Toe manatu tasi lava...E Tigā le Mea Moni

Tusia Fa’aliliu e Maiava ,

140 Hits

Toe mafaufau tasi lava…O Henri Latour, o se ali’i leoleo-nanā sa aupito logologoa i le Malo o Farani i le Seneturi e 19. E atamai tele lea ali’i i le faiga o su’esu’ega, le sa’ilia o molimau – o mea e va’aia, o mea e fa’alogo iai ma mafaufauga fo’i, ona tu’ufa’atasi uma lea e tau sa’ilia ai se pagota a’o se tasi ua solitulafono ma ‘ave ai i le fa’amasinoga. Ae na matua fa’ate’ia, ina ua uma fa’afuase’i  lona soifua.

Sa ‘auina atu Henri Latour, i le nofoaga tonu na tupu ai se fa’alavelave mata’utia, o se solitulafono mātuiā. O se ulugali’i matutua, na osofa’ia e se tasi, ‘ave fa’amalosi a la mea-totino, ae fa’ai’u i le fasiotia fa’atasi o la’ua uma. Na pu’e ma loka e leoleo se tasi na masalomia. Peita’i, i se tama’i taimi pu’upu’u lava na iloilo toto’a ai ma va’ili’ili mae’ae’a e Henri le nofoaga tonu na tupu ai le fa’alavelave, fa’apea ma mea na avea ma molimau na maua ai, na vave ai lava ona mautu lona taofi, e sesē le tagata ua pu’eina ma loka e leoleo. Na ia ta’utino ai i leoleo ma le aiga loto nuti-momomoia, o le a ia sa’ili’ilia ma tu’ufa’atasia uma vaega e le o atoatoa o lenei tupua, atoa ma le tagata na faia lea galuega le-alofa.  

O i tonu lava, na mapuna a’e ai le mea lea na fa’aigoa e tagata, o le sa’iliga aupito-mata’utia o se pagota i le tala fa’asolopito o Farani. Na fa’ato’ato’a lelei e Henri Latour, le aoina ma fa’aputuputu vaega laiti uma e molimau, auaua’i ta’itasi ona va’ava’ai ma su’esu’e lelei, ma i’u ai loa ina maua tonu lava lana pagota o tau-sa’ili.

Na vivi’i e nusipepa,  le mā’emā’e o galuega su’esu’e a le leoleo-nanā, ma fa’asalalauina ai lona ta’uta’ua tele i tulimanu uma o Farani. Ae fa’afuase’i lava, ina ua uma le fa’amasinoga, ae ritaea le ali’i o Latour ma tu’ua loa lona atunu’u.

O le mea moni, mo le 25 tausaga na totoe o lona soifua, sa nofo ai lava na o ia. Silasila fo’i, na fa’atoa fa’ailoa fa’alaua’itele lava i totonu o Farani, fa’amatalaga e uiga i le pagota lea na tau sa’ili, ina ua mae’a ona falelauasi le Ali’i o Henri. O le mata’upu lenei, na matua fa’afiti Henri Latour e ‘alo ai mai le mea moni, e ui lava i ana su’esu’ega sa faia, sa iloa ma fa’amaonia ai, o le fasioti-tagata, e le o se isi lava tagata ‘ese, a o lona lava atali’i moni!  

E iai taimi e matua tiga ai lava le sa’iliga o le mea moni. Ioe, e tiga. Peita’i, e le umi lava ae tatou toe talia. Ae moni a, e leai lava se tagata e sa’olele i le ola nei:  o mafaufauga leaga, o ‘upu sese ma ‘upu leaga, leaga amio, fesasia’i mafutaga ma so’otaga ma isi, ma le anoanoa’i o isi amioga sese.  

Ae vagana lava ua tatou ta’utino le mea moni i Lē Na faia tatou, e le mafai ona sa’oloto ai o tatou mafaufau mai lea agasala, i le olaga atoa. O ī tonu fo’i, fa’atoā tatou iloa ai le tiga, le taui o lo tatou manatu fa’apitoa ma le mitamita-fa’aleTagata, e le taitai fa’atusalia i le motusia o lo tatou so’otaga ma Le Atua foafoa. Pau lava le mea tatou te fai, o le tatalo i ā Iesu Keriso mo Lana fa’amagaloga ma se Ola fou. A ta’ita’i Ia, o le a suia i tatou ma ola fo’i i Ona ala, aua, ona pau lava lea o le ala e mafai ona maua ai le filemu o le mafaufau ma sa’oloto moni ai. Toe mafaufau tasi lava…  

© Samoa Observer 2016

Developed by Samoa Observer in Apia