Manatu O Le Fa’atonu - ‘Ae mafai ona iai se Palemene e aunoa ma se malo?

By Fa’aliliu e Maiava 04 August 2016, 12:00AM

Ono tausaga talu ai, na matua olo-palaina ai le Tulafono Aupito Maualuga a Samoa - lona Fa’avae. E to’atele na manatu e matua le-tatau lea fuafuaga i lea taimi peita’i sa maumaututu lava le finagalo o le Palemia o Samoa, e tonu ma sa’o le mea ua na fai.  

E foliga o lona fa’amoemoe lea, o le fa’aleaogaina o ripoti a le Pule ma Su’etusi Sili, o Fuimaono C. Afele, e uiga i tupe-fa’aalu a le Malo – fa’atasi ma isi vaega, mo le tausaga e 2010 ma le 2012, ae po’o le a lava le mafuaga, e le’i matua manino lelei  ma e foliga mai lava, ua manumalo to’atasi lava ia.  

Tiga lava fo’i le le-mautonu o le atunu’u i mea sa mafaufauina e le Ali’i Palemia e ono suia i lena taimi, a o le mea moni, e leai lava se tasi e toloa le finagalo o le tamaloa, e pei o lana anava ma lona ma’ema’e masani ua malama nei i ulugalu. 

O le mea lava e tasi, atonu po ua toe ta-sui ia ripoti ina ia ‘ave’esea ai ma fa’aleaogaina ni vaega o iai ni fa’amaoniga ma mea moni, a o le taunu’uga lava lea, na o tupe ma’umau i le tu’u-fa’atasia o ia ripoti ma fa’amauina ai, o mailei mo faiga-pi’opi’o ina ia saga faifai-pea ma fa’aolaola atili ai  pea i Samoa nei.      

Ae le na o le pau lena, ona o lea lava e le’i o’o nei ripoti i le laulau-a-fono a le Palemene e pei ona fa’atulafonoina, ua matua manino ai le mata o le vai i le fe’au ua momoli mai mo Samoa uma sa fa’ananau e fia iloa le mafuaga i lena taimi.

Ioe, lea lava na ta’ua i le amataga, e leai se tasi e mafai ona taofia i lena taimi, le Palemene mai le suia o so’o se tulafono latou te fai, ae maise fo’i tulafono e le’i faia.   

O le taunu’uga la lea, o nei aso, o lo’o soifua Samoa ma matou feola i se atunu’u e foliga ua pulea e se Palemene, e matua tausisi tele i tulafono, ma o se mea lelei tele, aua e ono tupu ai se manatu, a-mea o le Palemene o Samoa, o se nofoaga e tatau ona soli ai le tulafono.O lo’o manino lelei le Tulafono Aupito Maualuga a Samoa – po’o lona Fa’avae fo’i pe a finagalo ai – i le matafaioi a le Pule ma Su’etusi SIli.

Vaega e 97 (12) o lo’o fa’apea: “E tatau ona iai o se Pule ma Suetusi Sili, e tofia e le Ao o le Malo i luga o le fautuaga a le Palemia.

 “O le Pule ma Su’etusi Sili e ao ona su’esu’eina ma fa’amaonia Tupe i Vaega uma a le Malo, ma so’o se vaega o le malo ua fa’atuina, o fa’amaumauga o tupe a Matagaluega uma e pulea e le malo e aofia ai so’o se itutino o le malo e pei ona aiaia i lalo o le Tulafono.” 

Lea lava e matua manino mai le Tulafono Aupito Maualuga a Samoa, e fa’amautuina le taua: “O le Pule ma Su’etusi sili, e ao ona ripoti fa’atasi i le tausaga, i le Fono Faitulafono i le fa’atinoga o lana pitola’au e pei ona iai i lalo o le Vaega lea, ma e tatau i lana ripoti ona fa’amanino o so’o se faiga le-talafeagai na te maua i ana su’esu’ega o le fa’aaogaina o tupe.”

O i tonu lava lea ua tula’i mai ai le fa’anunumi.O le fesili: E fa’apefea la ona fa’atino tiute-fai o le Pule ma Su’etusi Sili e pei ona aiaia ai i le Fa’avae, i ana ripoti o tulaga tau-tupe o le 2010 ma le 2011, pe afai o lo’o fa’aloloa pea ona le-tu’uina atu i le laulau-a-fono a le Palemene ma le-talanoaina lava e pei ona fa’atonuina e le tulafono?  

O le mea moni, o le a se mea e tupu pe ana fa’ananau pea le malo e usita’ia le tulafono, ae ‘aua le tanuma’ia i lalō ma foliga e leai se aoga, ae maise lava le latou fa’atinoga o nei ripoti uma a le Pule ma Su’etusi Sili?

E le gata i lena, a’o le a se mea e ono tupu pe ana le-atoa i fafo e Tuila’epa ripoti nei, e foliga mai ai e matua ogaoga se fa’aletonu o iai, ae fa’atagā lalafo atu i le Komiti a Ofisa o le Palemene fa’atasi ma le fa’atonuga, ia iloilo fa’alua ai ma toe fa’afo’i atu i le Palemene?  

Se’i matou toe fa’amanatu atu. Ua ono lelei tausaga talu ona tupu lena mea.O ananafi na fesiligia ai Fuimaono mo sona finagalo ae saunoa mai e ala i sana tusitusiga fa’apea “o le tali a le malo i le ripoti a le Komiti a Ofisa o le Palemene i fa’asa’oga, o fa’atinoga e fo’ia ai fa’aletonu atoa ma fa’amatalaga, na fa’alauiloaina i le 2014.”

O le taimi nei, o lo’o tapena ripoti mo le 2013, 2014, 2015 ma le 2016 mo le tu’uina atu i le Palemene fou ua iai nei, ae le’i mae’a le masina o Tesema 2016, pe a tusa ai.” 

Mulimuli lava i ana saunoa o lo’o fa’apea ai: “O su’esu’ega ma ripoti a Matagaluega ma Itutino uma o le malo, ua mua’i su’esu’eina e o’o mai i le 2015 a’o le’i tapenaina ma tu’uina atu ripoti o ia tausaga i le Palemene.” 

 “’Ou te talitonu o lenei tusi o le a maua ai se fesoasoani mo au fesili sa tu’uina mai.” 

Ioe, e fesiligia pea, aisea lava ua atu-popole ai ne’i afaina pe soloia fo’i le Tulafono Aupito Maualuga a Samoa e le pulega a le Vaega e Puipuia Aia Tatau a Tagata?  

Ae moni a, o le ao-ole-fua a le HRPP i le Palemene i le taimi nei, e faigofie ai lava i le malo ona fai latou e aunoa ma se Palemene, pe a manana’o ai.

Tatala mai le ‘ato-ponapona Samoa.

 

E Taua: O saunoaga a le Pule ma Su’etusi Sili, le Afioga a Fuimaono Camillo Afele, sa tu’u aloa’ia mai i le Tusitala o Lanuola Tusani Tupufia, i se fetufaa’iga ananafi. 

By Fa’aliliu e Maiava 04 August 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>