Laki ‘oe (Vaega II)

Tusia Fa’aliliu e Maiava ,

177 Hits

Toe mafaufau tasi lava… Na fesiligia se Ta’ita’i ‘Au, po’o a “fa’ailoga e maua ai se laki” na te tau’avea pe a alu i le taua, ae tali le ali’i: “’Ou te le tau’avea na mea i lo’u tino. ‘Ou te tau’ave i lo’u fatu.”  O ananafi na tatou talanoa ai, uiga-lilo po’o misiterio o tagata “laki”, ina ia fa’aleleia ai avanoa, tatou te manuia ai fo’i tatou ma fa’amalieina ai mulimuli.   

O le lona lua o uiga lililo o tagata fa’amanuiaina, o le mafai lea ona latou taofiofi o o latou lagona o le fefe ma le lē-mautonu, le mitamita-vale, le ita ma le manatu-fa’apito. O le fa’atonutonu lelei o o tatou manatu le-manuia ma lagona tau-fa’aleaga ia, e atili mautu ai o tatou manatu, e amana’ia ai tatou, ma tatou soifua filemu ai ma isi tagata.

E tatau lava ona tatou taumafai, e pulea o tatou lagona, a leai, e i’u ina latou pulea tatou e lagna ia ma fa’aleagaina ai o tatou olaga fa’apea mafutaga va-va-lalata ma isi. 

Lona tolu o uiga le-va’aia o tagata ua fa’amanuiaina, o lo latou silafia lea, e le mafai ona suia o latou olaga, pe a na o le nofonofo i le fale. E tatau ona o i le mea o iai tagata, ma amata ona toto i o Lou fatu, le naunau e ola fiafia fa’atasi ma ia finau i mea lelei mo le olaga. Ia nofo sauniuni ma ia tatala lou tagata i mafaufauga ma avanoa fou.

Ma ia sauni, e fai mea-sese. Ona pau lea o le ‘auala tatou te maua ai tomai ma agava’a fou e ‘ausia ai le mau manuia i le ola nei. O nisi o avanoa aupito lelei mo le manuia, e maua mai a tatou mea-sese sa fai, pe a iloa a’o’oga mai ai.  

O le lona fa o uiga le va’aia o tagata ua fa’amanuiaina, o le le fa’atusatusaina lea o o tatou soifua, i olaga o isi tagata, aua ua latou silafia, e iai tagata e iai malosi’aga fa’apitoa, o iloa, o tomai ma agava’a latou te le o maua. Ui i lea, e tatau lava ona e taula’i ‘Oe, i ou fa’amoemoega mo le soifua nei, ina ia e a’oa’o ma iloa mai manuia ma mea-sese fo’i a isi tagata.    

O le mulimuli o uiga le-va’aia o tagata fa’amanuiaina, o le mafai lea ona latou va’ai i itu-lelei o o latou olaga ma fa’afetaia, e o’o lava i le taimi e tutupu ai  mea le-lelei ia latou. O le tama’ita’i o Karen Minaha lea sa tatou talanoa iai ananafi, le tama’ita’i na so’a e se ta’avale ma motu ai lona vae, sa ia tā’ua, e iai lana ‘api fa’apitoa e tusitusi ai ma fa’amaumau mea e tutupu i aso ta’itasi. O aso uma, na te fa’amauina i le ‘api lea, mea-lelei e lima (5) e tutupu iā ia i le aso lea.

Na fa’amatala fa’apea, o lana masani lea, e fa’amanatu ai iā ia, le tumau pea ona fa’amanuiaina o lona tagata. Fai mai: “Na tonu ia a’u e fa’afeiloa’i ma fa’amagalo le ‘aveta’avale o le ta’avale na so’aina a’u. Ua leva ona fa’agalo ‘ou tiga sa iai, ina ia mafai ona fa’asolo le olaga, ia ‘ausia le ola fiafia ma manuia.”

E tofu tatou ma sese sa faia, sa tatou mo’omia ai le fa’amagaloga a Iesu. Ae afai e tatalo ma le agaga fa’amaulalo, ia Na ta’ita’i ma pulea lou tagata atoa, ina ia amata ai ona e soifua i Ona ala, ona e silafia lea, ua i ou tafatafa Le Atua Le Tama.

O le a galue Iesu i totonu ia te ‘Oe i aso uma, ina ia avea lou ola ma olaga manuia ma fa’amalieina na Ia faia ‘Oe ia e ola fa’apena ai. Toe mafaufau tasi lava…                                                                                                     

© Samoa Observer 2016

Developed by Samoa Observer in Apia