O le tapa’a o se tasi nei o fa’ato’aga ua tele aiga i Samoa e le’o toe mafai ona galueaina ona o suiga i le tele o lea fo’i ituaiga o oloa mai fafo o lo’o ua fa’atauina i Samoa nei.

Aepeita’i ua le avea lea ma ala e fa’avaivaia ai le tamā i a Joe Isa’ako o Malie-Uta i le tōtōina ai o le tapa’a e fesoasoani ai mo le tausiga o le aiga.

“E tusa o le tapa’a lenei ua  lua ai tausaga talu ona tōtō i lo matou fanua.

“ O le faigata o le fanua sa i ai muamua, e vailoloa uta o le ma o le mafua’aga lea ua fai ai le isi tapa’a lea i le mapuepue e fuafua lea ia aua ne’i sau ai le vai. 

“O fatu nini’i e ave fa’amili muamua a o’o loa ina iloa ua tatau ona si’i mai ia ona si’i mai loa lea i’i i le isi pito o le fanua e pei ona ua i ai nei.

“ Ia e mo le silafia ai, ia e fa’aaoga le lima tusi e tōtō ai le tapa’a.

“A o’o lava ina sioki le tapa’a e $7 e fa’atau atu ai ae a  tele e $5 le ini po’o o le potoi.

“O la’u ini e fai lava le ini e iloa e sikuea ai, a o’o ina kiliva le 200 potoi ou te alu ma a’u e kiliva...ma e  amata atu i Aleisa e o’o i Aleipata.

“ E ave le $4 pe a kiliva, ae ave e le au fai pisinisi ma faleoloa i le $5, ia ou te sau ma la’u $800 i le aso pe a lelei lava a fa’atau o le aso.

“O le faiga lava o le tapa’a ia e fa’amatua lelei lona lau ona fati la’ia , ona  ave lea ua fa’apula mo po e tolu.

 “ A malama a’e le taeao ua pula lelei lona lau ona tipitipi loa lea ma ave fa’ala ina ona sauni lea e kiliva pe ā uma ona ini pe fai potoi fo’i.

“A tumu le paelo ia e ono 200 tapa’a e mafai ona maua ai.

Na ia fa’ailoa o le lelei ai o le ola o le tapa’a e fuafua lava  i le lelei o le palapala.

“E lua masina e fa’atali ai le matua lelei o lau tapa’a, ia ae o lo’u iloa i ai e tupe lelei le tapa’a.

“A fua atu ai, ia e  na’o le to’alua  o lo’o faigaluega ia  e le taitai ona lava le fa’asoa ae ua laki le tapa’a lea e fa’aa’o’oga ai tamaiti i le tele o aso.

“Aua a omai tagata fa’atau i le aso, ia e maua tupe ma fesoasoani a i le aiga aua e le feauauta’i tupe o lo’o maua mai i totogi.

“Ia o fa’afitauli i aso fai so’o ma masani ai, ia o le tau  fa’asoa lava i mea’ai i aso ta’itasi, pau lava la le mea e ao ona fai ia o le sefesefe lelei o tupe aua a’oga tamaiti i lea aso ma lea aso.

“Ae o lo’o agalelei pea lea Atua.