Lauga - O nanamu o Keriso

Tusia Petaia Setu ,

447 Hits

(II Kor. 2:14-17)

O ai ea ua talitonu i la matou upu e taulogologo atu; ua faaalia ia te ai le aao o Ioeva? (Isaia. 53:1-3). 

Ua faapea faasalalalauga a le tele o aiga i luga o ālā leo ma ālā ata faasalalau a le atunuu, “o le ‘a le avea lou le auai mai ma ala e taofia ai le faamoemoe o le aiga” O lea foi le loto o le aposetolo; ia faafetaia le Atua i lona mana ma lana pule ua malo ai pea le onosai ma le filigā ona o Keriso i le galuega molimau, ma le manogi o le ola o ia Keriso Iesu. E le vaoia e le lē talitonu le moni o le Atua (Ioane. 3:30). 

O le ‘a lē avea foi lou loto maaa ma lou finau vale i le upu moni, e taofia ai feau faailoa mai a le Atua mo le faaolaina o ona tagata, e ala i le salamō ma le faatuatua ia Iesu. 

Ua talia e le toatele o le ekalesia fautuaga ma le faatonu atu a Paulo i lana uluai tusi. Peitai, e iai lava le tiapolo i mea uma. 

A o le taipolo foi, e ui mai lava i kama makukua ma le au fai pine. Kama foi ia e mana’o lava e ‘I am’ i mea silisili, ma mea ofoofogia ma le tauleleia. 

Aisea? Auā foi o Paulo e lē o se soo! E leai ni ona tusi! (credentials) (II Kor. 3:1,2). E le o se aposetolo a Keriso! E le i faaolaina! E sa’o lea? O Paulo sa taa i le lalolagi. 

O lona lava olaga o tu ma aga faa Iutaia; o tulafono ma ala faafaresaio; sa fāifāi ma sauā i le suafa o Iesu. E le fia faalogo la se isi i se tagata taa ma amioleaga, ma fasioti tagata e pei o Paulo. Samoa, o manatua upu a le Atua ia Isaia, “o o’u manatu e le o outou manatu; ma o’u ala e le o outou ala…” (Isaia. 55:8) E masani foi ona ou faamanatu atu, ua iai le plan a le Atua i tagata taitoatasi uma lava. Vaganā ua e teena le plan a le Atua i lou olaga; auā na te le faamalosia oe. 

A o le faamanatu mai lea vaivaiga faa Iutaia e ao ina tatou manatua pea, e le taofia i so tatou tetee le feau o le faaolataga mai le Atua mo isi tagata. 

O manogi o le ola, o nanamu ia o Keriso o loo tiu ai le aposetolo. E alu lava le feau e le ‘alo. Ua le afaina poo ai oe a o le a le ituaiga lagona ma manatu  o ia te oe. E le gūgū le talalelei o le olataga. A o le filifiliga, o le saolotoga lena o le tagata.

O le aoaotetele o le vaai a le tusi nei ia Iesu Keriso, o le Atoatoa Ia o mea uma. O lona uiga, o le lelei, o le maopoopo, o le saoloto, o le mafanafana, o le malosi, i le, ma le OLA o mea uma, o ia Keriso Iesu. Se ā la e faafitia ai e Iutaia? Ua taumate i se ā e le ekalesia i Korinito? 

O vaivaiga masani o le tagata. Ua faigata ona talitonuina le talalelei pe afai ua utia ai i le faamaoni o le talalelei. Ua tatou faamasinoina le upu moni pe ‘a le maua ai so tatou taulelei! Ua mafi ai tele foi lo tatou atunuu i la ia uiga vaivai, ua siligia ai o tatou tagata lotu, ma ua tatou vaai lelei atu ai ma le manino lelei i le faaolaina faafoliga, o loo pepese ai nei le toatele ma taulagi!

Samoa e, tatou o loo taotaomia i aoaoga ma le poto faaleiloga o tagata, pupula ou mata. Ua e vaai i le molemole ma le fe’ilafi. 

Ua tatou faitau i le amiolelei ma le tausaafia; a ua galo ia te oe e le o se moega faamalū, ma se faletioata na fanau mai ai le Mesia. E le o se taavale ea malūlū na tietie ai i lana malaga faa-tupu. Se a sau taga’i i lona maliu, o se tuumalo o se tupu? 

E le i faia sona loa e taoto ai auā ua na o se atalii o se kamuta! O ‘e maitau mai Samoa mea uma nei, o mea nōnō? Se a se telē e te fuaina ai lau oe lava aitalafu i le soifua o le Alo o le Atua? Ae faapefea ona e tala sesēina ma upu vale i faaaliga mamana ua aumai e le Atua i o tatou augātupulaga? 

Ua e faaliliuina i ou talitonuga ma mafaufauga sesē, ona avea ai lea o le finagalo alofa o le Atua o se manogi o se oti e oo i le oti, i lou agaga oti; a o le manogi o le ola e tupu atili ai le ola i ē ua faamaulalo ma talia le Alii. 

Viia le Alii! Ou te le fefe e ta’u atu lenei feau. Ou te mata’u i le Atua Silisili o le lagi ma le lalolagi. Se a ea ua saga faanunununu ai le atunuu?

Samoa, o loo tautala Paulo i le Iesu Keriso o loo fai ma tumutumuga o mea uma. O le Ao ia o le Ekalesia. O le atoaga o mea uma. O Ia lea na maliu ma toe tu. E le faaluaina e se tagata.

A o o tatou augātupulaga, ua aumai ai e le Atua le ‘faailoga vaaia’, e fai ma lagisoifua o le Alofa Faamaoni o le Atua ia te oe ma a’u, e fafagu mai ai i tatou uma, ua lata mai le aso o le Alii. Ua silia ma le tolu sefulu feau tuu sa’o mai e le Atua i lana auauna o Toaipuapuaga i le gagana Eperu ma le gagana Aramaika. E mafai la e oe le tagata faitio ona faaliliu ia feau? Tatou tatalo i le Atua ia faamalamalama mai i o tatou loto nei feau uma. Samoa, tatalo.

Tatalo! Tatalo! Tatalo mo le afafine ua faaaoga e le Atua i lana lava plan e faaali mai ai lona mamalu ma lona silisili ese. Fai mai Moretekai, O ai na manatu o le a fai oe ma masiofo a le tupu ona o se aso faapenei? (Eseta. 4:14). Ae fia ni tagata o i Samoa ua tuu iai e le Atua le malamalama e faaliliuina ai nei feau mo oe ma a’u? Uso e, ma Samoa e oo atu iai lenei feau, ‘aua le vave i le faitio, a ia tatou faaeteete, auā ua le o le afafine, poo se agaga leaga, a o le Atua lava. Aleluia! 

Le ekalesia e, ma le au failotu, ‘aua le feta’aiina faalou-le-magā le valaauina i manatu faafaresaio ma aga faa Iutaia. O loo taulagi pea le Atua i le pouliuli (Ioane. 1:5,10,11). “Tulai ia, inā malamalama ia; auā ua oo mai lou malamalama; ua alu a’e foi le pupula o Ieova i ou luga.” (Isaia. 60:1). Pupula ia ou mata ina ia e iloa, e faaaoga e Iesu le faavalevale (Mat. 11:25); o ē mama’i; ma tagata amioleaga (Mat. 9:13). Aua tatou te faamasinoina tagata. Vaai oe ia te oe ma lau fanau. (Mat. 7:1-5).

Tautala i le upu moni ua e talia ma ola ai. ‘Aua le palu faatasi le talalelei ma au mailei. Fai mai Paulo, a o i matou, ua matou tautalatala atu mai le loto lelei. (f.17) Ioe, Samoa, mai le loto lelei. O le fale lea e manaomia e tatau ona taoto lelei ai le faamoemoe ola o le sasala atu o manogi o le ola, o le loto lelei. Le loto mai le Atua.

E le tauilo le tagata o le Atua. E agamalu; e loto maulalo; e onosai ma faapalepale; e alofa; e le taui atu le leaga i le leaga; e mamā le loto; e talileleia le feau mai le Atua; e le ‘e’ē faafoliga i luma o mata; e mata’u i le Atua. Fai mai le aposetolo, o lenā. O le loto lena mai le Atua, o i luma o le Atua, le sa’o ma le atoatoa. 

Le au uso e, e le faigofie ona fai ma so’o o Iesu. Na o le tagata e telē le fatu. Na te mafaia ona inu i tuuaiga ma leaga uma e lafoai i lona tumua’i. E oono mālo (Mat. 5:39). E le ‘alo i puapuaga ma faigata. E tuu lona ola i lona lima e tautua ai i lona Alii ma lona Faaola. Fai mai Paulo, o i matou ua ia Keriso. O i matou ia, na filifili e le Atua i le loto. Loto ia, ua masofasofa mo lou saolotoga. Loto ua faafaileleina ai le ola. Loto ua nanamu i tiga ma puapuaga o Keriso. Loto ua nanamu i le faaeaina ma le manumalo o Keriso Iesu. 

A o oe, se nanamu o ai oe?

Amene.

7737063/7783782

E-mail: petaiasetu@gmail.com

 

© Samoa Observer 2016

Developed by Samoa Observer in Apia