MAFUTAGA FA’ALE-AIGA A SA-‘ANETONE

By Ilia L Likou 04 August 2016, 12:00AM

O le vaiaso nei o lo’o potopoto fiafia ai suli o Anetone Luafatasaga Kalapu o Tuana’i, Matautu, Lauli’i ma Luatuanu’u mo se fa’amoemoe fa’apitoa. 

O le tua’a (tama) o Anetone, o Luafatasaga Kalapu, o le ulua’i Fofoga Fetalai lea o le Palemene a Samoa, na tofia e le Malo o Niu Sila a’o le’i avea Samoa ma Malo Tuto’atasi i le 1962.

E lima aso o lenei mafutaga o lo’o faia i Matautu, ma o lo’o ‘auai mai ai sui o le aiga mai Niu Sila, Ausetalia, Amerika ma Amerika Samoa.

Na fa’aalia e Kiliafaga Ricky Anestone, o se sui o lea aiga e fa’apea, o le fa’atasiga lea, o le tu’ufa’atasia lea o tagata uma na tutupu mai matua, ia toe mafuta ma fa’amalosia atili le so’otaga va-va-lalata fa’aleAiga ae maise o le vivi’i fa’atasi ma ‘ave le fa’afetai i le Matai Sili i le Lagi. 

“O le matou mafutaga muamua lava lenei ma ua iai le fa’amoemoe e fa’aauau lenei fa’amoemoe i tausaga uma,” o le fa’aaliga lea a Kiliafaga.

“Ua tolu auga-tupulaga ma o se fa’amanuiaga lea o lenei aiga ua mafua ai ona manana’o e tu’u-fa’atasia i lenei tausaga ma toe feiloa’i ai fo’i. Ua matua fiafia tagata uma.”

E tele vaega o lenei mafutaga e aofia ai fa’afiafiaga, o ta’aloga ma isi lava fuafuaga e mafuta atili ai ma maua le agaga fa’aleAiga.

 “A o se avanoa lelei tele lenei ua mafai ai ona tu’u-fa’atasia uma a matou fanau, e le gata ia latou o i Samoa nei a’o uso ma tuafafine ma fanau mai atunu’u mamao,” o lana fa’aaliga lea. 

“Pei lava ona silafia i so’o se ulua’i mafutaga lava fa’apenei, e toe mafaufau ai i le Alofa ma le Agalelei o Le Atua ona o Lana meaalofa o le ola ua mafai ai ona tu’u-fa’atasia lenei aiga i lenei tausaga… o se fiafiaga tele lea ia matou uma, ona ua toe feiloa’i fiafia ona ua fai si leva o valavala ma le to’atele.” 

“O le fa’amoemoe lava lea, po’o fea lava o le lalolagi nei e o’o iai tagata matutua ma fanau, a ia latou iloa lelei le mea e o-mai ai.” 

O Anetone Luafatasaga Kalapu (ua maliu), e to’asefulu ma le ono ona alo.

By Ilia L Likou 04 August 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>