O lo’o tausia lelei aganu’u fa’asamoa i afioaga i tua

Tusia Sarafina Sanerivi ,

141 Hits

SILI LAVA NU’U I TUA: Sanele Uaita mai le afioaga o Eva.

SILI LAVA NU’U I TUA: Sanele Uaita mai le afioaga o Eva.

O Sanele Uaita o se taule’ale’a mai le afioaga o Eva. 

E 27 ona tausaga ma e fai lana fa’ato’aga fa’i e fesoasoani ai i mea tau tupe aemaise fo’i o le fofoga taumafa o lona aiga. 

E fa’apefea le olaga i nu’u tua mo Sanele? 

Na ia fa’ailoa mai ile Fofoga o Samoa, “e sili lava le ola nu’u I tua.”

“Iā te a’u a ia e manaia a le nofo i tua i nu’u i tua auā e sefe atu ma e leai ni fa’afitauli tele. 

“E lē pei o Apia e latalata I tai ile taulaga, e tele a ina tutupu fa’afitauli ona o le tele fo’i o nofoaga e tafafao ai i Apia. Ma o le ala lena e fiafia ai le to’atele o tupulaga i Apia. 

“Ae o le olaga I tua nei, e mafuta lava I matua I aso uma a, amata mai lava ile Aso Sa e oo ile Aso To’ona’i. E sili atu ia a’u le nofo I tua nei aua o tua nei o lo’o mamalu ai pule a ali’i ma faipule ma o lo’o fa’atumauina ai fo’i le aganu’u fa’asamoa ma le olaga fa’asamoa I nu’u I tua. 

“Auā ua tele lava ina amata ona mou atu le tele o tu ma aga fa’asamoa ona o le tele o suiga fou o le olaga. Ae o tua I nu’u I tua o lo’o tumau ai lava le mamalu o aganu’u fa’asamoa.”

Ma ole ala fo’i lenā e fiafia ai o ia I le olaga I nu’u I tua. 

Na ia fa’aopoopo mai fo’i fa’apea e tele ni mea aogā o lo’o a’oa’oina ai o ia ile nofo ai i nu’u i tua. 

“Auā ou te va’ava’ai lava ma maitau le olaga o matua foi po’o au ao sinasina ma a’oa’o mai ai le amio e tatau mo tupulaga Samoa.”

Peita’i, e talitonu Sanele o se tasi o fa’afitauli o lo’o feagai pea ma nisi o tagata ole latou nu’u, ole nonofo mamao mai lea mai le taulaga o Apia. 

O lona finagalo, ua tatau ile malō ona fa’ame’i atu nisi o kamupanī tetele ma ofisa ole malō i nu’u ma alalafaga i tua. 

“E to’atele tagata o le matou nu’u e faigaluega i Apia.

“Ae ole fa’afitauli e mamao mai tua le matou nu’u mai le tele o Kamupani tetele ma ofisa ale malo. 

“Ia e pei o le fa’afitauli lava lea e feagai pea ma nai isi tagata o le matou nu’u. E tele lava ua iai auala o nisi o aiga e faigofie la ona o atu i Apia mo galuega ae o lo’o iai lava nisi o lo’o fa’a-faigata pea ona faimalaga atu I Apia ile mamao. 

“Pei e manaia fo’i ae amata ona fa’asafua mai I tua ni atina’e o nisi kamupani I nu’u I tua aemaise o ni lālā o ofisa ole malo ina ia fa’afaigofie ai ona usu I latou o feagai ma galuega auā ole mea e lelei mo Apia e lelei fo’i mo nu’u I tua.”

E pei lava o le tele o nu’u I Samoa, o fa’ato’aga lava e fa’amoemoe i ai tagata o le afioaga o Eva e fesoasoani ai i alagatupe mo le aiga aemaise fo’i o mea’ai. 

“O le ma’umaga lava ma fa’atoaga e tua i ai le tele o aiga auā fo’i le tausiaina o aiga ma atina’e ai o latou aiga. 

“Ia o nisi o aiga e fa’atau popo auā fo’i ni seleni e tausi ai aiga aemaise fo’i ole tautuaina o nu’u ma ekalesia. 

“E mo’i e tigaina le faiga ole ma’umaga, ae suamalie ia pe a selesele nei fua o fa’atoaga ma galuega.”

© Samoa Observer 2016

Developed by Samoa Observer in Apia