1. Matauina i Tala Fou se ulutala fai mai-“Ua falepuipui se Tamā-ona o ni ana faiga faatautala ma le le popoi i se teineitiiti e 4 tausaga le matua. O le matau la i lea tamā-o se tagata ua matua ma ua 34 ona tausaga! E le o faalauiloaina la faalaua’itele le suafa o lea alii ona o le puipuia o lenei ‘alu’alutoto na aafia i lea faalavelave. E tusa ai la ma le otootoga o mea moni faamaumauina a le Ofisa o Leoleo- o lea alii ua faasalaina-sa faigaluega mo le tamā o le tamā o lea teineitiiti ua afaina.

Fai mai o le aso 20 o Me 2016-sa i ai le alii lea ua faasalaina- i le fale o le teineitiiti lea ua afaina –pe tusa lea ma le itula e 3 pe 4 i le aoauli o lea aso. Fai mai sa alu lenei teineititi ua afaina i totonu o le potu malolo-ae mulimuli atu ai ma lenei alii faatautala. Ona nofo lea ma loka le potu-ae faasaga ane fai ana faiga mataga i si nei ‘alu’alutoto…! Fai mai na te’i ane le tina o lea teineititi- ma na iloa ai-e le o i totonu o le potu lana tama.

Ina ua mavae ni minute pe lima-na toe tamo’e ane lea teineititi i totonu o le potu- ua matua fefe lava. Ina ua fesiligia e lona tina poo fea sa i ai-sa ta’u atu e lea teineitiiti i lona tina le mea na tupu-atoa ma le mea na fai e le ua molia ia te ia. Sa alu loa le tina o le teineitiiti lea ua afaina i lea alii ua tuua’ia-ma lipoti atu loa i Leoleo le mea ua tupu i lea lava aso! Ia- o se tala umi na’ua lenei tala-ae afai ua tupu lenei faalavelave i si nei ‘alu’alutoto-o lona uiga la-o le mea foi lea e ono lamatia ai alo ma fanau teine uma a le atunuu-ona o tagata faatautala faapenei!

Afai la ua 34 tausaga o lenei alii-toe fua i le mea mata’utia na ia faia i lenei ‘alu’alutoto-o lona uiga-o se fe’au tau molimoli foi lea i le atunuu lautele-ina ia matua mataala i le vaaiga ma le tausiga o a tatou fanau teine-ona o le mata’utia o mea ua tatou vaaia i totonu o Samoa i aso nei! Afai foi la e taua lenei mataupu mo pulega a Alii ma Faipule o afioaga ma alalafaga ta’itasi-o le tuu-a-lalo-“e lelei ona titina le afi a’o le’i sasao”-aua o le mea ua tupu-e toe tupu foi-ma e mafai foi ona tupu i ni outou alo ma ni a matou fanau! O le a sou taofi? 

2. Matauina foi i Tala Fou le mata’ina o sauniga e sami ai le taumafai o fanau ua faamanuiaina  i aoaoga-e pei ona faia i Tuana’imato. O le matau lava ia i nei sauniga-ua matua toatele lava alo ma fanau a le atunuu ua faamanuiaina lo latou taumafai tau aoaoga. O se fiafiaga tele foi lea o matua ma aiga uma e faasino i ai nei alo ma fanau. A fua i le vaai mamao pe afai o le a faateleina pea alo ma fanau e faamanuiaina a latou taumafaiga i aoaoga-o le fesili-o fea a faaaoga i ai le tautiga o nei fanau pe afai e le maua ni a latou galuega e tausi ai o latou matua ma aiga? O le a se taumafaiga a le Malo o fai mo lea tulaga? I se tasi faaupuga- afai e leai se fuafuaga a le Malo o faia mo lea itu-e faapefea la ona fo’ia le tulaga mativa ua i ai nei le atunuu?

Ia atonu e mafai ona faapea mai le Malo-“a ua leai ni galuega- ona o lea e fai faatoaga…….! Ae afai la e fai faatoaga ma faamanuiaina a latou taumafaiga-e faapefea la ona maua ni o latou manuia- pe afai e le aveina fua o a latou faaeleeleaga i fafo? O le a sou taofi?

3. Matauina foi i Tala Fou le manaia o le ata o le kegi a alii talavou ia-na faatoese ma talosagaina se faamagaloga mai le afioaga o Vaimoso. Ua atili manaia la lea ata i le vaai atu -ona ua talia lelei e le afioaga le latou faatoesega-faatasi ai ma aiaiga ma tuutuuga ua tuuina atu e le Afioaga o Vaimoso. Ae o le itu e sili ona faafetaia ai lea tulaga-o le finagalo o le afioaga ina ia tapu le faiga o lea vaega o tupulaga-ina ia ‘aua lava nei toe faia!

E ui lava la ina o lea faatoa mae’a atu lea tulaga-ae o le itu e sili ona taua-“Ua fai e lea Afioaga le faataitaiga lelei mo Samoa atoa! Afai la ua mae’a ona fo’ia lea mataupu ma o le a mata’itu pea e le afioaga aiaiga ma tuutuuga ua fai-o lona uiga la-o se fesoasoani tele foi lea mo isi lava nuu-o loo tutupu mai ai faafitauli faapenei-ona o amioga a tupulaga talavou! O le a la sou taofi?

-AP