Tatala le Faletalimalo i Taumeasina mo Tagata-asiasi

By Fa’aliliu e Maiava 04 July 2016, 12:00AM

Ata: Sarafina Sanerivi

Ua fa’aopoopoina nei le faletalimalo mata’ina i Taumeasina – le Taumeasina Island Resort, i le lisi o faletalimalo e filifili ai tagata-asiasi mai i le atunu’u, e api ma nonofo ai a’o i Samoa nei. 

O le faletalimalo fou lea – lea ua fausia i luga o se tama’i-motu pe lima minute mai le taulaga o Apia – e matua mata’ina  va’aiga ‘ese’ese o le Vasa Pasefika ae maise o va’aiga matagofie o atu-mauga fa’asolosolo o Upolu e mafai ona maua ai, mai so’o se vaega o le faletalimalo.  

E tolu fale’aiga matagofie o lea faletalimalo, e lua vaega mo mea-inu,  o se fale fa’anei-ona-po mo koleniga ma fa’amalositino ua fa’atotogaina atoatoa fa’apea se vaega fa’apitoa ua fa’atotogaina i togafitiga, o fofo ma isi ‘au’aunaga e fa’aaogaina ai oloa e maua i le lotoifale fa’apea fo’i oloa mai fafo.

O le fale’aiga o lo’o fa’aigoaina ia Sina ma le Tuna – o se talatu’u fa’aleAganu’u,  o se tapenaga tulaga ‘ese mo le saunia o taumafa aupito lelei ma talafeagai mo le soifua maloloina, e fa’aaogaina ai taumafa e gaosia mai mea’ai-Samoa e saunia i ‘auala ‘ese’ese mo malo.  

  

Pe o malaga ta’ito’atasi, ta’ito’alua po’o se aiga fo’i ma vaega to’atele, ua iai i Taumeasina potu fa’anei-ona-po matagofie e maua ai va’aiga ogaoga o le Vasa Pasefika pe o potu-fa’apitoa fo’i i luga o le sami mo so’o se ituaiga o tagata-asiasi. 

E tolu tausaga o fa’atino galuega mo le fausia o lea faletalimalo, lea na tatala ona faitoto’a i le Aso 23 o Iuni, e talimalo ai i se fa’aipoipoga ma avea ai o se “tatalaga le-aloa’ia”, na ‘auai ai malo mai atunu’u i fafo pei o Farani mo lea fa’amoemoe. 

Na fa’aalia e le Ofisa Sili o Pulega mo Tagata Maimoa Mai Fafo, o Papali’i Sonja Hunter, ua fiafia lava ina ua tatala aloa’ia fo’i se tasi o faletalimalo i Samoa nei, mo le atina’eina o tulaga tau-turisi.

“E mata’utia le matagofie o lenei faletalimalo. E matua talafeagai lelei lona fausaga ma le si’osi’omaga ma ua atagia ai le aganu’u fa’aSamoa i ona teuga ma va’aiga  o le fale atoa. O se fa’aopoopoga matua mata’ina e fa’aopoopo i faletalimalo e fai ai filifiliga a malo mai fafo.

 “O fale’aiga ma vaega uma ua iai, ua atili mata’ina ai ma ofoina ai fo’i i tagata asiasi mai fafo avanoa e aupito matagofie ma lelei e ‘aunoa ma le tau-malaga mamao ‘ese atu ma le taulaga.” 

O le Aso Faraile talu ai, na tatala ai lea Faletalimalo. O nisi nei o ata sa pu’eina mai lea fa’amoemoe: 

By Fa’aliliu e Maiava 04 July 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>