O le soifuaga e le faigofie
“Ou te talitonu lava a’u ia e ala o le tagata lava ia e ala ai ona faaletonu lona aiga”
O le saunoaga lea a le tamā i a Utumapu La’asia Faimalo Iosia, 56 tausaga le matua mai le afioaga oTufulele i le la faatalatalanoaga ma le Fofoga o Samoa i le aso ananafi.
Sa taua e Utumapu o le fa’afitauli tele lava o lo’o feagai ma nisi o le latou nuu o le leai lea o se suavai e au atu i uta i le nofoaga o lo’o aumau ai le lautele.
“Mai lava i le amataga o le faafitauli tele lea o loo feagai ma le toatele o le nuu nei o le leai lea o se suavai.
“Ua ova ma le sefulu tausaga o feaigai le nuu nei ma lea faafitauli tele e le gata i lea ao le auala fo’i e gata lava le ta i le aai ae a omai uta nei e fai lava si faaletonu o le auala.
“E pei o nai faafitauli na lea e feagai ma le nuu nei.”
Sa ta’ua foi e Utumapu o le tasi faafitauli o lo’o feagai ma le to’atele o aiga o le le lava lea o le fa’asoa.
“O lo’u aiga o lo’o tu lele o lo’o i ai la’u ma’umaga, o la’u pa povi ma pua’a faapea ma le toga koko o mea ia o lo’o tausi ai lo’u aiga.
“Ae o lo’u talitonuga o le aiga lava e mafua ai ona fa’aletonu.
“Ae a lelei a ta ita ma lota aiga e leai se mea e ala ai ona popole fua i meaai ae o le aiga lava ia e ala ai ona fia’ai.
“O le tulaga lea e i ai e moni ua taugata le soifuaga ae ua masani lava i tau o mea o lo’o i ai e le o se mea fou foi le tele o suiga o lenei soifuaga.
“Ae a leai foi ni suiga e le mafai ona alualu i luma le olaga.”