma lui’ina le tupu’aga ma fa’asinomaga o le suafa Siaki, ona o ni fe’ese’esea’iga i le va o le nofo a suafa.

 

2. Su’e lanu i le suafa.

O nisi o suafa o le nofo a suafa, ua faatau le tofi i le ai e tasi, po’o ua su’e lanu fo’i i totonu o le nu’u e ala i lona lagolagoina o finauga a nisi o suafa o le nu’u o lo’o lu’i’ina le pule ma lagisoifua o le suafa lea e suafa ai, ona o se fe’ese’esea’iga a lea nofo a suafa. Ma o le pogai lava o nei fa’afitauli, ona ua fa’asalafa ma fa’asafua suafa.   

 

3. Afaina le fealofaniga ma le maopo’opoga o le aiga.

Ua afaina le fealofaniga ma le maopo’opoga o Aiga, e talu ai ua to’atele le nofo a suafa ua logo ese’ese ai fo’i le auaiga. Ma ua fevaevaea’i aiga. Ua le toe i ai fo’i se mafuataga a le aigapotpoto a le suafa, ona ua manatu ifo lava le suafa ia i lona tino, ae tu’ulafoa’i isi tino. Mai lea faiga, ua malepe ai le upu aigapotopoto i le filifiliga ma le taupulega. Ma ua le toe i ai se fai mea fa’atasi o le aiga.

 

4. Faiga fou o le Faaaloaloga.

Ua le mafai e se nofoa suafa ona soifua uma i lagisoifua ma laei o se suafa e tusa o fa’avae o Tu ma Aganu’u, ona o se faiga fou, ua fai le Fa’aaloaloga a nofo a suafa. O le toatele o suafa o lea nofo a suafa, ua na ona matamata a’o soifua le Fa’aaloaloga i fa’asinomaga ma lagisoifua o le suafa.

 

5. Le taua le upu, o le ala i le pule o le tautua.

Ua leai se taua o le upu lenei, “o le ala i le pule o le tautua.” O  le tautua o le tulaga sili lea ona taua sa filifili ai se suafa matai sa’o i aso ua mavae. Ona o le tagata tautua o ia lea sa va’ai ma fa’alogo i le auala sa fa’afoe ai e le matai sa’o le aiga ma le fa’afeagai ai ma le nu’u. Sa ola i aso uma ma fa’afeagai ma le sa’o i mea e fai. Ua na iloa ma malamalama i lagisoifua  o le suafa, e puipui ia malu tapu ma sasa o le suafa. O se tagata sa oe i taimi uma e vala’au ai le sa’o. O se tagata sa fofola i luma o le sa’o fua o aga fa’aele’eleaga ma ana fa’atamosoali’iga. O le ala lea o le upu lenei, “o le ala i le pule o le tautua.” 

 

Peita’i o nei aso ua fai saofa’i a le nofo a suafa ma o nisi lava o taimi ua o’o i le ta’i 100 matai e fai fa’atasi saofa’i. O ai lava la e maua le tusaga ta’i $1.000.00 ma le ie tele, ona fai fa’atasi lea o latou fa’afotu Tupu ma le fa’afotu o le Va’aulu. 

 

Mai nei faiga ua le mafai ai ona faamalie faavae o le aganu’u ua atofaina mo le fa’atinoina o se fa’afotu tupu ma se fa’afotu o le vaaulu, ua le mafai ona vaaia aganuu matagofie o le paolo o se tauali’i. Ua avea la nei faiga toatele o Saofa’i ua ave’ese ai le fa’atauaina e nisi o le fanau o le faiga o saofai a suafa sa’o.  O le ala fo’i lea, o le le manatu mamafa o suafa fa’asalafa i tapu ma sasa o lona suafa.     

 

6. Pule a le suli moni. 

Ua afaina le pule a le suli moni, ona o nisi o taimi ua fai saofa’i a se nofo a suafa mai fuaifale po’o faletama ese’ese o le suafa, ae ua tau fa’aofi ma maua ai le avanoa e fa’aofi mai ai se nofo a se tagata ese i totonu o se faiga saofa’i. O lenei la faiga o le fa’asafua o suafa, ua tele faiga fa’aalatua ua afaina ai fa’avae o se suafa sa’o e tusa ai ma filifiliga a suli moni.

 

7. Suafa ulufatu ma le suafa igagato.

Ua afaina le pule a le suafa ulufatu, ina ua lui’ina e le suafa  igagato. O se tasi lenei o aganu’u ua televave ai le tele o le fa’asafuaina o suafa o aiga ma ua afaina ai foi fa’avae o suafa. Ona ua i ai taimi ua aga’i mai ai suafa igagato e finauina lagisoifua ma fa’asinomaga o le suafa na ulufatu i le suafa. 

 

Ae peita’i o le suafa igagato e le’i i ai i le taimi na ulufatu pe afua ai fa’avae o le suafa. Ae ua avea ai fo’i lea tulaga, ua tele ai finauga ma vevesi i totonu o nu’u ma afioaga, ona o nisi o suafa igagato o i latou ua maualuga le tulaga o le poto salalau ma maua fa’ailoga maualuluga, ona taumafai ai lea e fa’aaogaina o latou tomai ma le silafia e fatu ai ni finauga e suia ma talepe ai fa’avae taoto o le ulufatuina o lea suafa. 

 

Ua fa’atupula’ia Fa’amasinoga o Fanua ma Suafa, ona ua tele manatu ese’ese ma lagona o le nofo a suafa. O le to’atele o se nofo a suafa, o le fa’ateleina fo’i lea o finauga ma le fevaevaea’ina o finagalo ma manatu. Ae le gata i lea, o le nofo a suafa e aia tutusa uma i le pule, lagisoifua ma fa’asinomaga o suafa. 

 

8. ‘Aupega a le  Suli fa’aalualuo.

O le fa’asafuaina o suafa sa’o, o se tasi lenei o faiga ua fai ma ‘aupega malosi ua fa’aaogaina e le suli fa’aalualuo ma le fa’aloloto e toe saofaga ai i le umia o le suafa sa’o o le aiga, lea sa umia e lona tama fa’atoa mavae atu.

 

O le tele o taimi o talanoaga a aiga e filifili ai se matai sa’o, ua atagia ai pea le toe tagisa o se atalii o le sa’o na se’i fa’ato’a mavae atu e faapea, e a pe finagalo malilie lo tatou aiga e toe tu’u mai le avanoa se’i ona toe fa’aauauina ai le tausiga o le aiga, ma fa’amae’a galuega tuua a lona tama. Afai la ae le aloa’ia e le aiga lea tagisa, ona taumafai loa lea o le atalii lenei e finauina le faasafua o le suafa, ina ia toe saofaga ai i le suafa. Ma o  se tasi lea o fa’afitauli o lo’o tupu mai i le fa’asafua o suafa sa’o.  

 

9. Afaina le vaitagata.

O le fa’asafua o suafa sa’o o aiga, ua afaina ai le vaitagata, ua leiloa e i’u o aiga, ulu o aiga. Ua fai keni le nofo a suafa i totonu o le nuu. Ua fa’atupula’ia le faitogafiti o le lautigalaulelei i totonu o le nuu, ona ua toatele le nofo a suafa e fai ma o latou ‘alofaga e pupuni ai ni a latou faiga fa’aalatua i totonu o le nu’u. Ma ua fa’atupula’ia finauga ma fevesia’iga i totonu o aiga ma nuu.

 

10. Fa’amalieina le tupu ma ola o le aiga.

O le fa’asafuaina o suafa matai o se faiga ua finau malosi e nisi o le mamalu o le atunu’u e faapea, “o se faiga e fa’amalieina ai le tupu ma ola o aiga.”

• O le fesili la ua tula’i :O le fa’asafuaina ea o suafa sa’o o aiga e faamalie ai le tupu ma ola o le aiga?

• Po’o le agaga tonu na afoafoa ai e le aganu’u le faia o matai sa’o e fa’amalie ai le tupu o aiga?

• Po’o le matai sa’o ea o se tofi e i ai ni ona tiute tauave ma ni matafaioi fa’apitoa e fitoitonu i le suafa sa’o e to’atasi e faia i le aiga?

 

E talitonu le fai pepa ua tatau nei ona toe autalu manatu ma fesiligia le agagatonu na ala ai ona ta’i tasi matai sa’o na fa’avae ai suafa sa’o o aiga. O suafa sa’o e lei afuafuaina e fa’amalie ai le tupu ma ola o aiga. 

 

O le suafa sa’o na faavae: 

“O se tofi po’o se valaauga ua i ai tiute ma matafaioi, pule ma fa’amanuiaga ua atofaina mo lea tofiga e ao ona fa’amalieina ma soifua ma ola ai le ua tofia i lenei tofiga, ae le o se tofiga e faamalie ai le lautele o tagata po’o le tupu ma ola o se aiga.”

 

O le mea lea, e sili atu le tele o fa’afitauli ma fatiatama’i e tutupu mai i le fa’asafua o matai sa’o i totonu o aiga nai lo le tumau i le tasi o le Matai Sa’o. E afaina fa’avae papa o suafa. E afaina tulaga mamalu o suafa. E fa’aiti’itia le tulaga mamalu o le suafa ma ua le mafai foi e suli o le suafa ona lagona le taua o le suafa pe afai e fa’asafuaina le suafa sa’o o le aiga. Ae o le isi tulaga e tatau ona mata’ituina, o le fa’atupula’ia lea o le  fa’asiliaupule ma le aguilagi o suli o le suafa i le fa’asafua o suafa sa’o o aiga.   

 

Ou te talitonu o nei lavasiga uma ua afua mai, ona ua fa’asafua ma fa’asalafa suafa sa’o. O le fesili, O ai e mafua ai?, o le Faamasinoga ea po’o suiga mai fafo?  Ou te leai atu, o i tatou lava ua talia nei faiga ua lavasiga ai le tulaga o le suafa sa’o i totonu o aiga.  Ma e tele la fesili ua tula’i mai i lenei faiga e fa’asafua suafa sa’o. 

 

Ma o fesili nei ua tula’i mai.

• O se fa’avae ea lou suafa sa’o e te tutu i lalo o le ulu, ae o la e papae le saofa’iga a le nuu?

• O se fa’avae ea o lou suafa sa’o, e te si’i laulau i le isi matai sa’o?

• O se fa’avae ea o lou suafa sa’o, e na o lou piilima ma faalogo ae o fa’ataoto le tofa a lou nu’u?

• O se fa’avae o lou suafa sa’o e te le faalagolago i se pou o le suafa pe ete taumafa i le igoa ipu a le suafa?

• O se fa’avae ea o lou suafa sa’o o lou taumafa i le umukuka, ae o la e taumamafa le saofa’iga i totonu o le maota?

• O se fa’avae ea o lou suafa sa’o o se ave feau a isi matai sa’o?

• Afai e te le o soifua ma ola i fa’asinomaga ma lagisoifua o lou suafa sa’o, o le a ea la le uiga o lou matai sa’o?

• O lou suafa sa’o ea, ua na o se mea e fa’amaufailoga ai lou tagata, pe ua na o se mea e te tiu ai?

• O le mea lea, sa sili ai lava ona fa’asuafaina oe i se suafa pitovao o le suafa sa’o, e te saofa’i ai i le saofa’iga a le nu’u ma tautua i suafa sa’o o le nuu. Aua afai e te le soifua ai i lagisoifua o le suafa sa’o, o lona uiga o lou matai, “ o lou matai ua na suafa e faalagi ai lou matai.”  E taua lou “iloa” o lou suafa matai, ae silisili ona taua lou soifua ma ola ai i lagisoifua o lou “iloa.”  

Le paia e, o sasao nei, talofa ua solo le falute, ua masofa le fa ua tafea pulu i vai, ona ua gau le auau sa tau ‘aso i ai le fa’avae o le Aganu’u, ina ua lilifa le poutu na totofi e le Atua e maua’a ai le fa’avae o le Aganu’u. 

Talofa e, o lele fo’i ua tausaili se upu e sui ai le upu, “pule fa’asa’o,” se’i fa’amalie ai le aia tatau so’onafai. Ae peita’i o lea lava na sa’afi tama fafaine a lou ele’ele, ae o lea fo’i na tau’ula’ula ai le tauasuasu o le tauafiafi o ou taulele’a  ma pepese, “na tofia e le Atua Samoa ina ia pulea e matai, aua o lona suafa na vaelua i ai.” Pese. 

Tumau i ou fa’avae ma lou tagavai, ona tumau lea o manuia mo Samoa.

Fa’afetai fa’afofoga mai.

© Samoa Observer 2016

Developed by Samoa Observer in Apia